Read Makassar Version – KITTA' MATANGKASA YO"EL 3 Bible Online

YO"EL 3 - Makassar Version – KITTA' MATANGKASA bible

YO"EL 3

¹Nakana Batara, “Anjo wattua laKupoterangi kacopponganna Yerusalem siagang Yehuda.

²Sikontu bansaya laKupasse'rei nampa Kuerang mange ri Ka'bung Pangadelanga. Nampa Kuadeli ke'nanga anjoreng lanri kaja'dallanna ke'nanga mae ri ummakKu, iamintu lanri nabage-bagena butta Israel nampa napela' ummakKu mange ri a'rupa-rupa pa'rasangang.

³Nagoccangi ke'nanga untu' ampattantui angkanaya inai anggappai tunitahanga. Nabalukangi ke'nanga tuloloa siagang turungkaya untu' nipa'jari ata. Nampa doe'na napakei ke'nanga assundala' siagang untu' angnginung anggoro'.

⁴ LanuapA' anne, he Tirus, Sidon siagang sikontu daera Filistin? Maka erokko a'balasa' mae ri Nakke? Jari, tarimami pa'balasakKu lintaka battu mae ri kau.

⁵Le'ba'mi nuella' bulaengKu siagang perakKu, siagang barang-barang ka'jalakKu nulalingi mange ri balla' rewatanu.

⁶Pandudu'na Yehuda siagang Yerusalem nuerangi a'lampa bella battu ri pa'rasanganna; nampa nubalukang mae ri bansa Yunani.

⁷Kamma-kamma anne laKuerangi assulu' battu ri tampa'na ke'nanga nubalukang, siagang laKubalasaki kaja'dallannu mae ri ke'nanga.

⁸Ana'nu bura'ne baine laKubalukangi mae ri pandudu'na Yehuda, nampa nabalukang ke'nanga mae ri Syeba, iamintu pa'rasangang sannaka bellana. INakke, Batara, anne akkana.

⁹Pa'la'bangi pabattu anne passalaka mae ri bansa-bansaya, angkanaya: Sadiako untu' a'bundu siagang ampa'lappoi kagassingannu! Pagioki sikamma tubaraninu siagang tuporea karenanna; passe'rei sikontu tantaraya, siagang maju mako!

¹⁰ De'deki mata pa'jekonu a'jari pa'dang, siagang berang pa'battasa'nu a'jari badi'. Kammayatompa tau lammaya musti angkanai, ‘Akkullea' a'bundu' sangkamma tantaraya!’

¹¹Umba, battu mako linta', he sikontu bansa-bansaya battu attammulili! A'rappungko anjoreng ri ka'bunga.” O Batara, suro laloi tantaraTa ambunduki ke'nanga!

¹²Nakana pole Batara, “Sikamma bansaya musti sadiai siagang a'lampai mange ri Ka'bung Pangadelanga. AnjorengA' langngadeli bansa-bansa singngampi'na ummakKu.

¹³ Sanna' ja'dala'na ke'nanga; te'baki ke'nanga rapang gandung ti'noka ri kokoa. Onjo'-onjokangi ke'nanga rapang anggoro' niaka lalang ri pammaccokanga, rassia sa'genna tattumpa.

¹⁴Assa'bu-sa'bui tau ri Ka'bung Pangadelanga. Nasaba' anjoreng labattui silalonna AllonNa Batara.

¹⁵Mataalloa siagang bulanga a'jari sassanga siagang bintoenga tenamo naccaya.”

¹⁶ Ammammuki Batara battu ri Sion, iamintu bulu'Na; battu ri Yerusalem a'gunturu' sa'ranNa. Langika siagang buttaya ta'goccangi napakamma. Mingka tuli laNaalleangngangi siagang Najagai Batara iamintu Israel, umma'Na.

¹⁷“He Israel, kamma-kamma anne lanuassemmi, angkanaya iNakke Karaeng Allata'alanu. AmmantangA' ri Sion, bulu' matangkasakKu. Na Yerusalem a'jari tongi kota matangkasa', talantamakkami bansa maraenga.

¹⁸Ri anjo wattua sikamma monconga larassi koko anggoro'. Olo'-olo' niparakaia langnganrei ruku' ri bulu'-bulu' copponga. Sikamma binangaya ri Yehuda tena le'bakai lala'busu' je'ne'na. Se're binanga lassolong battu ri Balla'Na Batara, na nabasai Ka'bung Akasia siagang je'ne' nyamang.

¹⁹Mesir la'jari parang kalotoroki, Edom la'jari rosoki, tena tau ampammantangngi. Nasaba' le'baki nabunduki tu Yehuda, siagang nabuno pandudu'na pa'rasangang tenaya salana.

²⁰LaKupa'balassangi cera'na ke'nanga assolonga, inai ambunoi ke'nanga laKute'baki. Mingka pa'rasangang Yehuda siagang Yerusalem tuli lania' bonena, siagang Bulu' Sion tuli laKupammantangngi.”