Read Makassar Version – KITTA' MATANGKASA DANIEL 3 Bible Online

DANIEL 3 - Makassar Version – KITTA' MATANGKASA bible

DANIEL 3

¹Ri se'reang wattu, appareki Karaeng Nebukadnezar se're patung bulaeng. Tinggina 27 metere' siagang sangkara'na ambani 3 metere'. Anjorengi ri lappara' Dura ri propinsi Babel napaenteng anjo patunga.

²Nampa naundang karaenga sikontu karaeng battua ri daeraya, sikamma guburnurka, bupatia, tumailalanna pa'rasanganga, bendaharaya, hakinga, tucara'deka ri passala'na undang-undanga, kammayatompa sikontu kapala daeraya untu' anghaderi upacara niresmikanna anjo patung le'baka napaenteng.

³Ri wattunna battu ngasemmo ke'nanga siagang ammenteng ngaseng ri dallekanna anjo patunga,

⁴akkio' lompomi pambantuna karaenga angkana, “Sikamma sari'battang battua ri sikontu bansaya, suku bansaya siagang bahasaya! Pilangngeri anne parentana karaenga:

⁵Punna assa'ra tarompeka, nipinawang ri sa'ra suling, kacaping, keso'-keso', gambusu', serdang siagang pakkakasa' musi' maraengannaya, sikamma sari'battanga musti su'jukko anynyomba mae ri patung le'baka napaenteng Karaeng Nebukadnezar.

⁶Inai-nai tena naturuki anne parentaya, lanipasambila silalonnai antama' ri pepe' a'rinra-rinraya.”

⁷Jari nalangngere'na sa'ra pakkakasa' musika, sikontu anjo tau battua ri sikontu bansaya, suku bansaya siagang bahasaya, su'ju' kabusu'mi siagang anynyombami mae ri anjo patung bulaenga.

⁸Nia' siapa are tu Babel ampakei anjo kasampatanga untu' ambalai tu Yahudi.

⁹Nakana ke'nanga ri Karaeng Nebukadnezar, “La'bui umurutta satunggu-tungguna karaeng!

¹⁰Kalenta le'ba' appasulu' parenta angkanaya punna assa'ra silalonna pakkakasa' musika, sikontu taua musti su'juki siagang anynyombai mae ri anjo patung bulaenga;

¹¹siagang inai-nai tena naturuki anjo parentaya lanipasambilai antama' ri pepe' a'rinra-rinraya.

¹²Mingka nia' siapa are tu Yahudi le'baka kisare pamarentahang ri propinsi Babel ambawang-bawangngangi anjo parentata karaeng. Anjo ke'nanga iamintu Sadrakh, Mesakh siagang Abednego. Anjo ke'nanga taerokai anynyomba ri rewata-rewatanta karaeng, siagang tena todong naero' anynyomba ri anjo patung bulaeng le'baka kipaenteng karaeng.”

¹³Nalangngere'na karaenga anjo kammaya, teaimi sipato' larrona. Appasulu'mi parenta sollanna nierang anjo tau tallua andallekang ri ia.

¹⁴Akkuta'nammi karaenga ri ke'nanga angkana, “He Sadrakh, Mesakh, siagang Abednego! Kammatojengi angkanaya taerokako anynyomba ri rewata-rewatangku siagang tena todong nuero' su'ju' mae ri anjo patung bulaeng le'baka kupaenteng?

¹⁵Jari, kamma-kamma anne apaka sadia jako su'ju' siagang anynyomba mae ri anjo patunga punna assa'ra musika? Punna taerokako, lakupasambila silalonnako antama' ri pepe' a'rinra-rinraya. Siagang rewata battu kemae lakkulle ampasalamakko battu ri kakoasangku?”

¹⁶Appialimi Sadrakh, Mesakh siagang Abednego, angkana, “Karaeng mala'birika, tena nalassassala' ikambe.

¹⁷Punna akkulle Allata'ala nasombaya ikambe ampasalamaki ikambe battu ri anjo pepe' a'rinra-rinraya siagang battu ri kakoasanna karaengku, mattantu Nagaukangi.

