Read Makassar Version – KITTA' MATANGKASA DANIEL 2 Bible Online

DANIEL 2 - Makassar Version – KITTA' MATANGKASA bible

DANIEL 2

¹Ri se'reang bangngi, ruan taung ammarentana Karaeng Nebukadnezar, asso'nami. Anjo so'nana sanna' napakalussa'na nyawana, sa'genna takkullea tinro napakamma.

²Lanri kammana anjo nakio'mi sikamma pacinika, sanro cara'deka, sanro-sanro maraenganga siagang sikamma tau niaka pangngassenganna, untu' ampakasingaraki battuanna anjo so'naya.

³Ri wattunna ammenteng ke'nanga ri dallekanna karaenga, nakanamo karaenga, “Le'bakka' asso'na, na sanna' lussa'na nyawaku lanri erokka' angngassengi battuanna!”

⁴Appialimi ke'nanga lalang bicara Aram angkana, “La'bui umurutta satunggu-tungguna karaeng! Kicaritami anjo so'nata mae ri kambe, nampa napakasingara' ikambe battuanna.”

⁵Appialimi karaenga angkana, “Le'baki kutappuki kamma anne: Musti nupauanga' angkanaya apa anjo so'naku kammayatompa musti nupauang tonga' angkana apa battuanna. Punna tanukullea, lanikere'-kere' kabusukko kammayatompa balla'nu lanirumbang tongi.

⁶Mingka punna nukulleji, lakusareko hadia ga'ga-ga'ga siagang kalompoang. Jari kamma-kamma anne pauamma' anjo so'naku siagang apa battuanna!”

⁷Appialimi pole ke'nanga angkana, “Kipauammi rolo ikambe anjo so'nata karaeng, le'bappi anjo nampa napakasingara' ikambe battuanna.”

⁸Nalangngere'na anjo appialimi karaenga angkana, “Coco' sikali pakkapangku. Poro nupakala'bu-la'bunaji bawang caritaya, lanri nuassenna angkanaya

⁹lakuhukkung kabusu' kamma tongko punna tena nukkulle ampauanga' anjo so'naku. Assikongkolo' kabusukko untu' tulusu' amballe-balleia' siagang ampakarek-karenanga' lanri nurannuanna angkanaya lakupinrai kaputusangku. Jari, pauamma' anjo so'naku, nampa kuassemmo angkanaya akkulle tongko ampakasingaraki battuanna.”

¹⁰Nakana ngasemmo anjo tucara'deka, “Ri sikontu linoa tena manna sitau akkulle ampauangki' anjo apa kikaerokia karaeng. Siagang tale'bakai nia' se're karaeng, manna pole antekamma lompona siagang la'biri'na, antuntuki anjo apa kammaya mae ri pacinika, sanro cara'deka, kammayatompa sikamma tau tinggia pangngassenganna ri balla' karaenga.

¹¹Sukkara' dudui apa kikaerokia karaeng. Tena manna sitau akkulle anggaukangi pantaranganna sikamma rewataya, mingka tenai ke'nanga ammantang ri alla'na rupataua.”

¹²Nalangngere'na anjo kammaya teaimi sipato' larrona karaenga; naparentakammi sollanna nibuno kabusu' sikontu tau cara'de' niaka ri Babel.

¹³Nampa nipa'la'bammo nipabattu anjo parentaya; niboya kabusu'mi sikontu tau cara'deka, kammayatompa Daniel siagang agang-aganna untu' nibuno.

¹⁴Jari mangemi Daniel ri Ariokh, iamintu komandang pangawala'na karaenga, ia tajaiamo ero' anggaukangi anjo hukkungang matea.

¹⁵Tutu dudumi Daniel akkuta'nang ri ia angkana angngapa nappasulu' karaenga parenta kammaya anjo terasa'na. Napaumi Ariokh mae ri Daniel apa le'baka kajariang.

¹⁶Mangemi linta' Daniel andallekang ri karaenga siagang appala' wattu untu' ampakasingaraki battuanna anjo so'naya.

¹⁷Niturukiammi pappala'na; nampa ammotere'mo Daniel ri balla' siagang napau ngasemmi anjo passalaka mae ri Hananya, Misael siagang pole Azarya.

¹⁸Nasuromi ke'nanga appala' doang mae ri Allata'ala ri suruga sollanna mangngamaseang mae ri ke'nanga na Nasungke rahasiana anjo so'naya. Lanri kammana anjo tenamo nanihukkung matei ke'nanga siagang kabusu' sikamma tau cara'de' maraenganga.

