Read Makassar Version – KITTA' MATANGKASA AMOS 2 Bible Online

AMOS 2 - Makassar Version – KITTA' MATANGKASA bible

AMOS 2

¹ Nakana Batara, “Pandudu'na Moab a'mole-molei doraka, lanri kammana anjo ma'nassa laKuhukkungi ke'nanga. Nahinai ke'nanga Karaeng Edom anjo mateamo, iamintu nabongkaraki jera'na siagang naallei buku-bukunna nampa natunu a'jari au.

²Lanri kammana anjo, lakkiringA' pepe' mange ri pa'rasangang Moab, siagang Kutunu sa'genna cappu' sikamma pattahanganna Keriot. Lamatei tu Moab ri tangnga-tangnga karicuanna pa'bundukanga, iamintu lalang nipasa'rana tarompeka siagang nipakkiokanna pakkio' pa'bundukanga.

³Pamarentana Moab siagang sikontu pagawe pamarentana laKubuno kabusuki.”

⁴Nakana Batara, “Tu Yehuda a'mole-molei doraka, lanri kammana anjo ma'nassa laKuhukkungi ke'nanga. Nadakkai ke'nanga parenta-parentaKu siagang tanajampangiai ajarang-ajarangKu. Nipa'lingui ke'nanga ri rewata-rewata maraenga nasombaya boe-boena ke'nanga.

⁵Lanri kammana anjo, lakkiringA' pepe' mange ri Yehuda siagang Kutunu sa'genna cappu' sikamma pattahanganna Yerusalem.”

⁶Nakana Batara, “Tu Israel a'mole-molei doraka, lanri kammana anjo ma'nassa laKuhukkungi ke'nanga. Tau lambusu' tenaya nakkulle ambayaraki inranna, nabalukangi ke'nanga a'jari ata. Kammatommi anjo panggaukanna mae ri tu kasi-asia tenaya nakkulle ambayaraki inranna, manna pole naanjo inranna anggarang sipammalli sandala'ji bawang.

⁷Najallakkangi ke'nanga tau tenaya pakkullena siagang lammaya, kammayatompa napakabellai tu kasi-asia. Manggea siagang anaka nagauki se'rea ata baine narua-ruai, sa'genna nara'massi areng matangkasakKu.

⁸Ri sikamma tampa' ibadaya, attinroi siagang baju napappita'gallanga na naalle tulusu' battu ri tu kasi-asia. Ri Balla'Na Allata'alana ke'nanga, angnginung anggoro' naallea battu ri tau niaka inranna mae ri ke'nanga.

⁹ Mingka manna nakamma, he ummakKu, untu' ikaumi naKupanraki tu Amori tinggia kalenna rapang poko' camara siagang kassaka rapang poko' kayu terpentin.

¹⁰Le'ba' mako Kuerang assulu' battu ri Mesir, siagang Kururunganga allalo ri parang kassika patampulo taung sallona. Buttana tu Amori le'ba'mi Kupassareang mae ri kau a'jari pa'rasangannu.

¹¹ Le'ba'mi Kupilei siapa are battu ri ana'-ana'nu untu' a'jari na'bi, siagang siapa are turungka untu' a'jari tu Pangawasa'. Sai anjo kammaya annabai, he tu Israel? INakke, Batara, anne akkana.

¹²Mingka nusarei anjo Pangawasaka angnginung anggoro', sa'genna takkaluppa ke'nanga ri janjinna. Siagang ikau ngaseng nupisangkai na'bi-na'bia ampabattui pasangKu.

¹³Kamma-kamma anne laKujallakkang kabusukko sa'genna naung ri buttaya, sa'gennu akkunrareng kontu sa'ranna kareta rassi dudua gandung luranna.

¹⁴Manna tau gassinga lari tena todong nakkulle lata'lappasa'; tau gassinga latappelaki kagassinganna, siagang tau porea takkulleai napasalama' kalenna.

¹⁵Tau angngeranga pana talattahangngai, tau gassinga lari takkulleai lari, siagang padongko' jaranga takkulleai lata'lappasa'.

¹⁶Ri anjo alloa manna tantara kaminang barania lanabokoi tongi sanjatana nampa lari. INakke, Batara, anne akkana.”