Read Makassar Version – KITTA' MATANGKASA HOSEA 5 Bible Online

HOSEA 5 - Makassar Version – KITTA' MATANGKASA bible

HOSEA 5

¹Nakanana Batara, “Pilangngeri, he sikamma imanga! Parhatikangi, he tu Israel! Pilangngeri, he jari-jarina karaenga! Le'ba'mi nipattantu hukkunganga mae ri kau. Nasaba', mustina adelekko angngadeli, mingka kabalekanna a'jari mako rapang tado' ri Mizpa, rapang sikko' nitannanga ri Bulu' Tabor,

²siagang rapang kali'bong lantanga ri Sitim. Lanri kammana anjo laKuhukkung ngasengko!

³Kuasseng ngasengi sikontuna batangkalennu ngaseng, he ikau tu Israel. Tena olona lania' akkulle nurahasiakang mae ri Nakke. Anynyombako ri barhalaya siagang tenamo namajarre' pa'mai'nu mae ri Nakke. Lanri kammana anjo, tena nasiratang taunnu anynyomba mae ri Nakke.”

⁴Lanri anjo kaja'dallang nagaukanga tu Israel natakkulleamo ke'nanga ammotere' mae ri Allata'alana ke'nanga. Tassikko'mi ke'nanga ri panynyombanga mae ri barhalaya, sa'genna tenamo najampangi ke'nanga Batara.

⁵A'nassai nicini' katampoanna bansa Israel, siagang a'jari buttimi ri kasalanna. Dosana ke'nanga a'jari saba' natatto'ro siagang tu'guru', siagang bansa Yehuda tu'guru' tommi siagang ke'nanga.

⁶A'lampai ke'nanga a'boya Batara angngerang gimbala' siagang sapi untu' koro'bang, mingka yangasenna anjo tena matu-matunna. Nasaba' Nibokoimi ke'nanga ri Batara, na tenamo nakkulle ke'nanga ambuntuluki.

⁷Tena namajarre' ke'nanga mae ri Batara; ana'-ana'na ke'nanga teaimi ana'-ana'na. Lanri kammana anjo, tenamo nasallo nalanipanraki ke'nanga siagang koko-kokonna ke'nanga.

⁸Tuiki tarompeka ri Gibea! Pasa'rai tanra pakkioka untu' mange a'bundu' ri Rama! Ammarrangko sa'ra pa'bundukang ri Betel. Umba, tu Benyamin, majuko a'bundu'!

⁹Lapanraki tu Israel, nasaba' narapi'mi allonna untu' anghukkungi. Pilangngeri, he ra'ya' Israel, anjo passalaka mattantui lakajarianna.

¹⁰Nakana Batara, “LarroA' lanri pamimping-pamimpinna tu Yehuda nabunduki tu Israel siagang narampasaki buttana. Lanri kammana anjo lappabattuA' hukkungang mae ri ke'nanga rapang a'ba.

¹¹Nijallakkangi Israel; nialleangi buttana, lanri terasa'na nyawana untu' appala' tulung mae ri apa-apa tenaya nakkulle antulungi.

¹²Lanri kammana anjo laKuancuruki bansa Israel, siagang laKuputtai tu Yehuda.

¹³Bansa Israel siagang bansa Yehuda nasadari kakodianna sarenna. Jari a'lampami tu Israel mange appala' bantuang battu ri Asyur, battu ri karaeng lompoa. Mingka anjo karaenga takkulleai antulungi yareka ampakabajiki katallassanna ke'nanga.

¹⁴Rapang singa a'bakkaya, kammami anjo bateKu lambakkai tu Israel siagang tu Yehuda. KalengKu langkae-kaei ke'nanga, nampa Kubokoi. Punna Kure'resang ke'nanga a'lampa, tena manna sitau akkulle allappassangi ke'nanga.

¹⁵LaKubokoi ummakKu sa'genna sukku'mo pa'risi'na ke'nanga lanri dosa-dosana, nampa battu ke'nanga amboyA'. Nakulle kapang lalang ri kapa'risanna ke'nanga nalappattujuammo amboyA'.”