Read Makassar Version – KITTA' MATANGKASA YEHEZKIEL 34 Bible Online

YEHEZKIEL 34 - Makassar Version – KITTA' MATANGKASA bible

YEHEZKIEL 34

¹Nakana Batara ri nakke,

²“He tau, callai sikamma karaeng Israel, siagang pabattui apa Kupaua, iNakke, Batara Kaminang Tinggia mae ri ke'nanga angkana, ‘Cilakako, he sikamma pakalawakinna Israel. Sangnging kaparalluang kalennu bawang nunawa-nawa, teai kaparalluanna sikamma gimbala'nu.

³Dadi'na nuinungi, bulu-bulunna nupareki pakeang, siagang gimbala' kaminang co'moka nupolongi nampa nukanrei. Tale'bakai nuurusu' sikamma gimbala'nu.

⁴Gimbala'nu dodonga tena nuparakai, ia garringa tena nuballei, ia bokkaka tena nurokoki loko'na, ia sala oloanga siagang tappelaka tena nuboyai nampa nuerang ammotere'. Ba'lalo sikamma anjo gimbalaka nukapallakki.

⁵ Lanri tenana pakalawakinna, anjo gimbalaka tassiara'mi na nikanre ri olo'-olo' sekke'.

⁶Jari pitilampa-lampaimi sikamma gimbalakKu ri bulu'-bulu' tinggia siagang sikamma monconga. Tassiaraki ke'nanga mange ri sikontu buttaya, tena manna sitau amparhatikangi yareka amboyai ke'nanga.

⁷Jari, sikamma pakalawakia, pilangngeri apa Kupaua, iNakke, Batara Kaminang Tinggia, mae ri kau:

⁸Lanri iNakke, Allata'ala mattallasaka, parhatikangi! Nikokkoki siagang nikanrei sikamma gimbalakku ri olo'-olo' sekkeka, lanri tena angkalawaki ke'nanga. Ikau sikamma pakalawakingKu tena nanujampangi anjo sikamma gimbalaka. Poro kaparalluang kalennu bawang nunawa-nawa, teai kaparalluanna sikamma gimbala'nu.

⁹Jari, pilangngeri, he sikamma pakalawakia,

¹⁰Nakke, Batara Kaminang Tinggia akkana ri kau angkanaya iNakke anne musunnu. Anjo sikamma gimbalakKu laKuallei ammotere' battu ri kau siagang tenamo naKupappirannuangi mae ri kau; tenamo naKukellaiko annawa-nawai kaparalluang kalennu bawang. Sikamma gimbalakKu laKupasalamaki battu ri kau, sa'genna tenamo nala'jari kanrenu.’ ”

¹¹Nakana Batara Kaminang Tinggia, “KalengKu lamboyai sikamma gimbalakKu siagang amparakai ke'nanga,

¹²sangkamma sitau pakalawaki amboyai siagang ampa'rappungi sikamma gimbala'na tassiaraka nampa naparakai ke'nanga. LaKuerangi ke'nanga ammotere' battu ri sikontu tampa'na tassiara' ri anjo allo sassanga siagang battuna balaya.

¹³LaKupasuluki ke'nanga battu ri tangngana bansa-bansaya siagang pa'rasangang-pa'rasangang maraeng, nampa Kupa'rappung siagang Kuerang mange ri pa'rasangang kalenna. LaKukalawaki ke'nanga ri sikamma monconga siagang ka'bunga ri Israel, siagang Kururungang mange ri parang ruku' nyamanga.

¹⁴Tojeng, laKupasadiangi ke'nanga parang-parang ruku' coppong ri daera monconga siagang ri sikamma lappara' ka'bunna butta Israel. Anjorengi ke'nanga lammari-mari siagang angnganre ruku' siagang amang.

¹⁵KalengKu la'jari pakalawaki mae ri sikamma gimbalakKu siagang ampasadiangi tampa' pammari-mariang ke'nanga; iNakke, Batara Kaminang Tinggia, anne akkana.

