Read Makassar Version – KITTA' MATANGKASA DANIEL 11 Bible Online

DANIEL 11 - Makassar Version – KITTA' MATANGKASA bible

DANIEL 11

¹Iami nisare tugasa' untu' ambantua' siagang angngalleia' ri taung makase're pamarentahanna Darius, anjo tu Media.

²Siagang anjo apa lakupaua mae ri kau kammatojengi.” Nakana anjo malaekaka, “Tallu karaeng maraeng lammarenta ri Persia, nipinawang ri karaeng makaappa', iamintu la'bi kalumanynyanga na maraengannaya. Ri coppo' kakoasanna siagang kakalumanynyangnganna, la'gassing-gassingangi siagang kakaraengang Yunani.

³Nampa lania' ammumba sitau karaeng pore. Lammarentai se're kakaraengang lompo siagang lappaero'-eroki appanggaukang.

⁴Mingka ri coppo' kaporeanna, lareppeki siagang ta'bage-bagei kakaraenganna a'jari appa' bageang. Karaeng-karaeng teai jari-jarina lammarenta ansambeangi, siagang tena nasangkamma ia kagassinganna ke'nanga.

⁵Karaeng ri bageang timboroka la'jari kassa'. Mingka kalase'renna battu ri panglima-panglimana la'jari kassakangngang naia, siagang lammarentai ri kakaraengang lompoanganga pole.

⁶Siapa are taung ribokoanganna lanapakase'rei kalenna karaeng niaka ri bageang timboro' siagang karaeng niaka bageang wara', siagang napa'buntingi ana'na bainea siagang anjo karaeng ri pa'rasangang bageang waraka. Mingka tena nattahang anjo kakaraengang ampakase'reai kalenna. Anjo ana' bainea lanibunoi, kammayatompa bura'nenna, ana'na siagang ata-atanna niaka anrurungangi.

⁷Tasalloai le'ba'na anjo, nia' sitau assibijaya siagang anjo bainea a'jari karaeng. Lanabunduki tantarana karaeng battua ri anjo pa'rasangang waraka, namajui pattahanganna sa'genna nabeta.

⁸Ri wattunna ammotere' mange ri Mesir, lanaerangi patunna rewatana musunna siagang pakkakasa' bulaeng siagang pera' le'baka nipassareang mae ri anjo rewataya. Siapa are taung sallona tena nalanabunduki karaenna anjo pa'rasangang waraka.

⁹Nampa la'bakka anjo karaeng battua ri anjo pa'rasangang bageang waraka mange ambunduki anjo pa'rasangang bageang timboroka; mingka nitunrungi sa'genna nipaono' boko, nampa ammotere' mange ri pa'rasangang kalenna.

¹⁰Nampa ana'-ana' bura'nena anjo karaeng niaka ri pa'rasangang wara' lasadia-sadiai untu' a'bundu'; appasadiami tantara jai. Kalase'renna battu ri ke'nanga lamaju rapang a'ba. Lalang a'bakka makapinruanna nabunduki pattahanganna musua.

¹¹Jari larromi karaenna anjo pa'rasangang timboroka; majumi a'lampa ambunduki anjo karaenna pa'rasangang waraka. Na nabetamo anjo tantara jai nipagioka ri karaeng pa'rasangang waraka.

¹²Nampa la'jari tampomo lanri ammetana siagang lanri jaina musu nabuno; mingka tena natulusu' lakoasa.

¹³Makapinruanna karaeng pa'rasangang waraka lappasadiai pasukang lompo, ba'lalo la'bi lompoangngang naanjo rioloa. Punna narapi' wattunna, la'gioki maju siagang pasukang lompo kammayatompa jai sikalia pakkakasa' bundu'na.

¹⁴Najaimo tau langngewa ri anjo karaeng pa'rasangang timboroka. Siapa are tau palla' battu ri bansanu, Daniel, langngewa tongi lanri le'ba'na anggappa paccini'. Mingka tena nalanjari pattujunna ke'nanga.

¹⁵Nampa anjo karaeng pa'rasangang waraka lanakurungi se'rea kota niaka pattahanganna nampa nabeta. Tena nalakkulle attahang tantarana pa'rasangang timboroka; manna pasukang nipilea tena todong nakkulle langngewa.

