Read Makassar Version – KITTA' MATANGKASA YEHEZKIEL 37 Bible Online

YEHEZKIEL 37 - Makassar Version – KITTA' MATANGKASA bible

YEHEZKIEL 37

¹Kupisa'ringi kakoasanNa Batara, siagang naeranga' RohNa naung ri ka'bung rassia siagang buku-buku.

²Naeranga' Batara angnginroi anjo ka'bunga, na kucini' angkanaya ri sikontu anjo ka'bunga sanna' jaina buku-buku sannaka kalotoro'na.

³Akkuta'nangi Batara ri nakke angkana, “He tau, maka akkullei anne buku-bukua attallasa' poleang?” Appialima' angkana, “O Batara Kaminang Tinggia, iKatteji bawang angngassengi.”

⁴Nampa Nasuroma' Batara ampabattui pasanNa mae ri anjo buku-buku kalotoroka angkana,

⁵“INakke Batara Kaminang Tinggia ampatuiki nappasaka antama' ri kalennu sollannu attallasa' poleang.

⁶Kusareko ammotere' ura'-ura' siagang assi kammayatompa Kurokokko bukkuleng. LaKusareko nappasa' sa'gennu attallasa' poleang. Jari nuassemmi angkanaya iNakkemi Batara.”

⁷Nampa inakke, Yehezkiel, a'bicarama' mae ri anjo buku-bukua situru' pasanNa Batara. Na lalang anjo a'bicaraku, nia'mo kulangngere' sa'ra a'reku'-reku', lanri anjo buku-bukua appakkaramulami assialle anjari se're.

⁸Lalang kuparhatikanna anjo kammaya, appakaramulami anjo buku-bukua nia' ura'na siagang assinna, kammayatompa nia' tommo bukkulenna, mingka tenapa na'nyawa anjo sikamma tubua.

⁹Nakana Allata'ala ri nakke, “He tau, a'bicarako mae ri anginga. Pauangi angkana iNakke, Batara Kaminang Tinggia amparentakangi mae ri ia sollanna nia' battu ri kere-keremae, untu' ampatuiki nappasaka antama' ri anjo sikamma tubu matea sa'genna attallasa' poleang.”

¹⁰ Jari a'bicarama' situru' Naparentanga Batara, siagang napappatuikammo anginga anjo nappasaka antama' ri sikamma anjo tubua sa'genna attallasa'mo siagang ammentemmo ke'nanga. Teai sipato' jaina, sa'genna anggannaki a'jari se're pasukang tantara lompo.

¹¹Nakana Allata'ala ri nakke, “He tau, anne sikamma buku-bukua iami pangngebaranna bansa Israel. Akkunrarengi ke'nanga lanri kalotoroki, tena panrannuanna siagang tena allo ri bokona.

¹²Lanri kammana a'boto mako mae ri ummakKu anjo bansa Israel, angkanaya iNakke, Batara Kaminang Tinggia, lassungkei jera'na ke'nanga. LaKupasuluki ke'nanga battu ri anjo jeraka nampa Kupoterang ke'nanga mange ri butta Israel.

¹³Punna le'ba' Kugaukang sikammaya anjo, lanaassemmi ummakKu angkanaya iNakke Batara.

¹⁴LaKupatuiki nappasaka antama' ri kalenna ke'nanga untu' ampakatallasaki ke'nanga, nampa Kusare pakkulle ke'nanga ammantang ri pa'rasangang kalenna. Jari naassemmi ke'nanga angkanaya iNakke Batara. INakke Batara anne akkana, siagang mattantu la'rupana kanangKu.”

¹⁵Nakana pole Batara ri nakke,

¹⁶“He tau, angngalleko se're takkang siagang tulisiki anne kana-kanaya anjoreng, ‘Kakaraengang Yehuda’. Nampa angngalleko se're takkang maraeng, siagang tulisiki anjoreng, ‘Kakaraengang Israel’.

¹⁷Nampa nuta'gala' anjo ruaya takkang, sa'genna sialle cappa'na na'jari se're takkang.

¹⁸Punna napakkuta'nangngang bansanu battuanna,

¹⁹pauangi ke'nanga, angkana iNakke, Batara Kaminang Tinggia, langngalle se're takkang pangngebaranna Israel nampa Kupasialle se're takkang pangngebaranna Yehuda. Anjo ruaya takkang laKupa'jari se'rei siagang Kuta'galaki lalang limangKu.

²⁰Ta'galaki anjo ruaya takkang siagang paccinikangi anjo bansaya.

²¹Nampa paui mae ri ke'nanga angkanaya iNakke, Batara Kaminang Tinggia, angngallei sikontu bansaKu battu ri sikamma pa'rasangang napa'lampaia ke'nanga. LaKupasse'rei ke'nanga siagang Kuerangi ammotere' mange ri pa'rasangang kalenna.

²²LaKupa'jari se'rei ke'nanga bansa anjoreng pa'rasanganga, ri daera monconna Israel. Laniparentai ke'nanga ri se're karaeng, siagang tenamo nalata'bage pole ke'nanga a'jari rua bansa yareka kakaraengang.

²³Tenamo nalanara'massi pole kalenna ke'nanga lanri nagaukanna dosaya siagang anynyombana ri barhalaya, appakaringi'-ringika. LaKupakabebasaki ke'nanga battu ri sikontu sala panggaukanga, ampakabellayai ke'nanga battu ri Nakke. LaKutangkasi ke'nanga; la'jari ke'nanga ummakKu, siagang iNakke Allata'alana ke'nanga.

²⁴ Lanipa'jari se'rei ke'nanga irawangang parentana se'rea karaeng sangkammaya Karaeng Daud, ammarentaya satunggu-tungguna. Lamajarreki ke'nanga anturuki hukkung-hukkungKu. Nampa sa'genna satunggu-tungguna ke'nanga siagang jari-jarina ke'nanga lanapammantangngi anjo pa'rasanganga, iamintu pa'rasangang Kupassareanga mae ri Yakub siagang napammantangngia boe-boena ke'nanga.

²⁶LapparekKa' parjanjiang siagang ke'nanga untu' ampattantui kaamangnganna ke'nanga sa'genna satunggu-tungguna. LaKubarakkaki ke'nanga siagang laKutambai jaina ke'nanga. LaKubangungi ri pa'rasanganna ke'nanga BallakKu, lammentenga anjoreng satunggu-tungguna.

²⁷ LammantangA' siagang ke'nanga; iNakke la'jari Allata'alana ke'nanga, siagang ke'nanga la'jari ummakKu.

²⁸Punna nia'mi BallakKu ri tangnga-tangngana ke'nanga untu' satunggu-tungguna, lanaassemmi bansa-bansa maraenga angkanaya iNakke, Batara, le'ba' ampilei Israel a'jari ummakKu.”