Read Makassar Version – KITTA' MATANGKASA YEHEZKIEL 39 Bible Online

YEHEZKIEL 39 - Makassar Version – KITTA' MATANGKASA bible

YEHEZKIEL 39

¹Nakana Batara Kaminang Tinggia, “He tau, ancangi Gog, karaeng lompo battua ri pa'rasangang Mesekh siagang Tubal, siagang pauangi angkanaya iNakke anne musunna.

²INakke lampalekkoi, siagang Kuerangi assulu' battu ri daera bellaya bageang wara', mange ri daera monconna Israel.

³Anjoreng laKutunrungi anrong panana sa'genna ta'lappasa' battu ri lima kairinna, nampa Kutu'gurang ana'-ana' panana battu ri lima kananna.

⁴Irate ri daera moncong-monconna Israel, lamate Gog siagang sikontu tantarana kammayatompa sikontu naaganga sita'gala'; nampa maya'-maya'na ke'nanga laKupassareangi mae ri jangang-janganga siagang olo'-olo' sekkeka untu' nakanre.

⁵Anjo sikamma tantaraya latu'guruki na mate ri koko-kokoa. INakke, Batara Kaminang Tinggia, anne akkana.

⁶Lappa'niakKa' pepe' akkanre ri butta Magog siagang ri sikamma biring tamparanga, ri daera amanga siagang sannanga katallassanna pandudu'na. Jari naasseng ngasemmi ke'nanga angkanaya iNakkemi Batara.

⁷Mingka ri tangnga-tangngana tu Israel, laKupa'nyatai arengKu matangkasaka, siagang tenamo nalanira'massi arengKu. Jari naassemmi bansa-bansaya angkanaya iNakkemi Batara, iamintu Allata'ala matangkasaka ri Israel.”

⁸Nakana Batara Kaminang Tinggia, “Tojeng, anjo allo Kupakkanaya ma'nassa labattui.

⁹La'balulungi assulu' pandudu'na kota-kotaya ri Israel untu' ampasse'rei sanjata nibokoia, iamintu pannahang siagang pa'dang, anrong pana siagang ana' pana, kammayatompa takkang pattunrung. Kabusu'na anjo kammaya napa'jari ke'nanga kayu tunuang, anggannaka nipake tuju taung sallona.

¹⁰Jari taparalluami ke'nanga appasse're kayu tunuang ri kokoa yareka anna'bang poko' kayu ri romanga, nasaba' sikontu anjo sanjata nibokoia sukku' jaina untu' nipare' kayu tunuang. Lanaellaki siagang lanarampasaki barang-baranna sikamma tau le'baka angngellaki siagang anrampasaki barang-baranna ke'nanga. INakke, Batara Kaminang Tinggia, anne akkana.”

¹¹Nakana Batara, “Punna kajariang ngasemmo anjo sikammaya, laKusaremi Gog butta pa'jerakkang ri Israel, iamintu ri ka'bung pa'limbangnganga ri rayanganna Tamparang Matea. Anjoremmi Gog siagang sikontu tantarana lanitarawang. Siagang laniaremmi anjo ka'bunga ‘Ka'bung Pasukang Gog’.

¹²Tuju bulangi sallona Israel akkareso antarawangi anjo sikontu tau matea sollanna tenamo nara'masa' anjo tampaka.

¹³Sikontu pandudu'na pa'rasanganga lamminawang turu' ngasengi ambantu untu' antarawangi anjo tau matea; siagang untu' yangasenna anjo sikammaya, lannarimai ke'nanga pahala ri allo pammetangKu. INakke, Batara Kaminang Tinggia, anne akkana.

¹⁴Allalonamo anjo wattu tuju bulanga, nia' siapa are tau lanisare tugasa' untu' angnginroi anjo pa'rasanganga amboyai maya'-maya' niaka ija tassiara'; na punna nia' nabuntulu', natarawangi ke'nanga anjo mayaka sollanna natangkasa' anjo pa'rasanganga battu ri kara'massanga.

