Read Makassar Version – KITTA' MATANGKASA YEHEZKIEL 21 Bible Online

YEHEZKIEL 21 - Makassar Version – KITTA' MATANGKASA bible

YEHEZKIEL 21

¹Nakana Batara ri nakke,

²“He tau, tunrai Yerusalem! Tunrai tampa'-tampa' ibadana anjoreng. Pakaingaki butta Israel

³angkanaya iNakke, Batara, akkana kamma anne, ‘INakke anne musunnu. LaKubi'buki pa'dangKu nampa Kubuno ngasengko, tau ja'dalaka siagang tau bajika.

⁴Pa'dangKu Kupake angngewa ngasengi sikontu tau battu waraka sa'genna timboro'.

⁵Nampa sikontu taua naassemmi angkanaya iNakke, Batara, ambi'buki pa'dangKu siagang tena nalaKupari banoa ammotere'.’

⁶He tau, amma'rangko siagang akkunrarengko ri dallekanna tu Israel, sanrapangko tappu' minasa siagang tappu' panrannuang.

⁷Punna akkuta'nang ke'nanga angkana angngapa nukkunrareng, paumi angkanaya si'nai pa'mai'nu lanri kabara' laniaka battu. Anjo kabaraka lanapannekkereki nyawana ke'nanga, lammai limanna ke'nanga, annekkereki kulantu'na siagang tappelaki sumanga'na. Tojeng, narapi'mi wattunna, na kabusu'na anjo lakajariang ngasemmi. INakke, Batara Kaminang Tinggia anne akkana.”

⁸Nakana Batara ri nakke,

⁹“He tau, a'boto mako! Pauangi taua angkanaya iNakke, Batara akkana kamma anne, ‘Nia' se're pa'dang, pa'dang nikeso' siagang nipakatarang.

¹⁰Nipakatarangi sollanna akkulle ammuno, nilaccuki sollanna akkulle accilla'-cilla'. Mae ri ummakKu tenamo karannuang lanri sikontu pappakainga' siagang hukkungang nabalang parekangi ke'nanga.

¹¹Anjo pa'danga tuli nikantisiki sollanna tuli sadia nipake nampa nipassareang mae ri sitau pabuno tau.

¹²He tau, appiraungko siagang akkiokko! Lanri anjo pa'danga sadiai angngewai ummakKu. Sikamma pamimpinna Israel siagang sikontu bansaya lanicokai ri anjo pa'danga sa'genna panra'. Jari sappuru'mi barambannu lanri pacce,

¹³lanri Kuso'rina ummakKu, punna taeroka ke'nanga ampinrai gau'na, kabusu'na anjo lakajariangi mae ri ke'nanga.’

¹⁴Jari he tau, a'boto mako. Tempai limannu, salaku pammatei mae ri anjo pa'danga untu' appakkaramula ammuno. Anjo pa'danga sanna' appakamalla'-malla'na.

¹⁵Napa'jari bansaKu tappela' kabaranianna siagang tu'guru' tatto'ro. Kuancangi kotana ke'nanga siagang anjo pa'danga, accillaka sangkamma kila', siagang sadiaya untu' ammuno.

¹⁶He pa'dang taranga, anne'ba' mako mae ri kanang siagang mae ri kairi, siagang kemae-kemae nukaerokia.

¹⁷INakke lattempa lima tonga', nampa naung larroKu. INakke, Batara, anne akkana.”

¹⁸Nakana Batara ri nakke,

¹⁹“He tau, a'gambarakko rua oloang akkullea naolo karaeng Babel angngerangi pa'danna. Anjo ruaya oloang musti appakkaramulai cappa'na ri se're pa'rasangang; oloang se'rea a'lampa mangei ri Raba, kota Amon; anjo se'reanga pole a'lampa mangei ri Yerusalem, kota niaka pattahanganna ri Yehuda. Patabai papang pammatei oloang ri tampa'na appakkaramula appengka anjo oloanga.

²¹Karaeng Babel ammenteng ri ampi'na anjo papang pammateia. Untu' naassengi angkanaya oloang kereanga lanalaloi, lappalaki pangngunju' battu ri barhala-barhalana, nagoccangi panaya nampa naparessa atenna olo'-olo' beru le'baka nakoro'bangkang.

²²A'nyatami angkanaya anjo pana naallea lima kananna nia' pammatei mae ri Yerusalem! Anjo battuanna angkana karaenga musti nabunduki kota Yerusalem, akkioki untu' a'bundu' na nasuro tantarana ansusungi pakkakasa' untu' nipake anrumbang, napatabai ri sikamma pakke'bu' lompona Yerusalem, attambung butta a'jari tembo' untu' angkurungi Yerusalem, siagang angngeke kaloro'-kaloro'.

²³Tena natappa' pandudu'na Yerusalem angkanaya lanibunduki ke'nanga, lanri le'baki ke'nanga appare' parjanjiang siagang Babel. Mingka anne botoa lampakaingaki ke'nanga angkanaya lanijakkalaki ke'nanga lanri dosa-dosana.

²⁴INakke, Batara Kaminang Tinggia angkana ri ke'nanga, ‘Niassemmi dosa-dosanu siagang kabusu'na taua naassemmi angkanaya salako. Kaja'dallannu a'nassai battu ri sikamma panggaukannu. Kamma-kamma anne narapi'mi wattunnu lanihukkung siagang laKupassareangko mae ri musunnu.’

²⁵Nampa mae ri karaeng Israel Kukana, ‘He karaeng ja'dalaka siagang dorakaya! A'reppese'mi wattu hukkungannu kala'busanga.

²⁶INakke, Batara Kaminang Tinggia anne akkana. Lappassangi songko' kakaraengannu siagang sungkei soro'bannu. Kamma-kamma anne tappinrami kaadaanga. Angkaki empoanna tau kasi-asia siagang sarei ke'nanga koasa. Panaungi sikamma tau anna'galaka kakoasang battu ri kalompoanna!

²⁷Anne kotaya laKuancuru' taba sikali, sa'genna kemae-kemae nia' loro-loro. Mingka anjo passalaka nampami kajariang punna anjo tau Kupilea untu' anghukkungi anne kotaya battumi. Mae ri ia laKupassareang anne kotaya.’ ”

²⁸ “He tau, a'boto mako! Pauangi tu Amon le'baka anghinai tu Israel, angkanaya iNakke, Batara Kaminang Tinggia, akkana, ‘Se're pa'dang sadiami untu' ammuno; anjo pa'danga le'ba'mi nikantisi' sa'genna accilla' sangkamma kila', sollanna sadia untu' ammuno.

²⁹Anjo paccini' nucinika iamintu paccini' balle-balle, siagang anjo boto nupaua boto balle-balle todong. Ja'dalakko siagang dorakako, nampa wattu hukkungang kala'busannu a'reppese'mi. Anjo pa'danga lanapolongi kallonnu.

³⁰He tu Amon, paribanoai ammotere' pa'dannu! LaKuadeliko ri tampa'nu nipa'jari siagang nilassukang.

³¹LaKupa'betteseki larroKu a'rinra-rinraya mae ri kau. Siagang laKupassareangko mae ri tau sekkeka, siagang le'baka nilati untu' ammanraki.

³²Lacappu' kabusukko nakanre pepe'. Latattumpai cera'nu ri pa'rasangang kalennu, siagang tenamo manna sitau langngu'rangiko. INakke, Batara, anne akkana.’ ”