¹⁶Anjo karaeng pa'rasangang waraka lappaero'-eroki appanggaukang, nampa tena naniewai manna sike'de'. Lanaempoi tongi pa'rasangang ga'gaya nampa nakoasai kabusu'.

¹⁷Nampa anjo karaeng pa'rasangang waraka lanapasadiai sikontu tantarana untu' ambunduki pa'rasangang timboroka. Na lanri ero'na nakoasai kabusu' sikontu kakaraenganna musunna, appare'mi passitujuang siagang anjo musunna; na napa'buntimmo ana' bainena siagang anjo karaeng Mesir. Mingka anjo rancanana tena nata'rapi'.

¹⁸Le'baki anjo lanabunduki bansa-bansa niaka ri biring tamparanga, najai na nabeta. Mingka nia' sitau karaeng bansa maraeng lampamari anjo gau' appakatunana; ba'lalo lanibalasaki anjo gau' appakatunaya mae ri ia.

¹⁹Anjo karaeng pa'rasangang waraka lammotereki mange ri pattahangngang pa'rasangang kalenna, mingka lanibetai siagang tenamo kabara'na ri boko.

²⁰Lanisambeangi ri sitau karaeng, assuroai pagawena appasse're sima siagang palla'; napassai taua untu' antambai kakalumanynyangnganna kakaraenganga. Sinampe' duduji nanibunomo anjo karaenga, iamintu nibuno cokko-cokkoi, tena namate lalang ri pa'bundukang.”

²¹Nakanamo pole anjo malaekaka, “Karaeng ribokoangannaya lammarenta ri pa'rasangang wara', iamintu tau tuna siagang tenaya ha'na a'jari karaeng. Mingka tanisanna-sannayai nania' battu, siagang appareki akkala' nakkulle naalle empoang kakaraenganga.

²²Sikontu tantara angngewaya ri ia, ba'lalo manna pole Imang Lompoa lanabarrasa' kabusuki sa'genna putta.

²³Nadakkai sikamma parjanjiang beru napareka siagang bansa-bansa maraenga. Siagang lapila' katambangi kassa'na, manna pole napa'rasangang ca'diji naparenta.

²⁴Akkala' cara'de'na napake nalanabunduki daera-daera copponga ri wattu amanna nasa'ring pandudu'na. Lanagaukangi apa tenaya nale'ba' nagaukang boe-boena. Nampa lanabage-bage mae ri sikamma tau ambantuai sikamma barang nirampasaka siagang kakalumanynyangngang nagappaya lalang pa'bundukang. Lappareki akkala' untu' ambunduki pattahangngang-pattahangnganna musua, mingka tenamo nasallo nala'busu'mo wattunna.

²⁵Nampa labaranimo appasadia pasukang lompo untu' ambunduki karaeng pa'rasangang timboroka, ia sadiaya tommo untu' angngewai siagang tantara kassa' na sanna' jaina. Mingka tena nalattahang karaeng pa'rasangang timboroka lanri lanitipui.

²⁶Sikamma tumailalang kaminang a'reppeseka ri ia lantu'gurangi. Jai tantarana lanibuno, siagang lanibarrasaki sa'genna tangkasa' tantarana.

²⁷Nampa anjo ruaya karaeng lammempoi ri se'reang meja sipangnganreang, mingka ja'dalaki lalang nyawana ke'nanga, siagang massing lasiballe-ballei ke'nanga. Mingka lasalasai rancanana ke'nanga lanri tenapa narapiki wattunna.

²⁸Nampa anjo karaeng pa'rasangang waraka lammotereki mange ri pa'rasanganna angngerang barang-barang nirampasa' nagappaya. Napattantumi ri nyawana ero' angngancuruki agama napinawanga umma'Na Allata'ala. Lappaero'-eroki appanggaukang nampa ammotere' mange ri pa'rasanganna.

²⁹Siapa are wattu ribokoanganna lanabundukimi pole pa'rasangang timboroka, mingka kale'bakkanna tena nasangkamma rioloa.

³⁰Nasaba' tu Roma siagang kappala'-kappala'na laniaki battu ri Siprus; lanibunduki ri ke'nanga sa'genna a'jari sanna'mi malla'na. Nampa lammotere'mo larro sikali siagang ero'mi naancuru' agamana umma'Na Allata'ala. Lanapilangngeri pappitangara'na tau a'bokoamo battu ri anjo agamaya.

