Read Makassar Version – KITTA' MATANGKASA YEHEZKIEL 4 Bible Online

YEHEZKIEL 4 - Makassar Version – KITTA' MATANGKASA bible

YEHEZKIEL 4

¹Nakana Allata'ala, “He tau, angngalleko se're batu bata, padongkoki ri dallekannu siagang gambaraki rate gambara'na kota Yerusalem.

²Nampa gambaraki se're garisi' angkurungi anjo kotaya, iamintu garisi'-garisi' solongang, butta-butta pannambungi, kema-kema siagang pakkakasa' untu' panrumbang, ri tammulilina tembo'-tembo' kalli'na.

³Angngalleko panci bassi siagang rapammi anjo rinring bassi; padongkoki anjo pancia ri alla'nu siagang kota Yerusalem. Nampa a'dalle' mangeko ri anjo kotaya, sanrapang angkana ikau angkurungi. Iaminjo la'jari pangngebarang mange ri bansa Israel.

⁴Nampa tinro tattiling maeko ri kairi, siagang laKupitujuiko kasalanna bansa Israel. Lattinro kammako anjo 390 allo sallona siagang lasessako lanri kasalanna ke'nanga. Punna sialloko attinro kamma anjo, battuanna sitaung hukkungang mae ri bansa Israel.

⁶Le'baki anjo anggiling maekoseng ri kanang siagang nukasiaki hukkunganga lanri kasalanna Yehuda patampulo allo sallona, siallo a'jari pangngebarang sitaung hukkungang mae ri ke'nanga.

⁷Ciniki anjo pakkurunga ri Yerusalem. Patantangi panja'guru'nu mae ri anjo kotaya siagang pabattui pasangKu ri passala'na hukkunganga mae ri ke'nanga.

⁸LaKusikkokko sa'genna takkulleako anggilingi kalennu battu ri kairi mae ri kanang yareka kabalekanna, sa'genna le'ba' anjo pakkurunga.

⁹Kamma-kamma anne angngalleko gandung, jelai, campe' eja, campe' biasa, battang siagang gandung alusu'. Pasileo' ngasengi anjo nampa nupare' roti. Iaminjo a'jari kanrenu lalang 390 allo attinro tattiling mae ri kairi.

¹⁰Anjo rotia musti nubage bajiki sa'genna tunggala' allo nukanrei 230 garang. Takkulleai la'bi.

¹¹Manna je'ne' inunnu takkulleai la'bi ri ruang cangkiri'.

¹²Apparekko pepe' battu ri tai tau untu' a'jari sambe kayu tunuang. Langgai rotinu irate ri anjo pepeka siagang kanrei anjo rotia ri dallekanna sikontu taua.”

¹³Nakana Batara, “Kammaminjo carana sallang tu Israel angkanrei kanre nipappisangkanga ri hukkung napassareanga Musa, ri wattunna Kupela' ke'nanga mange ri pa'rasangang maraenga.”

¹⁴Mingka appialia' angkana, “Aduh, Batara Kaminang Tinggia! Battu ri ca'diku sa'genna kamma-kamma anne, tale'bakai kura'massi kalengku siagang kanre battua ri olo'-olo' matea yareka sesanna olo'-olo' sekkeka. Tale'baka' angnganre kanre nikanaya harang.”

¹⁵Jari Nakanamo Allata'ala, “Baji'mi. Salaku sambenna tai taua, akkulleko ammake tai sapi untu' antunui rotinu.”

¹⁶Nampa Nakana pole, “He tau, laKupanraki sikamma parsadiaang kanre-kanreanga ri Yerusalem. Lussaki siagang ranggaselai taua nanaukkuru'mo kanre nakanrea ke'nanga siagang je'ne' nainunga ke'nanga.

¹⁷Latappu' panrannuangi ke'nanga lanri kala'busangi ri roti siagang je'ne', nampa kale'bakkanna lamatei ke'nanga lanri dosa-dosana.”