Read Makassar Version – KITTA' MATANGKASA AMOS 3 Bible Online

AMOS 3 - Makassar Version – KITTA' MATANGKASA bible

AMOS 3

¹Pilangngeri anne pasanNa Batara, he Bansa Israel le'baka nierang assulu' battu ri Mesir ri Batara! Nakana Batara,

²“Battu ri sikontu bansaya ri lino, ikaumi se're-se'rea bansa Kuassenga siagang Kuparhatikanga. Iaminjo saba'na nalompo dosanu, siagang ma'nassa laKuhukkung ngasengko.”

³Maka akkullei taua a'lampa sipa'rua punna tena nasipato la'bi riolo?

⁴Maka lammammuki singaya ri romanga, punna tena nanggappa kanre? Maka lammammuki ana' singaya battu ri leanna punna tenapa apa-apa nagappa?

⁵Maka laniallei ri sikko' jangang-janganga lalang sikkoka, punna tena nitannangi sikkoka? Maka latattongkoki sikkoka punna tenapa apa-apa najakkala'?

⁶Maka latena nannekkere' tau ri kotaya punna nalangngere' sa'ra tarompe' tanra pa'bundukanga? Maka akkullei natuju bala se'rea kota, punna tena Napabattui Batara?

⁷Tena le'bakai Batara Kaminang Tinggia anggaukang apa-apa punna tena Napa'nyatai rancanaNa mae ri sikamma na'bia, ata-atanNa.

⁸Punna ammammu' singaya, inaimo tena namalla'? Punna a'bicara Batara Kaminang Tinggia, inaimo akkulle ammakkang siagang taeroka ampa'la'bangi pasanNa?

⁹Pa'la'bangi pabattu mae ri tau ammantanga ri balla' karaenga ri Mesir siagang Asdod angkana, “A'rappung ngasengko ri moncong-moncong tammulilina Samaria, siagang parhatikangi karicuang lompoa kammayatompa pammaccokang nigaukanga anjoreng.”

¹⁰Nakana Batara, “Sikamma anjo taua nabonei balla'-balla' karaenna ke'nanga siagang barang-barang nagappaya battu ri gau' ammacco' siagang gau' palla'. Ba'lalo tena sikali nangngasseng ke'nanga anggaukangi gau' lambusuka.

¹¹Lanri kammana anjo lanikurungi pa'rasanganna ke'nanga ri musu, lania'moroki pattahanganna, siagang laniellaki sikamma balla' karaenna ke'nanga.

¹²Rapang sitau pakalawaki anggappayai ammotere' bangkenna mami yareka sipolong mami tolinna gimbala'na le'baka nikanre ri singa, kamma tomminjo sike'de' dudu mami lammantang battu ri pandudu'na Samaria attinro baji'-bajika pakkasia'na ri katinroang ga'gana.”

¹³Nakana Batara Kaminang Makoasaya siagang Kaminang Tinggia, “Parhatikangi kamma-kamma anne, siagang pakaingaki jari-jarina Yakub.

¹⁴ Ri allo Kuhukkunna tu Israel lanri dosana, laKuputtai tampa'-tampa' pakkoro'bangnganga ri Betel. Tunggala' tampa' pakkoro'bangnganga lanitepoki cappa'-cappa'na sa'genna tu'guru' naung ri buttaya.

¹⁵Sikamma balla' untu' wattu dinginga siagang balla' pammari-marianga ri wattu timoroka laniancuruki. Sikamma balla' nibelo-beloa siagang gading gajaya lanirumbangi; sikontu balla' karaenga laniancuruki.