¹⁹Anjo memang bangngia Napaumi Allata'ala rahasiana anjo so'naya mae ri Daniel lalang se're paccini'. Jari mammujimi Daniel mae ri Allata'ala niaka ri suruga,

²⁰nakana, “Anjo Allata'ala cara'deki na pore, nipujimi arenNa satunggu-tungguna!

²¹Iami ampattantui wattua siagang jammanga, Ia antu'gurangi siagang allantiki pamarentaya. Ia todong assarei kacara'dekang, siagang assarei pammahang.

²²Ia assungkei rahasia kaminang lantanga. Naassengi sikontu apa kajarianga lalang ri sassanga. Nikalimbuki ri caya singaraka.

²³O, Allata'ala napakalompoa boe-boeku, iKattemi kupuji siagang kupakala'biri'. Nasaba' Kisarea' kacara'dekang siagang kagassingang. Kiturukianga' pappalakku. Siagang Kipicinikiamma' pappialia mae ri karaenga.”

²⁴Le'baki anjo a'lampami Daniel mange ri Ariokh nisarea tugasa' untu' ambunoi sikamma tau cara'deka ri Babel. Nakana Daniel ri ia, “Teaki' bunoi anjo sikamma tau cara'deka. Eranga' mange andallekang ri karaenga, nasaba' erokka' ampauangi karaenga angkanaya apa battuanna anjo so'nana.”

²⁵A'lampami linta' Ariokh angngerangi Daniel mange andallekang ri Karaeng Nebukadnezar nampa nakana, “Nia'mo nagappa atanta ri alla'na tu Yahudi nipelaka sitau akkullea ampauangki' battuanna anjo so'nata karaeng.”

²⁶Jari nakanamo karaenga ri Daniel iamintu niarenga todong Beltsazar, “Akkulleko ampauanga' angkana apa anjo so'naku siagang apa battuanna?”

²⁷Appialimi Daniel angkana, “O Karaeng, tena tau niaka pangngassenganna, sanro cara'de', pacini' yareka tucara'deka accini' bintoeng akkulle ampauangki' anjo passalaka, karaeng.

²⁸Mingka ri suruga, nia' Allata'ala akkulle ansungkei sikontu rahasiaya, siagang Iami le'ba' ampauangki' karaeng apa lakajarianga ri allo ri boko. Kamma-kamma anne, boli'mi kamma nanapakasingara' atanta angkana apa so'nata siagang kicini' ilalang tinrota karaeng.

²⁹Ri wattunta attinro karaeng, asso'naki' ri passala'na jammang labattua sallang. Nasungkei Allata'ala mae ri katte karaeng, iamintu sikontu rahasiana apa lakajarianga.

³⁰Anne rahasiaya le'ba'mi nipakasingara' mae ri atanta mingka teai lanri anne atanta la'bi cara'dekangngangi natau maraenga, passangalinna akkulle kiasseng battuanna anjo so'nata karaeng, siagang niasseng todong bone atinta karaeng.

³¹Iaminne anjo apa kicinika karaeng: Ri dallekanna karaengku nia' se're patung! Anjo patunga teai sipato' lompona, siagang accilla'-cillaki mingka sanna' appakamalla'na tanja'na.

³²Ulunna iamintu bulaeng ti'no' nipare', barambanna siagang paling-palinna battu ri pera', aya'na siagang pungku'na battu ri tambaga,

³³bongganna battu ri bassi nampa bangkenna bassi sipa'gang na sipa'gang pole battu ri butta pi'.

³⁴Ri wattunna kiciniki anjo patunga karaeng, nia'mo se're batu lompo ta'lappasa' battu ri ta'binga, natena tau anseroi, nampa natuju bangkenna anjo patunga ia bassia siagang butta pika, sa'genna ancuru'.

³⁵Rumbang silalonnami anjo patunga nampa a'jari tambungang bassi, butta pi', tambaga, pera', siagang bulaeng; ancuru' taba sikalimi anjo patunga sangkamma limbu'bu' niaka ri tampa' pa'lessorang gandunga punna wattu timoro'. Anri'ba'-ri'ba'mi anjo timbunganga niiri' ri anging, sa'genna tena sikalimo bate-batena manna sike'de'. Mingka anjo batu anrumbangai anjo patunga a'jari pila' lompomi sangkamma moncong lompona na napirassi sikontu buttaya.

