Read Makassar Version – KITTA' MATANGKASA YEHEZKIEL 8 Bible Online

YEHEZKIEL 8 - Makassar Version – KITTA' MATANGKASA bible

YEHEZKIEL 8

¹Ri tanggala' lima bulang annang lalang taung makaannang ri wattu pammelakkanga, sikamma pamimpinna tu Yehuda nipelaka battui ri ballakku nakusipammempo-mempoang. Ti'ring battumi kakoasanNa Batara Kaminang Tinggia angkoasai kalengku.

² Accongama' nai' nampa nia'mo kucini' apa kamma tau. Battu ri aya'na a'lampa naung kammai nicini' pepe', nampa battu ri aya'na a'lampa nai' accilla'-cillaki nicini' sangkamma tambaga nikesoka.

³Appajonjomi sangkamma kucini' lima tau, nampa nata'gala' poto' uukku; nampa niangka' kucini' kalengku tinggi nai' ri allaka ri RohNa Allata'ala siagang nierang mange ri Balla'na Batara ri Yerusalem, ri pakke'bu' antamakkanga ri paranglakkeng lalangngang bageang waraka. Anjoreng nia' patung barhala ampabattuai larroNa Allata'ala.

⁴ Nampa nia' kucini' singara' accilla' pammatei kahaderanNa Allata'alana Israel, sangkamma kucinika ri wattungku nia' ri birinna Binanga Kebar.

⁵Nakana Allata'ala ri nakke, “He tau, accinikko wara'.” Amminawang turu'ma', nampa kucini'mo ri ba'leanna tampa' pakkoro'bangngang ri ampi'na oloang antamaya, iamintu barhala ampabattuai pangngalarroinNa anjo Allata'ala.

⁶Nakana Allata'ala ri nakke, “He tau, apa nucini' kajariang? Parhatikangi sikamma panggaukang appakaringi' nagaukanga tu Israel, ampakabellaiA' battu ri BallakKu! Maeko, laKupicinikiangko apa-apa la'bi kodiangnganga pole.”

⁷Nampa nieranga' mange ri pakke'bu' antamakkanga ri paranglakkeng bageang pantaranga siagang nipicinikiamma' se're so'bolo' ri temboka.

⁸Nakana, “He tau, pakaluaraki anjo so'boloka.” Le'baki kugaukang anjo nipassuroanga, nia'mo kucini' se're pakke'bu'.

⁹Nakanamo ri nakke, “Antamakko siagang cinikimi sikamma panggaukang kodi siagang appakaringi' nagaukanga ke'nanga anjoreng.”

¹⁰Jari antamama' nampa kuciniki. Rinring-rinrinna anjo kamaraka niukiriki siagang sangka' rupa ulara' kammayatompa olo'-olo' harang maraengannaya, siagang sangka' rupa ukirang barhala nasombaya tu Israel.

¹¹Tujupulo pamimping tu Israel nia' anjoreng, kammayami Yaazanya ana'na Safan. Massing anna'galaki ke'nanga se're pa'dupang a'rumbua umbunna.

¹²Nakana Allata'ala ri nakke, “He tau, nuciniki apa nagaukang cokko-cokkoa sikamma pamimpinna tu Israel? Anynyombai ke'nanga lalang ri kamara' rassia siagang barhala; lanri nakana kalenna ke'nanga Kubokoimi anne pa'rasanganga siagang tenamo naKuciniki panggaukanna ke'nanga.”

¹³Nampa Nakana Batara ri nakke, “Lanuciniki pole ke'nanga nagaukang apa la'bi appakaringi'-ringika.”

¹⁴Nampa nieranga' a'lampa mange ri pakke'bu' lompo bageang wara'na Balla'Na Batara siagang Napicinikiamma' sikamma bai'-baine angkarrukiai kamateanna Rewata Tamus.

¹⁵Akkuta'nangi Batara ri nakke angkana, “He tau, nuciniki anjo passalaka? Jai pole la'bi appakaringi'-ringikangnganga.”

¹⁶Nieramma' mange ri paranglakkeng bageang lalangnganna Balla'Na Batara. Ri ampi'na pakke'bu' antamaya ri kamara' matangkasaka, ri alla'na tampa' pakkoro'bangnganga siagang loronga, nia' tau ruampulo allima jaina. Nabokoi ke'nanga kamara' matangkasaka, siagang su'juki ke'nanga a'dalle' anrai' anynyomba mae ri mataallo ammumbaya.

¹⁷Nakana Batara ri nakke, “He tau, nuciniki anjo mae? Anne tu Yehuda tenapa nasangga nasa'ring punna iaja anjo bawang apa appakaringi'-ringika nagaukang siagang panggaukang-panggaukang tenaya pangngamaseanna ri sikontu pa'rasanganga. Ba'lalo nagaukang tongi ke'nanga anrinni, lalang ri BallakKu siagang pila' natambai pole larroKu. Ciniki antekamma batena ke'nanga anghinA', ta'liwaka kodina.

¹⁸Lanapisa'ringi ke'nanga pangngalarroi lompoKu! Tena nalaKumaapakkang siagang laKupammopporang ke'nanga. Manna pole na'gora-gora lompo tojeng ke'nanga appala' doang ri Nakke, tena nalaKupilangngeri ke'nanga!”