Read Makassar Version – KITTA' MATANGKASA YEHEZKIEL 31 Bible Online

YEHEZKIEL 31 - Makassar Version – KITTA' MATANGKASA bible

YEHEZKIEL 31

¹Ri tanggala' se're bulang tallu, lalang taung makasampulo asse're ri wattu nipela'na ikambe, Nakana Batara ri nakke,

²“He tau, pabattui pasangKu anne mae ri karaeng Mesir siagang sikontu bansana: Tojeng, hebaki kalompoannu! Tena akkulle ampasangkammaiko!

³Ikau rapangko poko' camara Libanon gammaraka rassi tangke coppong leko'na na ga'ga. Poko'na lambusuki na lompo coppo'na narapiki rammanga.

⁴Attimboi lanri gannaki ri je'ne'. Binanga irawa buttaya assarei kanre, nasirangi sikontu aka'na, na nabasai poko'-poko' maraenga.

⁵Lanri tale'baka kurang je'ne'na, coppongi timbona, lompoi na la'bu tangkenna. Battu ri sikontu poko' kayu ri romang, iami kaminang tinggi nai'.

⁶Sangka' rupa jangang-jangang a'ru'mung ri tangkenna. Olo'-olo' liaraka ammana' irawa ri la'lanna. Sikontu bansa lompoa ri lino ammempo a'la'lang irawanganna.

⁷Anjo pokoka ga'gai nicini'; lambusuki poko'na, la'bui tangkenna. Aka'na annarrusuki bella naung nagappai timbuseng je'neka ilalang ri buttaya.

⁸ Poko'-poko' camara ri Eden, kokonNa Allata'ala takkulleai nipasangkamma siagang ia. Tena camara akkulle ambetai, tena poko' kayu la'bu kamma tangkenna. Tojeng, ri kokonNa Allata'ala tena poko' kayu sangkamma ia ga'gana.

⁹INakkemi ampa'jari ga'gai siagang tangke-tangke la'bu na coppong. Sikontu poko' kayua ri kokonNa Allata'ala assereati ngaseng mae ri ia.

¹⁰Lanri kammana anjo, iNakke, Batara Kaminang Tinggia, Kupauangko apa lakajarianga mae ri anjo poko' kayu anrapika coppo'na nai' ri rammanga. Nasaba' pila' tinggi pila' tampoi.

¹¹Jari laKutollaki siagang laKupassareangi mae ri pamarenta bansa maraeng, nanagaukang mae ri ia apa situruka siagang panggaukanna.

¹²Anjo tantara bansa maraeng tenaya nangngasseng appamopporang lanata'bangi anjo poko'ka nampa nabalang parekang. Tangkenna anjo tepokamo tu'gu'-tu'guru' ngasemmi ri sikontu buluka siagang ka'bunga ri anjo pa'rasanganga. Sikontu bansa niaka irawa kakoasanna la'lampa ngasengi ambokoi.

¹³Jangang-janganga labattui na'dangka' ri anjo poko' anra'bayamo, siagang olo'-olo' liaraka lanaonjo'-onjokangi tangke-tangkenna.

¹⁴Kabusu'na anjo sikammaya kajariangi sollanna appakkaramula anne wattua, tenamo pole poko' kayu lattimbo kamma anjo tinggina; tenamo coppo' poko' kayu lanrapi' nai' ri rammanga manna pole nanggappa je'ne' allumpa-lumpa. Kabusu'na musti matei sangkamma rupatau biasaya, nampa asse're siagang sikamma tau naungamo ri linona tau matea.”

¹⁵Kammami anne kananNa Batara Kaminang Tinggia, “Punna naung anjo poko' kayua ri linona tau matea, laKusuroi je'ne' rawa buttaya angngammei salaku pammatei kasusaang. LaKutahangi passolonna je'ne' binangaya siagang laKujempangi sikamma pangka binangaya. Lanri matemi anjo poko' kayua, lappabattuMa' sassang mae ri sikamma Moncong Libanon siagang Kupa'jari kalumeng kabusuki poko'-poko' kayua ri romanga.

¹⁶Ri wattunna Kupanaung anjo pokoka ri linona tau matea, sa'ra tu'guru'na lanapannekkereki bansa-bansaya. Sikontu poko'-pokoka ri Eden siagang poko'-poko' nipilea ri Libanon, ia anggappaya je'ne' allumpa-lumpa, siagang naungamo ri lino kaminang rawaya lasannangi nyawana lanri tu'guru'na anjo poko' kayua.

¹⁷Lanarurungangi ke'nanga mange ri linona tau matea nampa asse're siagang ke'nanga rioloangnganga tu'guru'. Nampa sikontu anjo le'baka ammempo irawanganna anjo poko' kayua lanipasiaraki ri alla'na bansa-bansaya.

¹⁸Anjo poko' kayua a'jari pangngebarangi mae ri karaeng Mesir siagang bansana. Tena poko' kayu ri Eden kammaya anjo tinggina siagang la'biri'na. Mingka kamma-kamma anne, sangkamma todong poko'-poko' kayu ri Eden anjo poko' kayua lanaung tongi ri linona tau matea nampa asse're siagang ke'nanga tenaya natappa' ri Allata'ala, siagang sikamma tau matea lalang pa'bundukang. INakke, Batara Kaminang Tinggia, anne akkana.”