Read Makassar Version – KITTA' MATANGKASA DANIEL 12 Bible Online

DANIEL 12 - Makassar Version – KITTA' MATANGKASA bible

DANIEL 12

¹ Nakanamo pole anjo malaeka' ammakea pakeang lenang, “Ri anjo wattua lammumbai malaeka' lompoa iamintu Mikhael pajagana bansanu. Nampa lania' wattu kasukkarang tenaya sanrapanna baku' nia'na bansa-bansaya. Mingka sikontu tau battua ri bansanu, ia niaka tattulisi' arenna lalang ri kitta'Na Allata'ala, lanipasalamaki.

² Jai ri ke'nanga mateamo lattallasa' poleangi; sipa'gang lanakasiaki katallassang mannannunganga na sipa'gang pole lanakasiaki tunaya siagang kapa'risanga sa'genna todong satunggu-tungguna.

³Sikamma pamimping cara'deka laccayai sangkamma cayana langika. Siagang sikamma tau le'baka angngajara' tau jai untu' anggaukangi apa bajika siagang adeleka, laccayai sangkamma bintoenga untu' satunggu-tungguna.”

⁴ Nampa nakana pole anjo malaekaka ri nakke, “Daniel, tongkoki anjo kittaka kamma-kamma anne, siagang sarei segele' sollanna tuli tattongko' sa'genna ri kala'busang jammanga. Jai tau ansalidiki apa niaka kajariang. Mingka anjo usahana ke'nanga latena sikali matu-matunna.”

⁵Nampa nia' kucini' rua tu bura'ne. Anjo se'rea ammentengi ri biring binanga anrinnianga, nampa se'reanga pole ammentengi ri biring binanga ba'leangnganga.

⁶Anjo se'reanga akkuta'nangi ri anjo ammentenga la'bi ambania mae ri ulunna binangaya angkana, “Angngapapi nalammari anne kajariang-kajariang appakalannasaka?”

⁷ Anjo maraenganga naangkaki rua-rua limanna nai' ri langika. Kulangngereki assumpa lanri Allata'ala mannannunganga siagang nakana, “Anjo sikamma kajarianga lanarapiki sa'genna tallu sitangnga taung. Punna le'ba'mo passessaya ri umma'Na Allata'ala, lakala'busang tommi anjo sikamma kajariang appakalannasaka.”

⁸Sikontu anjo apa napaua memang kulangngereki, mingka tena nakupahangi. Nampa akkuta'nanga' angkana, “O karaeng, antekamma batena lakala'busang yangasenna anne?”

⁹Appialimi angkana, “A'lampamako kamma-kamma anne Daniel, nasaba' anne kana-kanaya musti nicokkoi siagang nirahasiakangi sa'genna kala'busang jammanga.

¹⁰ Jai tau laniso'ri siagang lanitangkasi. Ke'nanga ja'dalaka tena nalanapahangi siagang tulusu' la'gau' ja'dala'na; iaji bawang cara'deka lampahangi.

¹¹ Appakkaramula battu ri allo nipammarina anjo koro'bang allo-alloa siagang sikamma appakamalla' niarenga Kaja'dallang Angngancuru' nipaenteng, nia' 1.290 allo.

¹²Mate'nei ke'nanga tau tuli majarreka sa'genna allo maka 1.335.

¹³Ikau Daniel, majarre' laloko sa'genna allo kala'busanga. Lamateko, mingka lambangung poleangko untu' antarimai pahalanu ri kala'busang jammanga.”