Read Makassar Version – KITTA' MATANGKASA DANIEL 4 Bible Online

DANIEL 4 - Makassar Version – KITTA' MATANGKASA bible

DANIEL 4

¹Iaminne apa napa'la'banga Karaeng Nebukadnezar, ia nakiringa mae ri sikamma tau niaka battu ri sikontu bansaya, suku bansaya siagang bahasaya, ri sikontu linoa: “Salama' battu ri nakke!

²Erokka' ancaritai ri sesena apa appakalannasa' siagang gau' malompo le'baka Nagaukang Allata'ala Kaminang Tinggia mae ri nakke.

³Tamaka lompona gau' lompo Nagaukanga! Tamaka heba'na gau' appakalannasa' le'baka Nagaukang! Allata'ala a'jari Karaeng satunggu-tungguna. Ia koasa ri sikontuna jammanga.”

⁴Ammantanga' siagang salewangang ilalang ri balla' kakaraengangku na sukku' baji'na pattallassangku.

⁵Mingka ri se'reang bangngi, ri wattu lalang tinroku, asso'na' anggappa paccini', sannaka napakalussa'na nyawaku.

⁶Nampa kukio' sikamma tucara'deka, ia niaka ri Babel untu' ampakasingaraki battuanna anjo so'naya mae ri nakke.

⁷Mingka ri wattunna battu nampa kucarita anjo so'naku mae ri sikamma pacinika, sanro cara'deka, tau niaka pangngassenganna siagang tau cara'deka accini' bintoeng, tena manna sitau battu ri ke'nanga akkulle ampakasingaraki apa battuanna anjo so'naku.

⁸Kala'busanna battumi Daniel ia niarenga todong Beltsazar, sangkamma arenna rewatangku. Anjo Daniel nikoasai ri roh rewata-rewata matangkasa'. Kucarita tongi so'naku mae ri ia, kukana,

⁹“He, Beltsazar, pamimpinna tau cara'deka, kuassengi angkanaya ikau nikoasaiko ri rohna rewata-rewata matangkasaka, sa'genna tena rahasia taccokko mae ri kau. Pilangngeri anne so'naku, siagang pakasingaraki battuanna.

¹⁰Ri wattungku lalang tinro, nia' kucini' se're poko' kayu attimbo ri tangnga-tangngana buttaya.

¹¹Anjo poko' kayua sanna' tinggina; batanna lompoi na kassa'. Coppo'na sa'gennai langika, sa'genna akkullei nicini' ri sikontu niaka ri buttaya.

¹²Leko'-leko'na sanna' copponna, siagang teai sipato' roasa'na rapponna, akkullei angganna' nikanre ri bonena sikontu linoa. Olo'-olo' liaraka anra'bai irawa ri la'lanna kammayatompa jangang-janganga a'ru'mungi ri tangke-tangkenna. Na sikontu apa-apa attallasaka akkullei nakanre rapponna.

¹³Lalang kunawa-nawana anjo apa kucinika, nia'mo kucini' se're malaeka' naung battu ri suruga; tutui najaga-jaga kucini'.

¹⁴Assa'ra lompomi angkana, ‘Ta'bangi anjo poko' kayua siagang polongi tangke-tangkenna, tu'gurangi leko'-leko'na siagang pasiaraki rapponna. Bongkai olo'-olo' niaka anra'ba irawanganna siagang jangang-jangang niaka a'ru'mung ri tangke-tangkenna.

¹⁵Mingka lappassangi ammantang tonasa'na lalang ri buttaya. Sikkoki siagang rante bassi na tambaga, nampa nuboli' ri parang rukuka. Lappassangi nibasai ri allung, kammayatompa attallasa' siagang olo'-oloka siagang timbo-timboanga.

¹⁶Lappassangi akkala' tauna amminra a'jari akkala' olo'-olo' lalang tuju taung.

¹⁷Iaminjo kaputusanna ikambe malaeka'-malaeka' tutua siagang jaga-jagaya. Ero'na ikambe iamintu sollanna sikontu taua ri kere-keremae naani angkanaya Allata'ala Kaminang Tinggia makoasa mae ri kakaraengang rupataua siagang anjo kakaraenganga Napassareangi manna pole ri nai Napilea, ba'lalo tau kaminang tenaya pole anggaranna!’

¹⁸He Beltsazar, iaminjo so'naku. Kamma-kamma anne paumi ri nakke apa battuanna anjo so'naku. Tena manna sitau battu ri sikamma tau cara'de' niaka lalang kakaraengangku akkulle ampauanga' battuanna, mingka ikau akkulleko, nasaba' nikoasaiko ri rohna rewata-rewata matangkasaka.”

¹⁹Nalangngere'na anjo kammaya, Daniel iamintu niarenga todong Beltsazar, ta'bangkami siagang kalanna'-lannassangi siapa are sallona. Jari, inakke, Karaeng Nebukadnezar kukanamo ri ia, “He Beltsazar, teako lussakki lanri ia anjo so'naya siagang battuanna.” Appialimi Beltsazar angkana, “O karaengku, baji' sikali ebara' angkana sikamma anjo apa nibotoa lalang ri anjo so'naya teai ikatte natuju passangalinna musu-musunta.

²⁰Anjo poko' kayu sannaka lompona kicini', sa'genna coppo'na narapiki langika, siagang akkullei nicini' ri sikontu tau niaka ri buttaya.