¹⁸Mingka manna pole ebara' angkana tena Nagaukangi, parallui kiasseng angkanaya ikambe tena nalanynyomba mae ri rewatana karaengku, siagang tena todong nalanynyomba mae ri anjo patung bulaeng kipaentenga karaeng.”

¹⁹Jari a'reremi larrona Karaeng Nebukadnezar mae ri Sadrakh, Mesakh siagang Abednego, sa'genna a'jari eja sikali rupanna. Naparentakammi sollanna nitambai a'lappi tuju bambanna anjo pepeka.

²⁰Nampa nasuro siapa are tau sannaka gassinna battu ri tantarana ansikkoki Sadrakh, Mesakh siagang Abednego, kammayatompa napasambila ke'nanga antama' ri anjo pepe' a'rinraya.

²¹Nisikko'mi linta' anjo tau tallua sa'genna jarre', ammakeang langka', iamintu kameja, juba, topi siagang pakeang maraengannaya, nampa nipasambila antama' ri anjo pepe' a'rinra-rinraya.

²²Lanri terasa'na anjo parentana karaenga, sa'genna nitambai bambanna anjo pepeka, sa'genna anjo rinrana pepeka natunui sa'genna mate anjo sikamma tau angngangkakai Sadrakh, Mesakh siagang Abednego ri ampi'na anjo pepeka.

²³Kammami anjo, anjo tau tallua nisikko' jarreka tu'guru'mi antama' ri anjo pepe' a'rinra-rinraya.

²⁴Ti'ring ta'bangka lompomi Karaeng Nebukadnezar. Ammentengi nai' linta' nampa ammarrang lompo angkana mae ri pagawena, “Sai tallu tau sumpaeng nisikko' nampa nipasambila ke'nanga antama' ri anjo pepeka?” Appialimi ke'nanga angkana, “Kammatojengi karaeng.”

²⁵Appialimi karaenga angkana, “Mingka angngapa naappa' tau kucini' a'jappa-jappa ri tangnga-tangngana anjo pepeka? Tena sikali natassikko' ke'nanga siagang tena nangngapa-apa. Siagang anjo tau makaappaka tanja'na sangkammai rewata.”

²⁶Nampa a'reppese' Nebukadnezar mae ri pakke'bu'na anjo pepe' pattunuanga siagang ammarrang angkana, “O Sadrakh, Mesakh siagang Abednego, atanNa Allata'ala Kaminang Tinggia! Assulu' mako battu ri antu pepeka!” Jari assulu'mi ke'nanga.

²⁷Sikontu wakkele' karaenga, guburnurka, bupatia, siagang pagawe-pagawe maraengannaya, natammulili anjo tau tallua siagang naciniki ke'nanga angkanaya tena sikali naniberoi ri pepe' anjo tau tallua. Tena nammutung uu'na ke'nanga, care-carena tena todong nakkanre, ba'lalo tena sikali na'rasa umbu ke'nanga.

²⁸Nampa nakanamo karaenga, “Pujimi Allata'ala nasombaya Sadrakh, Mesakh siagang Abednego. Iami le'ba' assuroi malaeka'Na untu' ampasalamaki tallua atanNa matappaka mae ri Ia. Le'baki nadakkai ke'nanga parentaku siagang erokangngangi matea ke'nanga kala anynyombaya yareka appakalompo ri rewata maraeng, pantaranganna Allata'alana todong ke'nanga.

²⁹Lanri kammana anjo kuparentakangi angkanaya sikamma tau battua ri bansa-bansaya, ri suku bansaya yareka bahasaya, ia le'baka appasulu' kana-kana anghinai Allata'ala nasombaya Sadrakh, Mesakh siagang Abednego, lanikere'-kereki siagang lanirumbangi balla'na a'jari tambungang loro. Nasaba' tena rewata akkulle anggaukangi anjo apa le'baka Nagaukang Allata'ala.”

³⁰Le'baki anjo napanai'mi karaenga pangka'na anjo Sadrakh, Mesakh siagang Abednego, sa'genna a'jari ke'nanga tau tinggi pangka'na ri propinsi Babel.