¹⁵Lalang ri anjo pa'jappanna ke'nanga, punna anggappai buku tau, lanasarei pammatei sa'rinna, sollanna nacini' patarawanga nampa natarawang anjo buku taua ri Ka'bung Pasukang Gog.

¹⁶Kammami anjo carana nanitangkasi anjo pa'rasanganga battu ri kara'massanga. (Ri allo ri boko, anjoreng ri ka'bunga lania' kota niarenga sangkamma Pasukang Gog.)”

¹⁷ Nakana Batara Kaminang Tinggia ri nakke, “He tau, kioki sikontu jangang-janganga siagang olo'-olo' maraengannaya, sollanna nia' battu ri kere-keremae untu' angkanrei koro'bang Kupasadiakangi ke'nanga. LapparekKa' passua'-suarrang lompo ri daera moncong-monconna Israel; anjorengi ke'nanga akkulle angnganre dageng siagang angnginung cera'.

¹⁸Akkullei ke'nanga angnganre maya'-maya' pasukang tu barani, angnginungi cera'na sikamma pamarentaya ri lino. Anjo sikamma pasukanga siagang pamarentaya lanibunoi sanrapang bembe laki yareka ana'-ana' bembe, yareka sapi-sapi liara' co'moka.

¹⁹Punna le'baki Kubuno sikamma anjo taua rapang koro'bang, sikamma jangang-janganga siagang olo'-olo' maraengannaya lanakanrei sikontu jannana sa'genna takkoa'; kammayatompa lanainungi cera'na sa'genna nasa'ring.

²⁰Ri mejangKu akkullei ke'nanga nabassori battanna siagang sikontu tau a'jaranga siagang jaranna, kammayatompa sikontu pasukang tu baranina. INakke, Batara Kaminang Tinggia, anne akkana.”

²¹Nakana Batara, “LaKuparhatikangi kala'birangKu mae ri bansa-bansaya. Lanacini' ngasengi ke'nanga antekamma bateKu ampakei kakoasangKu untu' ampa'rupai kaputusang-kaputusangKu adeleka.

²²Appakkaramula anjo wattua lanaassemmi tu Israel angkanaya iNakkemi Karaeng Allata'alana ke'nanga.

²³Siagang sikontu bansaya lasadara' ngasemmi angkanaya tu Israel nikiringi mae ri butta pammelakkanga lanri dorakai ke'nanga mae ri Nakke. Kubokoimi ke'nanga siagang Kubalang parekangi nibeta ri musunna kammayatompa nibuno lalang pa'bundukang.

²⁴Kugaukangi mae ri ke'nanga simbattala' siagang kara'massang siagang kaja'dallanna ke'nanga, nampa Kubokoi ke'nanga.”

²⁵Nakana Batara Kaminang Tinggia, “Mingka kamma-kamma anne laKukamaseangi umma' Israel jari-jarina Yakub, siagang Kupa'jari kalumanynyang poleangi ke'nanga. Lanri kammana anjo Kujagaimi arengKu sollanna tuli nipakalompo.

²⁶Punna sannangi pole ke'nanga ammantang ri pa'rasangang kalenna, tena manna sitau lakkulle anggarattaki ke'nanga; jari lanakaluppaimi ke'nanga antekamma batena le'ba' nipakasiri' ke'nanga lanri dorakana mae ri Nakke.

²⁷LaKuerangi ke'nanga ammotere' battu ri sikamma pa'rasanganna musunna ke'nanga, siagang la'nassami katangkassangKu mae ri sikontu bansaya, lanri sikamma anjo panggaukangKu.

²⁸Jari naassemmi ummakKu angkanaya iNakkemi Karaeng Allata'alana ke'nanga. Nasaba' iNakke angkiringi ke'nanga mange ri butta pammelakkanga, mingka iNakke todong angngerangi ke'nanga ammotere' mange ri pa'rasangang kalenna ke'nanga, natena manna sitau battu ri ke'nanga nibokoi anjoreng.

²⁹LaKupantamaki RohKu antama ri bansa Israel, siagang tenamo nalanibokoi pole ke'nanga. INakke, Batara Kaminang Tinggia, anne akkana.”