²¹Leko'-leko'na coppongi siagang rapponna roasaki sa'genna angganna' untu' assarei kanre sikontu bonena linoa. Sikamma olo'-olo' liaraka anra'bai irawa ri la'lanna, siagang jangang-janganga a'ru'mungi ri tangke-tangkenna.

²²O karaengku, karaengkumi nataba pangngebarranna anjo poko' kayu tinggia siagang kassaka. Katambangi kalompoanna karaengku sa'genna narapi' rapang coppo'na langika, siagang kakoasanta a'la'baki sa'genna cappa'na buttaya.

²³Nia' kicini' karaeng se're malaeka' naung battu ri suruga na nakana, ‘Ta'bangi anne poko' kayua siagang panraki, mingka lappassangi tonasa'na ammantang lalang ri buttaya. Sikkoki siagang rante bassi na tambaga, nampa boliki ri parang rukuka. Lappassangi nibasai ri allung, siagang attallasa' siagang olo'-oloka lalang tuju taung.’

²⁴O karaengku, iaminne battuanna anjo paccinitta, siagang iaminne le'ba' Natappukia KalenNa Allata'ala Kaminang Tinggia ri sesena kalenta.

²⁵Lanibongkai karaengku battu ri pa'rappunganna rupataua nampa attallasa' ri alla'na olo'-olo' niaka ri paranga. Lalang tuju taung langnganreki' ruku' kamma sapi karaeng, siagang attinroki' ri parang tassungkea, sa'genta lanibasai ri allung. Le'baki anjo lakianimi karaeng, angkanaya Allata'ala Kaminang Tinggia makoasa mae ri kakaraenganna rupataua, siagang anjo kakaraenganga Napassareangi mae ri nai-nai Napilea.

²⁶Naparentakangi sikamma malaekaka sollanna niboli' tonasa'na anjo poko' kayua lalang ri buttaya. Anjo battuanna angkanaya la'jari karaengi ammotere' karaengku, punna kianimo angkanaya Allata'ala angkoasai sikontu linoa.

²⁷Lanri kammana anjo, kupalaki nakipilangngeri anne pappakainga'na atanta. Tea' maki' dorakai pole karaeng, mingka gaukammi apa bajika siagang adeleka, kammayatompa kamaseangi tu kasi-asia. Lanri kammana anjo nalatulusu' mate'ne karaengku.”

²⁸Yangasenna anjo kammaya kajariangi mae ri kalengku, inakke, Karaeng Nebukadnezar.

²⁹Sampulo anrua bulang ribokoanganna, ri wattungku a'jappa-jappa lalang ri koko balla' lompoku bageang iratea, ri Babel,

³⁰kukanamo, “Ciniki, tamaka heba'na kota Babel. Inakke ambangungi a'jari ibukota negara, untu' ampa'butti kakoasangku siagang kagassingangku, kala'birangku siagang kalompoangku!”

³¹Tenapa nakupuppusu' a'bicara nania'mo sa'ra kulangngere' battu ri langika, angkana, “He Karaeng Nebukadnezar, pilangngeri anne! Kakoasannu salaku karaeng niallemi battu ri kau.

³²Lanibongkako battu ri pa'rappunganna rupataua, nampa attallasakko siagang olo'-oloka ri paranga. Lalang tuju taung langnganreko ruku' sangkamma sapi. Le'baki anjo lanumangakuimi angkanaya Allata'ala Kaminang Tinggia makoasa mae ri kakaraenganna rupataua siagang anjo kakaraenganga nipassareangi mae ri nai-nai Napilea.”

³³Anjo memang wattua, a'rupami anjo kana-kanaya. Inakke, Nebukadnezar nibongkama' battu ri pa'rappunganna rupataua siagang angnganrema' ruku' sangkamma sapi. Nibasaimi batangkalengku ri allung, uukku a'jari la'bui sangkamma bulu balangkoa', siagang kanukungku a'jari la'bui sangkamma cakkara'na jangang-janganga.

³⁴Ri wattunna allalomo anjo wattu tuju taunga sallona, accongama' nai' ri langika, nampa ammotere'mo pangngu'rangingku. Jari kupujimi Allata'ala Kaminang Tinggia. Kupakalompoi siagang kupakala'biriki anjo Allata'ala mattallasaka mannannungang. “Allata'ala la'jari Karaeng untu' satunggu-tungguna. Ia makoasa ri sikontu jammanga.

³⁵Bansa-bansaya ri lino tena anggaranna. Allata'ala makoasa mae ri malaekaka ri suruga siagang pandudu'na buttaya. Tena manna sitau akkulle ambaliangi ero'Na, tena barani ampakuta'nangngangi apa Nagaukanga.”

³⁶Ri wattunna ammotere'mo pangngu'rangia ri nakke, nipoterang kabusu'mi mae ri nakke iamintu kalompoangku, kala'birangku siagang masahoro'na kakaraengangku. Niruppaima' ri sikamma pagaweku siagang sikamma tumalompoku, kammayatompa nipoteramma' mae ri kakaraengangku, ba'lalo kala'birangku a'jari lompoangammi narioloa.

³⁷Jari kamma-kamma anne, inakke Nebukadnezar, kupuji, kupakatinggi siagang kupakala'biriki Karaenga ri Suruga. Sikontu Nagaukanga annabai siagang adeleki, siagang akkullei Napakatuna tau tampoa panggaukanna.