Read Makassar Version – KITTA' MATANGKASA YO"EL 2 Bible Online

YO"EL 2 - Makassar Version – KITTA' MATANGKASA bible

YO"EL 2

¹Tuiki tarompeka, pasa'rai tanra bahayaya ri Bulu' Sion matangkasaka, ri pammantangnganNa Allata'ala. Annekkere' mako, he pandudu'na Yehuda! Nasaba' a'reppese'mi AllonNa Batara siagang tasalloami nabattu.

²Anjo alloa sassang makkapuki, rassi allung anremeng-remeng. Para battui tantara katimbanga rapang rammang takka'ranga irate ri moncong. Tena le'bakai battu kajariang kammaya, na tena todong nalakajariang ribokoangannaya.

³Rapang pepe' akkanrea siagang appakamutung naputtai ke'nanga sikontu lamung-lamunga. Riolo, anjo pa'rasanganga rapangi Eden, iamintu kokonNa Batara, kale'bakkanna, santanja'mi parang kassi' kalotoroka. Tenamo nia' ammantang tassesa, tena sikali ta'lappasa' battu ri pa'bakkaina ke'nanga.

⁴ Tanja'na ke'nanga sangkammai jarang; larina kontui jarang ri pa'bundukanga.

⁵A'lumpa'-lumpa' ke'nanga ri coppo' monconga, sa'ranna kontui sa'ra galutturu'na kareta pa'bundukanga siagang a'rete'na pepe' akkanreya. A'barrisiki kontu pasukang barania, sadiaya maju mange ri pa'bundukanga.

⁶Ri wattu a'bakkana ke'nanga, annekkere' kabusuki taua, sikontu tanjaka pi'lasa' ngaseng kontu tenaya cera'na.

⁷Kontu tubarani, a'bakkai maju ke'nanga, nampa naambi' temboka rapang pejuanga. A'barrisiki ke'nanga lambusu' mange ri dallekang, ta'lekko-lekkoai yareka tanapinrayai mangeanna.

⁸Tena nasiassa'-assa' ke'nanga, massing ri garisi'na tonji a'jappa. Appada-padai ke'nanga allappoi sikontu pattahangnganga, takkulleai nitahang barisanna ke'nanga.

⁹A'bakkai ke'nanga antama ri kotaya, nampa lari rate ri tembo'na. Angngambiki ke'nanga antama' ri sikamma ballaka; rapang palukka', antamaki ke'nanga battu ri jandelaya.

¹⁰ Lalang majuna ke'nanga, annekkereki buttaya, siagang langika amme'bereki. Nampa sassang alloa siagang bulanga, na lanynya'mo cayana sikamma bintoenga.

¹¹ Assa'ra gunturu'mi sa'ranNa Batara assare parenta, mae ri tantarana. Tamaka jaina pasukanna! Tamaka kassa'na anjo tantara anggaukangai parentaNa! Tojeng tamaka lompona siagang heba'na AllonNa Batara! Tena manna sitau akkulle attahang.

¹²Nakana Batara, “Mingka kamma-kamma anne, pakkalepumi atinnu ammotere' mae ri Nakke, nuppuasa, appiraung siagang angngarru'.

¹³Teako pakeannu nukae-kae mingka atinnu.” Assaile mako mae ri Karaeng Allata'alanu. Sarro sa'baraKi siagang lompo panynyayang lammoro' pa'maiKi na mangngamaseang. Nangai appamopporang siagang taNangaiyai anghukkunga.

¹⁴Barang ero'ji Karaeng Allata'alanu ampinrai ero'Na, na Nabarakkakiko alla'bi-la'bi. Sa'gennu akkulle ngaseng angngerang passare koro'bang anggoro' siagang gandung mae ri Batara, Allata'alanu.

¹⁵Tuiki tarompeka ri Sion, bulu'Na Allata'ala, pa'la'bangi pappiassengang allo puasaya, apparekko passibuntulang lompo.

¹⁶Pa'rappungi sikontu ra'yaka, pabattu ngasengi sikamma ummaka. Suroi battu sikamma tau toa-toaya, ana'-anaka siagang ana'-ana' loloa pole. Ba'lalo manna sikamma bunting berua musti battu tongi. Suroi ke'nanga ambokoi kamara'na.

