Read Makassar Version – KITTA' MATANGKASA YEHEZKIEL 45 Bible Online

YEHEZKIEL 45 - Makassar Version – KITTA' MATANGKASA bible

YEHEZKIEL 45

¹Ri tenanapa nibage-bagei anjo buttaya untu' a'jari butta pisaka mae ri tunggala' sukua, musti nisa'laki se're bageang untu' Batara. La'buna anjo tampaka musti 12,5 kilometere', siagang sangkara'na 10 kilometere'. Sikontu anjo tampaka nipa'jari matangkasaki.

²Untu' Balla'Na Batara, nipasadiai sipa'gang anjo tampaka, iamintu appa' pasagi, sa'rinna massing-massing 250 metere', siagang nikulilingi ri parang 25 metere' sangkara'na siagang anjoremmi musti nipaenteng Balla'Na Batara.

³Tawaruanna anjo tampaka, iamintu la'buna 12,5 kilometere' siagang sangkara'na 5 kilometere', musti nipasadiai untu' ambangungi Balla'Na Batara, iamintu tampa' kaminang matangkasaka.

⁴Anjo tampaka matangkasaki, siagang nipasadiai untu' sikamma imang tugasaka anggaukangi ibadaya ri Balla'Na Batara. Sipa'gang battu ri anjo tampaka la'jari tampa' untu' balla'na ke'nanga, na sipa'gang pole untu' Balla'Na Batara.

⁵Sipa'gang pole battu ri anjo tampaka iamintu 12,5 kilometere' la'buna siagang 5 kilometere' sangkara'na musti nipasadiai untu' tu Lewi anjamaya lalang ri Balla'Na Batara. Anjorengi lanibangung kota-kota akkullea napammantangngi ke'nanga.

⁶Pantaranganna anjo tampa' matangkasaka, musti nia' todong nisa'la' tampa' 12,5 kilometere' la'buna siagang 2,5 kilometere' sangkara'na untu' se're kota akkullea napammantangngi inai-nai mamo battua ri bansa Israel.

⁷Untu' patugasa' pamarentaya musti nipasadiang tongi tampa'. Anjo tampaka a'la'baki battu ri pa'baeng-baeng bageang lau'na tampa' nisa'laka untu' Batara, sa'genna mange ri Tamparang Tangngaya, siagang battu ri pa'baeng-baeng bageang rayana anjo tampa' nisa'laka untu' Batara sa'genna pa'baeng-baeng irayana anjo pa'rasanganga. Jari la'buna sangkammai siagang la'buna tampa' nipassareanga mae ri kalase'renna suku-suku bansa Israel.

⁸Anjo tampaka a'jari napatangi sikamma patugasa' pamarentaya ri Israel, sollanna tenamo najallakkangi ummakKu, passangalinna napassareangi anjo tampa' la'binnaya untu' a'jari napatang suku-suku Israel.

⁹Nakana Batara Kaminang Tinggia, “He sikamma patugasa' pamarentana Israel, angganna'mi dosa-dosanu! Pamarimi anjo tindakannu appaero'-eroka siagang anjallakkangai ra'yaka. Gaukammi apa annabaya siagang adeleka. Tea sikaliko bongkai pole ummakKu battu ri tampa'na ke'nanga. INakke, Batara Kaminang Tinggia, amparentakangi anjo mae ri kau.

¹⁰ Pakei timbangang siagang pa'baku' annabaya:

¹¹Se're efa' untu' a'baku apa-apa kalotoroka musti sangkammai bonena siagang se're bat untu' ambakuki apa-apa assolonga. Patokanna iamintu musti se're homer. Jari, anjo sikamma pa'bakuka musti kammai anne: 1 homer = 10 efa' = 10 bat.

¹²Timbangannu musti kammai anne: 1 sikal = 20 gera 1 mina = 60 sikal

¹³Iaminne dasara'na ukkuranga untu' ampattantui sikamma gandung passarea: gandung: 1/60 bageang battu ri wassele' alle polenu jawawut: 1/60 bageang battu ri wassele' alle polenu minynya' zaitun: 1/100 bageang battu ri wassele' poko'-pokoka. (Ukkuruki situru' ukkurang bat: 10 bat = 1 homer = 1 kor) gimbala': 1 gimbala' battu ri 200 kayunna gimbala' Musti assareko koro'bang gandung, koro'bang nitunu siagang koro'bang passiamakkang, sollanna nanipammopporang dosa-dosanu. INakke, Batara Kaminang Tinggia ampassareangi anne parentaya.

¹⁶Sikontu pandudu'na pa'rasanganga musti naerangi anjo sikamma passarea mae ri patugasa' ammarentaya ri Israel.

¹⁷Iami musti ammalli olo'-olo' untu' koro'bang nitunu siagang bahang-bahang untu' koro'bang gandung siagang koro'bang anggoro' untu' sikontu bansa Israel ri allo-allo lompoa, iamintu allo lompo Bulang Beru, allo Pammari-mariang, siagang allo lompo maraengannaya. Musti appasadiai koro'bang untu' pammopporang dosa, koro'bang gandung, koro'bang nitunu, siagang koro'bang passiamakkang untu' appala' popporo' lanri ri dosana bansa Israel.”

¹⁸Nakana Batara Kaminang Tinggia ri umma'Na, “Ri tanggala' se're bulang se're, musti nutangkasi BallakKu na nuassare sikayu sapi laki rungka, ia tenaya caca'na.

¹⁹Imanga musti naallei cera'na anjo koro'bang pannangkasi dosaya, nampa napasapu ri sikamma pakke'bu'na BallakKu, kammayatompa ri appa' panyingkulu'na tampa' pakkoro'bangnganga siagang ri benteng-benteng pakke'bu' lompo a'lampa mangea ri paranglakkeng bageang lalanga.

²⁰Gaukang tongi kammaya anjo ri tanggala' tuju anjo bulanga, untu' sikamma tau le'baka a'gau' dosa mingka tena nakunjungi yareka tena naassengi. Kammami anjo caranu nanujagaimo katangkassanna BallakKu.

²¹ Ri tanggala' sampulo angngappa' bulang se're, musti nupakalompoi Allo Passua'-suarranna Paskaya. Tuju allo sikontu taua musti angnganrei roti tenaya nammake pa'gambang.

²²Ri allo makase'rea, patugasa' pamarentaya musti assarei sikayu sapi laki untu' koro'bang pannangkasi dosa mae ri kalenna siagang mae ri sikontu ra'yaka.

²³Lalang nigaukanna anjo passua'-suarranga, lalang tuju allo sallona, tunggala' allo musti assarei mae ri Batara tuju kayu sapi laki siagang tuju kayu gimbala' laki ia tenaya caca'na nampa natunu akkayu. Tunggala' allo musti assare tongi sikayu bembe laki untu' koro'bang pammopporang dosa.

²⁴Pantaranganna anjo, musti nipassareang tongi gandung 17,5 litere' untu' tassikayua sapi laki, siagang 3 litere' minynya' zaitun untu' tassikayua gimbala' laki.

²⁵ Ri passua'-suarrang allo lompo Pa'ballakang Leko'-leko', ia nipakaramulaya ri tanggala' sampulo allima bulang tuju, tunggala' allo lalang tuju allo sikamma patugasaka musti assarei koro'bang sangkamma, iamintu koro'bang pammopporang dosa, koro'bang nitunu, koro'bang gandung siagang minynya' zaitun.”