Read Makassar Version – KITTA' MATANGKASA YEHEZKIEL 24 Bible Online

YEHEZKIEL 24 - Makassar Version – KITTA' MATANGKASA bible

YEHEZKIEL 24

¹Ri tanggala' sampulo, bulang sampulo, lalang taung makasalapang ri wattu nipela'na ikambe, Nakana Batara ri nakke,

² “He tau, cataki tanggalaka anne alloa, lanri anne alloa nappakkaramula karaeng Babel angkurungi Yerusalem.

³INakke, Batara, nia' se're pangngebarangKu untu' lanipabattu mae ri ummakKu nangaia angngewa: Tiriki je'neka antama ri pancia nampa padongkoki irate ri pepeka.

⁴Bonei dageng antama dageng kaminang bajika; assi salangganna siagang bongganna kammayatompa buku-buku jaia oto'na.

⁵Dageng gimbala' co'mo' siagang rungka nupake tambai pasadia kayu tunuanna. Lappassangi a'rerea tojeng je'ne'na pallui anjo dagenga siagang buku-bukunna.”

⁶Nakana Batara Kaminang Tinggia, “Cilakai anjo kota rassia siagang pabuno-buno! Anjo kotaya rapangi uring taiang tenaya nale'ba' nikeso'. Dageng niaka ilalanna nipasulu' tassikere'-kereki, sa'genna manna sikere' tania' ammantang tassesa.

⁷Anjoreng ri kotaya kajariangi pammunoanga, mingka cera'na tena nata'bene naung ri buttaya, passangalinna nai' ri batu terasaka, sa'genna takkullea nitambungi.

⁸Anjo ceraka kubalang parekangi anjoreng sa'genna akkulle nicini' siagang a'boya pa'balasa'.”

⁹Nakana Batara Kaminang tinggia, “Cilakai anjo kota rassia siagang pabuno-buno! KalengKu lappa'gompo kayu untu' antunui.

¹⁰Tambai kayunna! Kapeki pepe'na! Pallui dagenna! Pelaki je'ne'na. Tunui buku-bukunna!

¹¹Kamma-kamma anne padongkoki anjo uring tambaga kosonga irate ri pepeka siagang lappassangi sa'genna a'jari eja a'bara. Punna le'ba'mo akkanre taianna, anjo uringa latangkasa'mi ammotere' situru' atorang agamaya.

¹²Mingka tena natappela' ngaseng taianna nakanre pepe'.

¹³He Yerusalem, anjo panggaukang-panggaukang kodinu nara'massimi kalennu. Kucobami antangkasiko, mingka tena matu-matunna, lanri tuli ra'masa'nu. Tena nulatangkasa' ammotere' sa'genna ammari pangngalarroingKu mae ri kau.

¹⁴INakke, Batara Kaminang Tinggia, anne akkana. Narapi'mi wattungKu untu' angngalle tindakang. Tena nalaKukaluppai dosanu siagang tena nalaKupammopporang yareka tena nalaKukamaseangko. LaKuhukkungko situru' sikontu panggaukannu. INakke, Batara Kaminang Tinggia, anne akkana.”

¹⁵Nakana Batara ri nakke,

¹⁶“He tau, ti'ring laKualle silalonnai tau kaminang nukamaseanga. Mingka takkulleako appiraung siagang angngarru', yareka nulappassang assolong je'ne' matannu.

¹⁷Gassingka kalangngerangi anjo karru'nu. Teako a'jappai natena nummake soro'bang, yareka tena nummake pa'lapa' bangkeng, kamma tau kamateanga. Tea tongko bongongi rupannu, siagang teako angnganrei roti nikanrea ri wattu kamateang.”

¹⁸Ri bari'basa'na a'bicara' mae ri anjo bansaya, na bangngina ammoterammi tubai'-baineku. Ammukona kugaukammi apa niparentakanga mae ri nakke.

¹⁹Akkuta'nammi ra'yaka angkana, “Angngapa kippakamma anne bapa'? Apa battuanna anne kammaya mae ri kambe?”

²⁰Nampa appialima' mae ri ke'nanga angkana, “Nasuroa' Batara

²¹ampabattui anne pasanga mae ri kau ngaseng angkana; Ikau nukalompoang pa'maiki kakassakanna Balla'Na Batara. Nungai nucini' siagang angkunjungi, mingka laNara'massi Batara Balla'na. Siagang sikamma anggota kaluarganu loloa ija, ia niaka ija ammantang ri Yerusalem, lanibunoi lalang ri pa'bundukang.

²²Nampa lanugaukang sangkamma anne kugaukanga kamma-kamma anne. Tena nalanubongongi rupannu yareka tena nulangnganre roti nikanrea ri wattu kamateang.

²³Tena nula'jappa nutammakea soro'bang yareka pa'lapa' bangkeng, tena nuppiraung siagang angngarru'. Pila' lata'ronangi tallasa'nu lanri dosa-dosanu; lakkunrarengko mae ri massing para ikau.

²⁴Jari inakke, Yehezkiel, la'jari conto mae ri kau: lanugaukangi sangkamma apa kugaukanga kamma-kamma anne. Nakana Batara, angkanaya punna kajariang anjo passalaka, lanuassemmi angkanaya Iami Batara Kaminang Tinggia.”

²⁵Nakana Batara ri nakke, “Jari, he tau, laKuallei battu ri ke'nanga anjo BallakKu kassaka, a'jaria kalompoang pa'mai'na siagang kasannangnganna ke'nanga, siagang nangaia naciniki siagang nakunjungi. Nampa laKualle todong ana'-ana'na ke'nanga.

²⁶Ri allo Kugaukanna anjo passalaka, sitau ta'lappasaka battu ri anjo kapanrakanga labattui siagang napabattui anjo kabaraka mae ri kau.

²⁷Ri ia todong anjo alloa lakkulleko a'bicara ammotere' siagang tenamo nupepe. Nampa la'bicara mako siagang anjo taua. Kammami anjo naikau la'jari pammatei mae ri ke'nanga; nampa naassemmo ke'nanga angkanaya iNakkemi Batara.”