³⁶Iaminjo so'nana karaengku; na kamma-kamma anne lanapakasingaraki' atanta angkana apa battuanna anjo so'nata.

³⁷Karaengku mala'birika, iami karaenna sikamma karaenga; ikattemi karaeng kaminang makoasaya. Allata'ala ri suruga le'ba' assareki anne kakaraenganga, kakoasanga, kagassinganga siagang kalompoanga.

³⁸Nipa'jariki' karaeng tukoasa mae ri lino niaka pandudu'na kammayatompa jangang-janganga siagang olo'-olo' maraengannaya. Kalentami karaeng natabaya pangngebarranna anjo ulu bulaenna anjo patunga.

³⁹Mingka punna le'ba'mo kakaraenganta, nia'mo lammumba kakaraengang maraeng, tenaya nasallompo kakaraenganta. Nampa ammumba pole kakaraengang makatallua, nipangngebarranga lalang ri anjo tambagaya ri patunga, lakoasaya mae ri sikontu linoa.

⁴⁰Nampa lammumba pole kakaraengang makaappa', kammaya bassi kassa'na. Na antekamma batena bassia allica' siagang angngancuru' apa-apa mamo, kammatommi anjo rapanna anne kakaraengang makaappaka lanalicaki siagang lanaancuruki anjo kakaraengang-kakaraengang maraenga.

⁴¹Anjo bangkenga siagang karemeng bangkeng a'bengkoroka bassi siagang butta pi' ri anjo patunga, iaminjo pangngebarranna angkanaya anjo kakaraenganga lata'bage-bagei ri allo ri boko. Anjo kakaraenganga nia' todong kagassinganna lanri anjo butta pika nibengkoroki bassi.

⁴²Karemeng bangkenna bassi sipa'gang nampa butta pi' sipa'gang, battuanna nia' sipa'gang kakaraengang kassa' mingka nia' todong sipa'gang lammai.

⁴³Anjo campurang bassia siagang butta pika a'jari pammatei angkanaya anjo kakaraenganga nausahai lanakassakki kalenna; iaminjo saba'na nasicampuru'mo sibuntingi. Mingka tena matu-matunna anjo usahana, nasaba' anjo bassia tena nakkulle sialle siagang butta pika.

⁴⁴Ri wattu ammarentana anjo sikamma karaenga, Allata'ala ri suruga lappaentengi se're kakaraengang lattahanga satunggu-tungguna siagang tenaya nakkulle lanibeta ri manna bansa battu kemae. Anjo kakaraenganga lanaancuru' tabasikali anjo sikamma kakaraengang maraenga.

⁴⁵Sai kiciniki karaeng, angkanaya tena sikali tau amberoi, nania' se're batu ta'lappasa' battu ri ta'binga nampa natuju siagang naancuru' anjo patung nipareka battu ri bassi, tambaga, butta pi', pera' siagang bulaeng? Allata'ala malompoa ampa'nyatai mae ri karaengku apa lakajarianga sallang. Anjo so'naya akkullei nipatappa' siagang anne napakasingaraka atanta sanna' sikali kamma tojenna.”

⁴⁶Nampa su'ju'mo Karaeng Nebukadnezar ri dallekanna Daniel siagang naparentakang sollanna nipakalompo Daniel siagang nisare koro'bang nitunu kammayatompa passare maraengannaya.

⁴⁷Nakana karaenga ri ia, “Tojeng, Daniel, anjo Allata'alanu kaminang malompo ri alla'na sikontu rewataya. Iami makoasa mae ri sikontu karaenga, siagang assungkeai sikontu rahasiaya. Kuassengi anjo passalaka nasaba' ikau akkulleko ampakasingaraki anne rahasiaya.”

⁴⁸Nampa nasaremo Daniel empoang tinggi, nasarei jai hadia-hadia ga'ga, siagang naangkaki a'jari guburnur ri Babel, kammayatompa napa'jari pamimping kaminang tinggi mae ri sikontu tumailalanga ri balla' karaenga.

⁴⁹Mingka lanri pappala'na Daniel, napassareammi karaenga anjo pamarentahang propinsi Babel mae ri Sadrakh, Mesakh siagang Abednego, nampa kalenna Daniel ammantangi ri balla' karaenga.