Read Makassar Version – KITTA' MATANGKASA YEHEZKIEL 7 Bible Online

YEHEZKIEL 7 - Makassar Version – KITTA' MATANGKASA bible

YEHEZKIEL 7

¹Nakana Batara ri nakke,

²“He tau, iNakke, Batara Kaminang Tinggia, eroki Kupabattu anne mae ri butta Israel angkana: Iaminne kala'busanna riwaya'na sikontu anne pa'rasanganga!”

³Nakana Batara, “He Israel, kamma-kamma anne narapi'mi wattu kale'bakkannu. Lanupisa'ringi pangngalarroingKu. Kuadeliko situru' panggaukannu kodia.

⁴Tena nalaKukamaseangko yareka tena nalaKupammopporangko. LaKuhukkungko situru' sikontu kakodiang le'baka nugaukang. Jari nuassemmi angkanaya iNakkemi Batara.”

⁵Iaminne Napaua Batara Kaminang Tinggia mae ri bansa Israel, “A'le'basaki balaya tuli labattu antujuko.

⁶Kamma-kamma anne sikontu-kontuna narapi'mi kala'busanna. Iaminne kale'bakkannu. Tenamo panrannuang mae ri kau.

⁷Sikontu-kontuna kala'busannami mae ri kau, he bansa niaka ammantang anrinni ri buttaya. Kamma-kamma anne tenamo pa'gaukang passua'-suarrang ri tampa' pakkorobangngang ri moncong-monconga, mingka ia niaka poro karicuang mami.

⁸Tasalloami nanukasia' pangngalarroi lompoKu. LaKuadeliko situru' panggaukannu. LaKubalasaki mae ri kau sikontu panggaukang kodinu.

⁹Tena nalaKukamaseangko yareka tena nalaKupammopporangko. LaKuhukkungko situru' sikontu panggaukang kodi le'baka nugaukang. Jari nuassemmi angkanaya iNakke Batara siagang iNakke anghukkungko.”

¹⁰Battumi allo angngeranga bala mae ri Israel. Kajariammi ri kemae-kemae gau' pallaka. Katampoanga narapi'mi pamangeanna.

¹¹Kasekkekanga pila' lappakajai kaja'dallang. Sikontu kakalumanynyangnganga, kalompoanga siagang kaporeanga ia niaka ri ke'nanga lala'busuki tena sikali bate-batena.

¹²Tasalloami nanarapi' wattunna, a'reppese'mi allonna! Tau ammallia siagang tau a'baluka tanggappayami passawallang apa-apa, lanri sikontuna taua lanituju ngasengi ri hukkunganNa Allata'ala.

¹³Tena padanggang langgappai ammotere' apa le'baka nabalukang, nasaba' manna inai lanituju ngasengi ri pangngalarroinNa Allata'ala. Tau ja'dalaka tena nalasalama'.

¹⁴Assa'rai tarompeka siagang sadia-sadia ngasemmi taua. Mingka tena manna sitau la'lampa mange ri tampa' pa'bundukanga, lanri sikontu taua nituju kabusuki ri pangngalarroinNa Allata'ala.

¹⁵Ri agang-agang niaka ri kotaya nia' pa'bundukang, ri sikamma ballaka nia' garring siagang kacipurang. Inai mamo nia' ri pantaranganna kotaya lamatei lalang pa'bundukang, siagang ammantanga ri kotaya lamatei lanri garring siagang kacipurang.

¹⁶Nia' sipa'gang lata'lappasa' nampa lari naiki ri pa'bulukanga. Anjoreng lasanrapangi ke'nanga jangang-jangang pune-pune nibongkaya battu ri ka'bunga; kabusu'na lakkunrarengi pa'risi' lanri dosa-dosana ke'nanga.

¹⁷Tunggala' taua la'jari lamma kabusuki limanna siagang annekkereki kulantu'na.

¹⁸Lammakei ke'nanga kaeng karung siagang lannekkereki sibatu kale. Lanigondoloki ulunna ke'nanga siagang lanipakasiriki ke'nanga.

¹⁹Bulaenga siagang peraka lanapelaki ke'nanga ri aganga rapang loro, nasaba' ri allo napa'bettese'na kalarroanNa Batara, anjo bulaenga siagang peraka takkulleai ampasalamaki ke'nanga, ba'lalo ia ngasemmi anjo angngerangi ke'nanga mae ri dosaya. Takkulleai napake ke'nanga untu' ampassukkuki cinnana yareka ambonei battanna ke'nanga.

²⁰Riolo nakalompoang pa'maiki paramata ga'gana ke'nanga, mingka lanri napakena ke'nanga untu' appare' barhala-barhala appakaringi'-ringi', Napa'jarimi Batara anjo barang-barang kammaya appakamalla'-malla'.

²¹Nakana Batara ri bansa Israel, “LaKulappassangi bansa maraenga angngellakko. Sikamma tau ja'dalaka lanarampasaki barang-barannu nampa nara'massi.

²²Tena apa-apa laKugaukang punna napanraki siagang narantassi BallakKu ri sikamma paellaka.

²³Sikontu pa'rasanganga a'jari ricui; kemae-kemae nia' pammunoang siagang kapallakkang.

²⁴Bansa-bansa kaminang sekkeka laKupabattui untu' angngempoi sikamma balla'nu. Sikamma tau porenu kaminang barania la'jari mallaki punna Kulappassang anjo bansa-bansaya angngancuruki tampa'-tampa' ibadanu.

²⁵Nitujui ke'nanga ri kasusaang siagang tappu' panrannuang, nampa a'boya kaamangngang, mingka tanagappayai ke'nanga.

²⁶Balaya siagang kabara' kodia tenammarina tulusu' labattu. Nupalaki mae ri na'binu sollanna akkulle ke'nanga antappui lalang paccini'na ke'nanga, mingka tena todong nakkulle ke'nanga. Kammayatompa sikamma imanga tenamo apa-apa lakkulle napangngajarrang mae ri ummaka, siagang sikamma pamimpinga kala'busammi ri kana-kana untu' pappakainga'.

²⁷Lappiraungi karaenga, tappu' panrannuangi ana' bura'nena karaenga siagang lannekkereki napakamma malla' ra'yaka. LaKuhukkungko situru' sikontu panggaukannu, kammayatompa Kuadeliko sangkamma batenu angngadeli parannu tau. Jari lanuassemmi angkanaya iNakke Batara.”