Read Makassar Version – KITTA' MATANGKASA YEHEZKIEL 26 Bible Online

YEHEZKIEL 26 - Makassar Version – KITTA' MATANGKASA bible

YEHEZKIEL 26

¹ Ri tanggala' se're bulang attantua lalang taung makasampulo asse're ri wattu nipela'na ikambe, a'bicarai Batara mae ri nakke, Nakana,

²“He tau, a'rannu-rannui pandudu'na Tirus na nakana, ‘Ancuru'mi Yerusalem! Lanynya'mi kagassinganna lalang ri pa'dangganganga! Tenamo niagang a'bali lalang pa'danggangang!’ ”

³Nakana Batara Kaminang Tinggia, “INakke musunnu he Tirus! LangngerangA' jai bansa battu untu' ambundukiko, siagang labattui ke'nanga sanrapang bombanna tamparanga.

⁴Lanaancuruki tembo'-tembo'nu siagang lanaruntungi menara-menaranu. Sikontu butta niaka anjoreng laKubarrasaki, sa'genna ia tassesaya iamintu se're mami batu kalotoro' ri tangngana tamparanga.

⁵Sikamma paboya jukuka lanaalloi jalana ke'nanga irate ri anjo batua. INakke, Batara Kaminang Tinggia anne akkana. Tirus lanilappoi ri jaia bansa.

⁶Lanaellaki ke'nanga siagang lanabunoi panduduka ri kota-kota niaka ri bontona Tirus. Jari naassemmi pandudu'na Tirus angkanaya iNakke Batara.”

⁷Nakana Batara Kaminang Tinggia, “LaKuerangi Karaeng Nebukadnezar battu ri Babel, untu' ambundukiko, he Tirus. Anjo karaeng kaminang kassaka laniaki battu wara' siagang tantara lompo, siagang jai jarang, kareta-kareta pa'bundukang, kammayatompa pasukang a'jarang.

⁸Pandudu'na sikontu kotaya ri bontoa lanibunoi lalang pa'bundukanga anjo. Musua langngekei kaloro'-kaloro' pattahangngang, appare' tembo'-tembo' pakkurung siagang anynyusung pannangkisi'-pannangkisi' lompo untu' napake ke'nanga salaku pattahangngang angngewako.

⁹Lanarumbangi ke'nanga tembo'-tembo'nu siagang pakkakasa' panrumbang siagang naruntungi menara-menaranu siagang polongang-polongang bassi.

¹⁰Tamaka jaina jaranna ke'nanga, sa'genna bate bangkenna appa'niaki limbu'bu' anri'ba' angkalimbukiko. Sa'ra galutturu'na pasukang a'jaranga, iamintu a'besoka bokong siagang kareta pa'bundukang, lanapa'galatturuki tembo'-tembo'nu ri wattunna naolo ke'nanga sikamma pakke'bu' lompoa nantama' ri anjo kota runtungamo.

¹¹Pasukang a'jaranga la'jalloki ri sikamma oloannu, nabunoi pandudu'nu siagang pa'danna ke'nanga. Sikamma menaranu kassaka siagang gammaraka lanarumbangi.

¹²Anjo musu-musunnu lanarampasaki sikontu kakalumanynyangngannu siagang barang-barang danggangngannu. Lanaruntungi tembo'-tembo'nu siagang lanarumbangi sikamma balla' ga'ganu. Lanaallei ke'nanga batu-batunna, papang-papanna, siagang buttana, nampa napasambila antama ri tamparanga.

¹³ LaKupammari sikontu kelong-kelonnu siagang sa'ra kacapinnu.

¹⁴Ia Kusesaya se're mami batu kalotoro', tampa'na sikamma paboya jukuka angngalloi jalana ke'nanga. Anjo kotaya talanibangungami ammotere'. INakke, Batara Kaminang Tinggia, anne akkana.”

¹⁵Nakana Batara Kaminang Tinggia ri kota Tirus, “Pandudu'na daera biring tamparanga lannekkereki napakamma malla' punna nalangngerekko ammarrang lanri nibetanu siagang sa'ra akkio'na tau nibunoa.

¹⁶ Nacini'na sarennu kammaya, sikamma karaeng battu ri bansa-bansa niaka ri biring tamparanga, nala'gasi juba kalompoanna siagang baju sulanna ke'nanga, nampa ammenteng battu ri empoang kakaraenganna, namange ammempo ri buttaya annekkere'. Teai sipato' malla'na ke'nanga sa'genna takkulleami sannang nyawana.

¹⁷Nampa lakkelong ke'nanga ampakkelongangko lagu pattarawang angkana: Ancuru'mi kota nipakalompoa! Sikontu kappala'na nibarrasa' battu ri tamparang. Riolo pandudu'na koasai ri tamparang na'jari malla' sikamma tau ammantanga ri biring tamparang.

¹⁸Kamma-kamma anne, nibeta mako, annekkere'mi panduduka ri pulo-puloa. Ta'bangka ngasemmi ke'nanga anciniki kaancurang lomponu.”

¹⁹Nakana Batara Kaminang Tinggia, “Kupa'jariko sino sikali sangkamma kota tenaya pandudu'na. LaKutambungiko siagang je'ne' battu ri tamparang lompoa.

²⁰Nampa Kukiringko mange ri linona tau matea untu' asse're siagang tau battua ri jammang riolo dudu. Kubalang parekangko ammantang tuli ri anjo lino tau matea, ri tangnga-tangngana loro-loro satunggu-tunggua, asse're siagang tau matea. Jari tenamo nalanipammantangngi buttanu, siagang tenamo nanipasibilangko tau attallasaka.

²¹ Kupa'jariko conto appakamalla', siagang iaminjo kala'busang riwaya'nu. Laniboyako ri taua mingka tena nalanigappako. INakke, Batara Kaminang Tinggia, anne akkana.”