Read Makassar Version – KITTA' MATANGKASA YEHEZKIEL 3 Bible Online

YEHEZKIEL 3 - Makassar Version – KITTA' MATANGKASA bible

YEHEZKIEL 3

¹ Nakana Allata'ala, “He tau, kanrei anne kitta' nigulunga, nampa a'lampako siagang mange mako a'bicara ri tu Israel.”

²Nampa kusungke bawaku, siagang Napassareammi Allata'ala anjo kitta' nigulunga mae ri nakke sollanna kukanre.

³Nakana, “He tau, kanrei! Bonei battannu siagang anne kitta' nigulunga.” Nampa kukanre anjo kittaka na kasia'na te'nei sangkamma je'ne' bani.

⁴Nakana pole Allata'ala, “He tau, a'lampako mange ri tu Israel nampa nupabattu pasangKu mae ri ke'nanga.

⁵Mange ri ke'nanga Kusuroangko, teai mange ri bansa susaya bicaranna, tenaya nuassengi yareka tena nupahangi. Ebara' angkana Kusuroko mange ri bansa kammaya anjo, lanapilangngeri ke'nanga kana-kanannu.

⁷Mingka bansa Israel taerokai ampilangngeriko, ba'lalo manna iNakke tena todong naero' ke'nanga ampilangngeriA'. Kapala batu ngasengi ke'nanga siagang nangai angngewaya.

⁸Kamma-kamma anne laKupa'jari kapala batuko siagang pore akkala'nu sangkamma todong ke'nanga.

⁹LaKupa'jari kassakko sangkamma batu karang siagang terasa' sangkamma intang. Teako mallakki mae ri sikamma anjo tau nangaia angngewa.”

¹⁰Nampa pole Nakana Allata'ala, “He tau, parhatikangi baji'-baji' siagang u'rangi sikontu apa laKupaua mae ri kau.

¹¹A'lampako mange ri bansanu niaka ri anjo pa'rasangang pammelakkanga, siagang pabattui pasangKu, battu ri Nakke, Batara Kaminang Tinggia; pauangi ke'nanga, apaka napilangngeri yareka tena.”

¹²Nampa naangkaka' RohNa Allata'ala, na nia'mo ri bokoku sa'ra a'gamarrung angkana, “Pujimi kala'biranNa Batara ri suruga!”

¹³Kulangngereki sa'ra ka'nyi'na anjo apa-apa attallasaka, ia sisentoka, siagang sa'ra a'rotona anjo roda-rodaya, kamma lompona sa'ranna bulu' a'lappoka.

¹⁴KakoasanNa Batara battu mae ri nakke sanna' heba'na, siagang ri wattungku Niangka' siagang Nierang ri RohNa, atingku sanna' pai'na siagang bambanna kusa'ring.

¹⁵Nakubattumo mange ri tampa'na sikamma tunipelaka ri Tel-Abib ri birinna Binanga Kebar. Tuju alloa' salloku ammantang anjoreng; kalanna'-lannassanga' lanri sikontu anjo apa kulangngereka siagang kucinika.

¹⁶Le'baki tuju allo, Nakanamo Batara ri nakke,

¹⁷“He tau, ikau Kuangkakko a'jari pajaga mae ri bansa Israel. Pabattui mae ri ke'nanga anne pappakainga' Kupassareanga.

¹⁸Punna Kupauangko angkana nia' se're tau ja'dala' lamate, mingka tena nupakaingaki sollanna napinra panggaukanna sollanna salama', lamatei salaku tau doraka, nampa tanggong jawa'na anjo kamateanna lanituntuki battu ri kau.

¹⁹Punna nupakaingaki anjo tau ja'dalaka na tena naero' ampamari a'gau' ja'dala', lamatei salaku tau doraka, mingka ikau kalennu lasalamakko.

²⁰Punna nia' se're tau baji' appakkaramula a'gau' dosa, nampa Kupasidallekangi siagang bahaya, lamatei punna tena nupakaingaki. Lamatei lanri dosa-dosana, siagang sikamma panggaukang baji'na tena nalaKuu'rangi. Mingka tanggong jawa'na ri anjo kamateanna laKutuntuki battu ri kau.

²¹Punna nupakaingaki anjo tau bajika sollanna tena na'gau' dosa, siagang naturuki pappakainga'nu, tena nalaKuhukkungi siagang ikau lasalamakko.”

²²Kukasiaki kagassinganNa kahaderanNa Batara siagang kulangngereki angkana ri nakke nakana, “Ambangungko nai' siagang a'lampako mange ri lappara'na ka'bunga. Anjoreng la'bicarA' mae ri kau.”

²³Jari a'lampama' mange ri lappara'na ka'bunga, nampa anjoreng kuciniki singara' accayaya, ampa'nassayai kahaderanNa Batara sangkamma le'baka kucini' ri birinna Binanga Kebar. Nampa tu'guru' tattinompamma' naung ri buttaya,

²⁴mingka RohNa Allata'ala antamaki ri kalengku siagang Napabangunga' nai'. Nakana Batara ri nakke, “Ammotere' mako siagang kurungi kalennu lalang balla'.

²⁵He tau, ikau lanisikkokko siagang otere' sa'gennu takkullea assulu' siagang takkullea assibuntulu' siagang taua.

²⁶LaKupa'jari ka'doroki lilanu sa'genna takkulleako ampakaingaki anne bansa nangaia angngewa.

²⁷Sallang, punna a'bicarA' pole mae ri kau, nampa Kupa'jari akkulleko ammotere' a'bicara, musti nupabattui kanangKu, iNakke, Batara Kaminang Tinggia, mae ri ke'nanga. Sipa'gang ke'nanga lappilangngeri, mingka sipa'gang maraenga tena, lanri anjo ke'nanga bansa nangai angngewaya.”