¹⁷Suroi sikamma imanga allayani Batara, angngarru' ri alla'na tampa' pakkoro'bangnganga siagang ri tampa' pattiro-tiroang ri dallekanga, na angkana, “Kisayang laloi ummatTa, o Batara; teaKi' lappassangi taunTa nicalla,” sa'genna appiandere' bansa-bansa maraenga siagang angkana, “Kemaeji Allata'alana ke'nanga?”

¹⁸Nampa Naparhatikang Batara buttaNa, siagang Nakamaseang umma'Na.

¹⁹Appialimi ri ke'nanga kamma anne, “Kamma-kamma anne Kusare ngasengko: gandung, anggoro' siagang minynya' zaitun untu' kanre-kanreang, sollannu nibassori ngaseng. Tena nalaKupa'biangko nihina yareka nikakkali ri bansa-bansaya.

²⁰Anjo pasukang katimbang niaka battu wara' laKubongkai, sipa'gang Kuondangi mange ri parang kassika. Mange ri Tamparang Matea laKulusuru' barisang ri dallekang, mange ri Tamparang Tangngaya Kusorong barisang ri bokoanna. La'rasai sikamma bakkena. Kuancuruki ke'nanga lanri le'ba'na ke'nanga ansessa ngasengko.

²¹Teako mallakki, he kokoa, pakasannangi atinnu; u'rangi gau' malompo Nagaukanga Batara mae ri kau!

²²He sikamma bintoenga, teako lussakki. Parang-parang rukuka kamma-kamma anne moncong bulomi. Roasa'mi rapponna poko'-poko' a'rappoa, alla'bi-la'bimi rappo anggoroka siagang rappo araya.

²³He ra'ya' Sion, rannu mako! Ma'reja-rejako nu ma'rannu-rannu! Lanri sikontu kabajikang battua ri Karaeng Allata'alanu. Ri wattu timoroka Napaturungangko bosi siganna'na. Ri wattu baraka Napaturungi bosia, kammayatompa ri wattu a'rappona rappo-rappoanga kamma riolo.

²⁴Jari nia'mo pole gandung lambonei panggilinganga; anggoroka siagang minynya' zaitunga lalla'bi battu ri tampa' pammaccokanga.

²⁵LaKusambei sikontu karugiannu ri taung-taung nakanrena katimbang wassele' lamung-lamunnu. Nasaba' iNakke angkiringi battu anjo pasukang katimbanga mae ri kau.

²⁶Lagannakko ri kanre-kanreang siagang labassoroki nusa'ring. Lanupakala'biriki Karaeng Allata'alanu, nasaba' Nagaukangi mae ri kau jai gau' malompo. UmmakKu tenamo nalanicau-cau!

²⁷Jari nuasseng ngasemmi, he Israel, angkanaya niakKa' ri tangnga-tangnganu, siagang angkanaya iNakkemi Batara, Allata'alanu. Tena Allata'ala maraeng, pantarangannaya iNakke KalengKu. Tenamo nalanipakasiri' poleang ummakKu!”

²⁸ “Le'baki anjo, sikontu taua laKupilumpai ngasengi siagang RohKu. Na sikamma ana'nu bura'ne baine lanapabattui pasang-pasangKu; tutoa-toa niaka ri alla'nu langgappai pappiso'na turungkaya bura'ne baine langgappai paccini'.

²⁹Anjo wattua laKupaturung tongi RohKu mae ri sikamma palayang-palayang bura'ne baine.”

³⁰Jai gau' malompo laKugaukang ri langika siagang ri buttaya. Lania' cera' assolong, pepe' a'rinra siagang umbu a'gompo.

³¹ Mataalloa la'jari sassangi siagang bulanga la'jari ejai sangkamma cera'. Kabusu'na anjo lakajariangi lalang tenanapa nabattu AllonNa Batara, iamintu allo hebaka siagang appakamalla'-mallaka!

³² Mingka inai-nai appala' pannulung mae ri Batara, iami lanipasalama'. Nakana Batara, “Ri Yerusalem sikamma tau Kupilea lasalamaki.”