Read Makassar Version – KITTA' MATANGKASA HOSEA 10 Bible Online

HOSEA 10 - Makassar Version – KITTA' MATANGKASA bible

HOSEA 10

¹Israel rapangi poko' anggoro' roasaka rapponna. Pila' katambangi kalumanynyanna, pila' jai tongi tampa' pakkoro'bangnganga napareka. Pila' kalumanynyangi, pila' baji' tongi patung-patunna barhala nasombaya.

²Anjo sikamma tau a'jekkoa atinna, kamma-kamma anne musti natanggongi hukkunganna dosana. LaNaancuruki Allata'ala tampa' pakkoro'bangnganna ke'nanga, siagang Naruntungi patung-patung barhalana ke'nanga.

³Tasalloami nanakana ke'nanga, “Tena karaenta nasaba' tena nakimalla' mae ri Batara. Apa matu-matunna se'rea karaeng mae ri katte?”

⁴A'bicara kosongi ke'nanga siagang appareki janji takontutojeng siagang anynyikkoki parjanjiang tenaya matu-matunna. Naputara' baleki hukkunga ke'nanga, sa'genna attimbomo tenaya naadele' rapang lamung-lamung a'racunga ri koko le'baka nibingkung.

⁵Pandudu'na Samaria lamallaki; ke'nanga siagang imang-imanna ke'nanga allayania ri anjo sapi bulaenga ri Betel lasi'nai siagang langngarruki lanri lanynya'mi sikontu kalompoanna anjo barhalana ke'nanga.

⁶Anjo barhalaya laniengkaki mange ri Asyur untu' nihadiakang mae ri karaeng lompoa. Naturuki Israel rancana angngerangai ke'nanga mae ri nipakasirika siagang nipakatunaya.

⁷Laancuruki Samaria siagang lanierangi karaenna a'lampa rapang sipolong kayu nianyukanga ri je'ne'.

⁸ Sikamma balla' rewata niaka ri bulu'-bulu'na Betel tampa'na tu Israel anynyomba barhala, laniancuruki. Katintinga siagang rukuka lattimboi ri tampa' pakkoro'bangnganna ke'nanga. Nampa lammarrang ke'nanga mae ri moncong-monconga angkana, “Tongko'mi ikambe!” siagang mae ri bulu'-buluka angkana, “Tujumi ikambe!”

⁹ Nakana Batara, “Baku' kajarianga ri Gibea, tenammariapi tu Israel a'gau' dosa angngewa ri Nakke. Lanri kammana anjo ri Gibea tommi ke'nanga lanatuju pa'bundukang.

¹⁰LaKubunduki anjo tau dorakaya ngaseng siagang laKuhukkungi ke'nanga. Lasita'gala' kabusuki bansa-bansaya untu' ambaliangi ke'nanga, siagang lanihukkungi ke'nanga lanri anjo dosa jaina ke'nanga.

¹¹Riolo Israel sanrapangi sapi rungka le'baka nilati baji', na nangai allessoroka gandung. Tena naparallu Kusarei pisangngang salangganna ga'gaya. Mingka kamma-kamma anne le'ba'mi Kupattantu angkanaya musti anjama battalaki. Kusuroi Yehuda appa'jeko, siagang Israel Kusuroi a'nangkala.

¹² Kukana, ‘He Israel! Apparekko koko beru untu' kalennu, kiori siagang bine kaadelang, siagang akkatto mako barakka' naerang poleanga mattojeng-tojenna pangngainu mae ri Nakke. Nasaba', narapi'mi wattunnu untu' amboyA', Bataranu. LabattuA' untu' ampaturungangko bosi barakkakKu.’

¹³Mingka ikau nugaukangi apa kabalekannaya; appattujuangko mae ri kaja'dallanga, siagang akkattoko tenaya naadele'. Nukanrei rappo-rapponna wassele' balle-ballenu.” Nakana pole Batara, “He bansa Israel, lanri nupattoanna kareta-kareta pa'bundukannu siagang jaina tantaranu,

¹⁴jari lanitujumi ra'ya'nu ri pa'bundukang, siagang sikontu pattahangannu laniancuruki. Pattallassannu la'jari sangkammai ri allonna Karaeng Salman napanraki kota Bet-Arbel lalang pa'bundukang, siagang nalissarrang sikamma amma'-ammaka siagang ana'-ana'na.

¹⁵Iami anjo apa lakajarianga mae ri kau ngaseng, he pandudu'na Betel, lanri le'ba'na nugaukang kaja'dallang lompoa. Ri wattu ammumbana alloa ri bari'basaka, tasalloapi appakkaramulana bunduka, nalamatemo karaennu.”