Read Makassar Version – KITTA' MATANGKASA HOSEA 14 Bible Online

HOSEA 14 - Makassar Version – KITTA' MATANGKASA bible

HOSEA 14

¹Samaria musti nihukkungi lanri angngewana ri Nakke. Lamatei ra'ya'na lalang pa'bundukanga; ana'-ana' lolona lanilissaraki, siagang bai'-baine tiananga lanipuei battanna.”

²He bansa Israel, ammotere' mako mae ri Karaeng Allata'alanu! Passabakkang dosanu nutappeccoro' siagang tu'guru'.

³Ammotere' mako mae ri Batara, pabattumi anne pappala' doang salaku panynyombannu ri Ia angkana, “O Batara, pammopporangi dosana ikambe, siagang Kitarima laloi anne pappala' doanna ikambe, namammuji ikambe mae ri Katte situru' kana janjinna ikambe.

⁴Takkulleai Asyur ampasalamaki ikambe, siagang jarang pa'bundukanga takkulleai antulungi ikambe. Tenamo nalakkio' Allata'ala ikambe mae ri patung-patung napareka ikambe. O, Batara, Kikamaseangi sikamma tau tenaya apa-apa lanapattoang lampasalamaki.”

⁵Nakana Batara, “UmmakKu ammengka salaya, Kuallei ammotere' naKukamaseang sikontu pa'mai'; talaKukalarroiami pole ke'nanga.

⁶Mange ri Israel rapangA' bosi ambasai butta kalotoroka. La'bakkaki ke'nanga rapang bunga siagang rapang camara lantanga aka'na.

⁷Lattallasaki siagang lakatambangi ke'nanga rapang lamung-lamung accu'laka ri kere-keremae, rapang poko' zaitun ga'gana bau' rasanna rapang poko' camara!

⁸Lammotereki ke'nanga mae ri Nakke nammamtang lalang ri la'langKu. Lintaki ke'nanga katambang kalumanynyanna, rapang gandung a'bakka' ri koko copponga buttana siagang rapang koko anggoro'. Rapang je'ne' anggoro' Libanon lamasahoroki arenna ke'nanga.

⁹Lanapelaki tu Israel patung-patung barhalana; laKuparakai ke'nanga naKupilangngeri pappala' doanna. Rapang poko' kayu tuli jaina leko'na, iNakke lalla'langngi ke'nanga. INakkemi kabattuanna sikontu barakkaka mae ri ke'nanga. INakke, Batara, anne akkana.”

¹⁰Dasi-dasi nasikontu tau cara'deka napahangi anne apa niaka tattulisi' anrinni, siagang naparhatikangi bonena. Pangngunju'-pangngunju' battua ri Batara iami tojeng, siagang ia tau bajika lanaturukimi anjo pangngunju'-pangngunjuka lalang tallasa'na. Mingka tau dorakaya nabalang parekangi, sa'genna tappeccoro' na tu'guru'.