Read Makassar Version – KITTA' MATANGKASA HOSEA 8 Bible Online

HOSEA 8 - Makassar Version – KITTA' MATANGKASA bible

HOSEA 8

¹Nakana Batara, “Pasa'rai tanra bahayaya! Niaki musua ambunduki pa'rasangangKu rapang balangkoa' antamberoai apa lanakanrea! UmmakKu nadakkai parjanjiangKu siagang ke'nanga, siagang nabaliangi ajarang-ajarangKu.

²Manna pole nakkio' Allata'ala ke'nanga mae ri Nakke siagang nakana ke'nanga ummakKu tappaka mae ri Nakke,

³mingka taerokai ke'nanga antarimai apa bajika. Lanri kammana anjo nalaniondammo ke'nanga ri musu-musunna ke'nanga.

⁴Ammilei ke'nanga karaeng natena nappitangara' mae ri Nakke. Angngangkaki pamimping natena napalaki passitujuangKu. Naallei bulaenna siagang pera'na ke'nanga nampa appare' patung barhala angngeranga kaancurang mae ri kalenna ke'nanga.

⁵BirisikKa' ri sapi bulaeng nisombaya ri pandudu'na kota Samaria. Larro duduA' mae ri ke'nanga. Kemaepi sa'genna ke'nanga latulusu' nara'massi kalenna anynyomba ri barhalaya?

⁶Anjo sapi bulaeng nisombaya ri Samaria bate pare'na sikamma tau cara'de'na tu Israel! Anjo kammaya teai Allata'ala, siagang musti niancuruki!

⁷UmmakKu appakioroki anging jari lakkattoi anging lompo! Tena nadidi rappo gandunna ke'nanga, jari talanggappayai labu' untu' kanrena ke'nanga. Mingka punna padeng didi anjo gandunga, lala'busuki nikanre ri bansa-bansa maraenga.

⁸Rapang uring reppeka, kammami anjo tu Israel tenamo anggaranna, siagang a'jarimi bansa biasa sangkamma bansa-bansa maraenga.

⁹Rapang keledai liara' tenaya namannuruki, kammami anjo tu Israel sangnging ero' kalenna naturukiang. A'boyai ke'nanga bantuang battu ri Asyur, siagang ammalli ke'nanga passari'battangang battu ri bansa-bansa maraenga.

¹⁰Mingka manna nakamma laKupasse'rei siagang laKuhukkungi ke'nanga. Tasalloami nalakkunrareng ke'nanga napakamma sessa, punna nijallakkang ke'nanga ri karaeng Asyur.

¹¹Pila' jai tampa' pakkoro'bangngang nibangung ri tu Israel untu' antangkasi dosaya, pila' jai tongi tampa'na ke'nanga untu' anggaukangi dosaya!

¹²AnnulisiKa' jai sikali pangngajarang untu' ke'nanga, mingka kabusu'na anjo natolla' ngasengi ke'nanga, lanri nakanana tena passisambunganna ke'nanga siagang anjo pangngajaranga.

¹³Nangai ke'nanga assare koro'bang mae ri Nakke, siagang angkanrei anjo dageng koro'banga, mingka iNakke Batara, tena Kusannang mae ri anjo koro'bang-koro'banga. Kamma-kamma anne laKuu'rangi dosana ke'nanga siagang laKuhukkungi ke'nanga lanri anjo dosa-dosana; laKukiringi ammotere' ke'nanga mange ri Mesir!

¹⁴Ambangungi tu Israel siapa jaina balla' karaeng, mingka nakaluppai ke'nanga angkana inai ampa'jari kalenna. Natambai tu Yehuda kota-kota pattahanganna napila' jai, mingka lappaturungA' pepe' untu' antunui sa'genna cappu' sikamma balla' lompona siagang kota-kotana ke'nanga.”