Read Makassar Version – KITTA' MATANGKASA HOSEA 7 Bible Online

HOSEA 7 - Makassar Version – KITTA' MATANGKASA bible

HOSEA 7

¹Nakana Batara, “Sampang eroki Kupammolle ummakKu Israel siagang Kupakabaji' ammotere' pattallassanna ke'nanga ia tuli Kucinika iamintu kaja'dallanna siagang dosana bawang ke'nanga. Assitipui para ia ke'nanga, antamaki ri balla'na taua a'lukka', siagang angngellaki ke'nanga ri aganga.

²Tena le'bakai ammumba ri pikkiranna ke'nanga angkanaya laKuu'rangi ngasengi anjo sikontu kaja'dallanna ke'nanga. Mingka katongkokangi ri dosa-dosana ke'nanga sa'genna a'nassai Kucini'na.”

³Nakana Batara, “Napakei akkala' balle-ballena siagang panggaukang-panggaukang ja'dala'na ra'yaka untu' ampakasannangi atinna karaenga siagang sikamma pagawe-pagawe pamarentaya.

⁴Sangnging tau a'bali' ballang siagang tau tamattantua ngaseng nyawana ke'nanga. Pangngabirissinna ke'nanga rapangi pepe' lalang ri pattunuang tenaya nanipicorai pepe'na ri papare' rotia lalang tenanapa nasadia leokanna untu' nitunu.

⁵Ri allo passua'-suarranna karaenga, napainungi ke'nanga karaenna siagang sikamma pagawe-pagawena karaenga sa'genna nasa'ring siagang nagaukang katoloanga. Kale'bakkanna assannang-sannammi karaenga siagang sikamma anjo tau a'bali' ballanga.

⁶Rapang pepe' lalang ri pattunuanga kammami anjo batena a'bara kaerokang ja'dala'na siagang kalarroanna lalang ri atinna sipattang kabusu', na ri bari'basa'na a'rinra lompomi a'jari pepe' a'jalloka.

⁷Lalang allumpana larrona, nabunomi pamimping-pamimpinna ke'nanga. A'le'basa'mi nabuno ke'nanga sikontu karaenga. Mingka manna pole na'jari kammamo anjo kodina kaadanga, tena sikali manna sitau appala' doang mae ri Nakke untu' nitulung.”

⁸Nakana Batara, “Bansa Israel assibengkoroki siagang bansa-bansa maraeng niaka ri tammulilina ke'nanga, sa'genna a'jari ke'nanga rapang roti ti'no' sualia.

⁹Tanaassengai kalenna ke'nanga angkanaya lanri assibengkoro'nami ke'nanga siagang anjo bansa-bansa maraenga, natappela'mo kagassinganna ke'nanga. A'reppese'mi allo kala'busanna riwaya'na ke'nanga, mingka tanaassengai kalenna ke'nanga.

¹⁰A'nassai nicini' katampoanna tu Israel siagang iaminjo a'jari butti mae ri kasalanna ke'nanga. Manna pole nakajariang ngasemmo anjo sikammaya, tena tongijapa naboyA' ke'nanga yareka ammotere' mae ri Nakke, Karaeng Allata'alana ke'nanga.

¹¹Anrai' kalauki a'lampa tu Israel rapang jangang-jangang bodobangkeng toloa. Uru-uruna a'lampai taunna mange ri Mesir appala' bantuang, nampa lari mange ri Asyur.

¹²Mingka sampang allaloi ke'nanga, attannangA' sikko' nampa Kujakkala' ke'nanga rapang tau anjakkalaka jangang-jangang. LaKuhukkungi ke'nanga lanri sikamma kaja'dallanna ke'nanga Kuassengamo.

¹³Cilakai ke'nanga, lanri nabokoiMa' ke'nanga. Laancuruki ke'nanga lanri angngewana mae ri Nakke. ErokKa' ampasalamaki ke'nanga, mingka ibadana ke'nanga mae ri Nakke anu tena nakontutojeng.

¹⁴Tena nattojeng-tojeng ke'nanga appala' doang mae ri Nakke. Punna appala' doangi ke'nanga, napatappasaki kalenna naung ri katinroanga, siagang appiraungi ke'nanga sangkamma nagaukanga tau tenaya natappa' mae ri Nakke. Punna appala' doang ke'nanga untu' appala' gandung siagang anggoro', naloko'-lokoki kalenna ke'nanga sangkamma nagaukanga tu anynyombaya mae ri rewataya. Ma'nassa angngewa tojeng-tojengi ke'nanga ri Nakke!

¹⁵Manna pole naiNakke ampakalompoi siagang ampakagassingi ke'nanga, mingka assikongkoloki ke'nanga angngewa ri Nakke.

¹⁶Tulusu' amminawanna ke'nanga ri rewata-rewata tena sikalia koasana. Takkulleai nipattoang ke'nanga, rapang anrong pana akkombeka otere'na. Tampoi a'bicara pamimping-pamimpinna ke'nanga, passala' kammanami anjo nalanibuno ke'nanga siagang pa'dang, na nikakkali ri tu Mesir.”