¹⁶Ia tappelaka laKuboyai, ia lingua laKuerangi ammotere', ia lokoka laKurokoki loko'na, ia garringa Kuballei; mingka co'moka siagang gassinga laKupanraki, lanri iNakke pakalawaki anggaukangi apa bajika.

¹⁷Pilangngeri, he sikamma gimbalakKu! INakke, Batara Kaminang Tinggia Kukana ri kau angkanaya massing laKuadeliko siagang Kusa'laki bajika battu ri ja'dalaka, sikamma gimbalaka battu ri sikamma bembea.

¹⁸Battu ri kau nia' tena nasangga nasa'ring pa'mai'na punna poro ruku' kaminang bajika nacappu', mingka naonjo'-onjokang tompi ruku' tenaya nakanrei ke'nanga! Angnginungi ke'nanga je'ne' ci'nong nampa napuccakki je'ne' tenaya nainungi ke'nanga!

¹⁹Sikamma gimbalakKu maraenga musti angnganrei ruku' le'baka nionjo'-onjokang siagang angnginungi je'ne' le'baka nipuccaki.

²⁰Lanri kammana anjo, iNakke, Batara Kaminang Tinggia Kukana ri kau, he sikamma gimbala' co'moka, angkanaya labattuA' a'jari haking ri tangnga-tangngana gimbala' gassinga siagang gimbala' dodonga.

²¹Nusorong-sorongi siagang nuulaki gimbala' garringa sa'genna niemba ke'nanga battu ri pa'rappunganna gimbalaka.

²²Mingka KalengKu lampasalamaki sikamma gimbalakKu, sollanna tena nanikapallakki ke'nanga. LaKuadeli gimbalakKu tasse're-se're siagang laKusa'laki bajika battu ri ja'dalaka.

²³ LangngangkakKa' sitau karaeng sangkammaya atangKu Daud, untu' a'jari pakalawaki tenaya ruanna mae ri ke'nanga, siagang iami lamparakai ke'nanga.

²⁴ INakke, Batara, la'jari Allata'alana ke'nanga, siagang anjo karaeng sangkammaya atangKu Daud la'jari pamarenta mae ri ke'nanga. INakke, Batara anne akkana.

²⁵LapparekKa' parjanjiang siagang ke'nanga, ampattantui kaamangnganna ke'nanga. LaKubongkai sikontu olo'-olo' sekkeka battu ri sikontu pa'rasanganga, sa'genna akkulle sikamma gimbalakKu ammantang siagang amang ri sikamma paranga siagang attinro ri romanga.

²⁶LaKubarakkaki ke'nanga siagang Kupa'biangi ammantang ke'nanga ri tammulilina bulu' matangkasakKu. LaKusarei ke'nanga bosi punna parallui.

²⁷Poko'-pokoka la'rappoi, koko-kokoa langngerangi wassele', siagang sikontu taua lammantangi siagang amang ri butta kalenna. Punna le'ba'mo Kutappu' rante passikko'na ummakKu siagang le'ba'mi Kulappassang battu ri tau amparekai ata ke'nanga, naassemmi ke'nanga angkanaya iNakke Batara.

²⁸Tenamo nalaniella' ke'nanga ri bansa-bansa tenaya natappa' ri Nakke, yareka nikokko' ri olo'-olo' sekke'. Lattallasa' salewangangi ke'nanga, siagang tenamo manna sitau lampakamallaki ke'nanga.

²⁹LaKupicoppongi sikamma kokonna ke'nanga sa'genna tenamo wattu kacipurang ri anjo pa'rasanganga. Tenamo nalanihina ke'nanga ri bansa-bansa maraenga.

³⁰Jari lanaassemmi sikontu taua angkanaya anjo Israel ummakKu, siagang angkanaya iNakke alla'langngi. INakke, Batara Kaminang Tinggia, anne akkana.

³¹Tojeng, ikaumi pa'rappungang gimbalakKu Kusarea kanre. Ikaumi ummakKu, siagang iNakkemi Allata'alanu. INakke, Karaeng Allata'ala Kaminang Tinggia, anne akkana.”