³¹ Nampa akkiring pasukang untu' anra'massi Balla'Na Batara. Lanapammari ke'nanga koro'bang allo-alloa siagang appaentengi ke'nanga apa appakamalla' sikalia, iamintu niarenga Kaja'dallang Angngancuruka.

³²Na lanri akkala' balle-ballena anjo karaenga lananyonyoki sikamma tau a'bokoamo battu ri anjo agamaya, sollanna nibantu ri ke'nanga. Mingka sikamma tau mappilangngeria ri Allata'ala barani angngewai.

³³Sikamma tau cara'de' ampimpingai ra'yaka lajai tau napa'jari pahang. Mingka untu' siapa are sallona, nia' siapa are ri ke'nanga lanibuno lanri pa'bundukang yareka lanri pepe', siagang siapa are maraengannaya laniellaki siagang lanitahangi.

³⁴Lalang kajarianna anjo pammunoanga, langgappai umma'Na Allata'ala sike'de' pannulung, mingka jai tau asse're siagang ke'nanga kalanri untu' kaparalluang kalenna bawang ke'nanga.

³⁵Sipa'gang battu ri anjo pamimping-pamimping cara'deka lanibunoi, mingka anjo kammaya a'jari paccobai mae ri umma'Na Allata'ala sollanna a'jari matangkasa' ke'nanga. Anjo kammaya lakajariangi sa'genna narapi' kala'busang jammanga, iamintu jammang le'baka Napattantu Allata'ala.

³⁶ Karaeng pa'rasangang waraka lappaero'-eroki appanggaukang. Tampoi ke'nanga nangkana angkanaya la'bi lompoangngangi kalenna namanna pole rewata battu kemae, ba'lalo la'bi lompoangngangi na Allata'ala Kaminang Tinggia. Lakkullei appanggaukang kamma anjo sa'genna kala'busang pangngalarroinNa Allata'ala. Nasaba' anjo apa le'baka Napattantu Allata'ala musti a'rupai la'bi riolo.

³⁷Anjo karaenga tena najampangi manna pole rewata battu kemae, ia nasombaya boe-boena, kammayami rewata napakalompoa tubainea. Tena najampangi anjo rewata-rewataya lanri nakanai kalenna la'bi lompoangngangi naanjo rewata-rewataya.

³⁸Kabalekanna, lanapakalompoi rewata tenaya nale'ba' nasomba boe-boena, iamintu rewata pajaga pattahanganna. Lanasarei bulaeng, pera', paramata, siagang passare maraeng tinggia anggaranna, anjo rewata tenaya nale'ba' nasomba boe-boena.

³⁹Lanapilei tau anynyombaya ri rewata maraeng, untu' ambunduki pattahangngang-pattahangngang kassaka. Inai-nai angngani anjo rewataya lanasarei kalompoang siagang empoang tinggi kammayatompa butta a'jari hadia.

⁴⁰Punna la'birimmo battu allo kala'busanna kakoasanna anjo karaeng pa'rasangang waraka, labattumi karaeng pa'rasangang timboroka untu' ambunduki. Nampa karaeng pa'rasangang waraka lanabalasaki anjo bunduka siagang kabaraniang lompo. Lanapagioki kareta bundu' jaia, jarang na kappalaka. Lamajui rapang je'ne' a'baya, nampa jaimo pa'rasangang naempoi.

⁴¹Ba'lalo butta ga'gaya nabunduki ngaseng, siagang appulo sa'bui tau nabuno. Mingka kakaraengang Edom, Moab, siagang bageang parallua ri kakaraengang Amon lasalamaki.

⁴²Ri wattu naempoina anjo sikamma kakaraenganga, manna kakaraengang Mesir tena todong nata'lappasa'.

⁴³Lanarampasaki barang-baranna Mesir kammayami bulaeng, pera' siagang barang-barang maraengannaya tinggi sikalia anggaranna. Lanibantui ri tu Libia siagang tu Sudan.

⁴⁴Nampa nia'mo kabara' battu raya siagang battu wara' lampata'bangkai, sa'genna lattojeng-tojemmo a'bundu' siagang jai tau nabuno.

⁴⁵Ba'lalo lanatannangi kema kakaraenganNa ri alla'na tamparanga siagang bulu' tampa' pammantanganna Balla'Na Batara. Mingka kale'bakkanna lamatei siagang tena manna sitau lantulungi.”