Read Makassar Version – KITTA' MATANGKASA YEHEZKIEL 6 Bible Online

YEHEZKIEL 6 - Makassar Version – KITTA' MATANGKASA bible

YEHEZKIEL 6

¹Nakana Batara ri nakke,

²“He tau, ciniki moncong-moncong niaka ri Israel, siagang pabattui pasangku ri passala'na hukkungangKu mae ri ke'nanga.

³Suroi ke'nanga ampilangngeri siagang amparhatikangi apa Kupaua, iNakke, Batara Kaminang Tinggia, mae ri anjo moncong-monconga, kammayatompa mae ri sikamma bontoa, sikamma tubirika siagang sikamma lappara'na ka'bunga. Tojeng, lappabattuA' pa'dang untu' angngancuruki tampa'-tampa' panynyombanga ri barhalaya.

⁴LaKurumbangi tampa'-tampa' pakkoro'bangnganna ke'nanga siagang laKureppe'-reppeki sikamma pa'dupaanna. Sikontu tau niaka anjoreng lanibunoi ri dallekanna barhalana.

⁵Lakupatassiaraki maya'-maya'na tu Israel; siagang buku-bukunna ke'nanga laKupabene-benei ri tammulilina anjo tampa'-tampa' pakkoro'bangnganga.

⁶Sikontu kota Israel laniancuruki, sikontu tampa' pakkoro'bangnganga siagang barhalaya lalicaki, sikamma pa'dupaanna latassimbung-simbungi, kammayatompa sikamma apa napareka ke'nanga latappelaki.

⁷Kemae-kemae nia' tau nibuno, na sikamma tau salamaka lanaassemmi angkanaya iNakke Batara.

⁸Nia' tena siapa jaina battu ri ke'nanga laKupata'lappasa' battu ri anjo pammunoanga mingka laKupasisa'la'-sa'laki ke'nanga mange ri alla'na bansa-bansaya;

⁹anjorengi ke'nanga lattallasa' ri pa'rasangang pammelakkanga. Nampa lamangngu'rangi ke'nanga mae ri Nakke, kammayatompa lanapahangi angkanaya iNakke anghukkungi siagang ampakatunai ke'nanga, lanri tenana namajarre' pa'mai'na ke'nanga mae ri Nakke. Le'ba'Ma' nabokoi ke'nanga nampa napilei barhalaya salaku sambengKu. Nampa lalanre kalenna ke'nanga mae ri kalenna lanri anjo sikontu kaja'dallang siagang kakodiang le'baka nagaukang ke'nanga.

¹⁰Jari lanaassemmi ke'nanga angkanaya iNakke Batara siagang sikontu anjo pappakainga' le'baka Kupabattuangi ke'nanga, teai poro kana-kana panggaratta' tenaya bonena.”

¹¹Nakana Batara Kaminang Tinggia, “Si'na mako! Angngarrukko! Angngarrukko pacce pa'mai'nu lanri sikontu kaja'dallang siagang kakodiang le'baka nagaukang bansa Israel. Lamatei ke'nanga lanri pa'bundukang, kacipurang siagang garring.

¹²Lanakasia' ngasengi ke'nanga jallo'na kalarroangKu. Sikamma tau bellaya ri butta pammelakkanga latu'guru' garringi nampa mate; tau ambania lamatei lalang bundu', siagang la'binnaya lamate naallei garring.

¹³Sikamma maya'-maya'na latassiaraki ri alla'-alla'na barhalaya siagang ri tammulilina tampa'-tampa' koro'banga, ta'lapara' ri tunggala' bulu' tinggia, ri coppo'na monconga, irawanganna poko'-poko' kayu copponga leko'na siagang poko'-poko' kayu lompoa; bodona kana, kemae-kemae ke'nanga attunu koro'bang untu' barhalana ke'nanga. Jari tunggala' taua lanaassengi angkanaya iNakkemi Batara.

¹⁴Iyo, iNakke langngangkaki nai' limangKu nampa Kuancuru' pa'rasanganna ke'nanga, sa'genna a'jari sino dudu, appakkaramula battu ri parang niaka bageang timboro' sa'genna mange ri kota Ribla ri bageang wara'. Battu ri sikontu tampa'-tampa' napammantangngia tu Israel, tena manna se're lanipasalama'. Jari naassemmi sikontu taua angkanaya iNakkemi Batara.”