Read Makassar Version – KITTA' MATANGKASA YEHEZKIEL 42 Bible Online

YEHEZKIEL 42 - Makassar Version – KITTA' MATANGKASA bible

YEHEZKIEL 42

¹Nampa naeranga' anjo tu bura'nea mange ri paranglakkeng bageang pantarang na narurunganga' mange ri bangunang maraeng ri bageang wara'na Balla'Na Batara, tena nabella battu ri bangunang lompoa ri bageang ilau'na anjo Balla'Na Batara.

²Anjo bangunanga la'buna 50 metere', nampa sangkara'na 25 metere'.

³Se're sa'rinna anjo bangunanga a'dalle' mangei ri baruga sampuloa metere' sangkara'na, nampa sa'ri maraenna a'dalle' mangei ri dapara' batu ri paranglakkeng bageang pantaraka. Anjo bangunanga attingka' tallui: tunggala' tingkaka antamakkangi sike'de' na tingka' bageang irawanganna.

⁴Ri dallekanna anjo sikamma kamaraka, ilalanganna nia' lorong 5 metere' sangkara'na na 50 metere' la'buna. Sikamma pakke'bu'na a'dalle' waraki.

⁵Sikamma kamara' ri tingka' ratea la'bi ca'diangngangi na sikamma kamara' ri tingka' rawanganna, nasaba' lorong-lorong ri dallekanna sikamma kamara' iratea la'bi lompoangngangi naia lorong irawanganna.

⁶Sikamma anjo kamaraka attingka' tallui siagang tena nanitumpaki ri benteng sangkamma bangunang-bangunang niaka ri paranglakkenga.

⁷Tawaruanna tingka' bageang rawaya, 25 metere' poro tembo' biasaji bawang, nampa tawaruanna maraenga, iamintu 25 metere' todong, nibangungi kamara'-kamara'. Ri tingka' kaminang iratea nia' kamara'-kamara' ri sikamma la'buna anjo bangunanga.

⁹Irawanganna kamara'-kamara' ri cappa' rayana anne bangunanga, ri bageang pakaramulanna temboka, nia' se're pakke'bu' a'lampa mange ri paranglakkeng bageang pantaraka. Ri sa'ri bageang timboro'na Balla'Na Batara, nia' bangunang assangkamma-kamma, tena nabella pammantanganna battu ri bangunang bageang laukanga.

¹¹Ri dallekang sikamma kamara'na nia' lorong sangkammaya lorong niaka bageang wara'. Ukkuranna siagang modele'na kammayatompa sikamma pakke'bu'na sangkamma kabusuki.

¹²Irawanganna kamara'-kamara' ri sa'ri timborang, iamintu cappa' irayana pakaramulanna temboka, nia' todong se're pakke'bu'.

¹³Nakana anjo tu bura'nea ri nakke, “Anjo ruaya bangunang matangkasaki. Anjoreng, sikamma imanga akkulle andallekang ri kahaderanNa Batara, angnganre koro'bang kaminang matangkasaka. Anjoreng tommi musti natampakkang ke'nanga sikamma koro'bang kaminang matangkasaka, iamintu: koro'bang gandung siagang koro'bang pannangkasi dosa yareka koro'bang sambe karugiang.

¹⁴Punna le'ba' imanga anggaukangi tugasa'na ri Balla'Na Batara, siagang eroki a'lampa mange ri paranglakkeng bageang pantaranga, anjo pakeang tassa'la' napakea ke'nanga wattu allayani ri ibadaya, musti naboliki ke'nanga ri sikamma anjo kamaraka. Musti ammakei ke'nanga pakeang maraeng; le'baki anjo nampami ke'nanga akkulle a'lampa mange ri tampa'na ra'yaka a'rappung.”

¹⁵Le'baki anjo tu bura'nea naukkuru' bangunanna Balla'Na Batara bageang lalanga, naeramma' assulu' allalo ri pakke'bu' lompo bageang iraya, nampa naukkuru' bageang tammulilina Balla'Na Batara.

¹⁶Takkang pa'baku'na napake angngukkuruki sa'ri bageang rayana: 250 metere'.

¹⁷Nampa naukkuru' sa'ri bageang wara'na, sa'ri bageang timboro'na, siagang sa'ri bageang ilau'na; tunggala' sa'ria sangkamma kabusuki la'buna, iamintu 250 metere'.

²⁰Jari, tampa' antamaya ri daerana Balla'Na Batara, iamintu appa' pasagi, 250 metere' ri tunggala' sa'rinna. Anjo tampaka nikulilingi ri se'reang tembo' untu' ansimbangi daera nisa'laka untu' Batara battu ri daerana tau jaia.