Read Makassar Version – KITTA' MATANGKASA AMOS 5 Bible Online

AMOS 5 - Makassar Version – KITTA' MATANGKASA bible

AMOS 5

¹Pilangngeri he umma' Israel! Erokka' ampakkelongangko se're kelong-kelong susa, kammaya anne:

²Tu'guru'mi Israel anjo tuloloa ija, talambangungami ammotere'! Irate ri butta kalenna nibalang parekang, tena ambantui ammenteng nai'.

³Nakana Batara Kaminang Tinggia, “Nia' se're kota ri Israel appagio' sisa'bu tantara, mingka ammotereka sibilangngang mami; kota maraenga appagio' sibilangngang tau, ammotereka sampulo mami.”

⁴Nakana Batara ri umma' Israel, “Ammotere' mako mae ri Nakke, na nulattallasa'.

⁵Teako a'lampai mange ri Bersyeba untu' anynyomba. Teako boyaiA' ri Betel, nasaba' lalanynyaki Betel. Tea tongko a'lampai mange ri Gilgal, nasaba' pandudu'na anjo kotaya laniengkaki mange ri pammelakkanga.”

⁶Ammotere' mako mae ri Batara, na nulattallasa'. Punna tammoterako mae ri Ia, labattui kontu pepe' a'le'lereka siagang antunui sa'genna cappu' sikontu tu Israel. Ri Betel tena manna sitau akkulle ambunoi anjo pepeka.

⁷Cilaka ngasengko, ikau tau amputara' balekai kaadelanga siagang tau anjallakkangai ha'na taua!

⁸ Batara ampareki sikamma bintoenga ri langika — bintoeng Belanti' siagang bintoeng Kartika. Napinrai sassanga a'jari singara' siagang alloa a'jari bangngi; je'ne' battu ri tamparanga Natumpai nai' ri bontoa. Anggaukanga ngasengi anjo sikammaya iamintu Batara arenNa.

⁹Napanraki tau ammarentaya siagang pattahanganna ke'nanga.

¹⁰Nukabirisi tau angngewayai tenaya naadele' siagang a'bicara kontutojenga ri pangadelanga.

¹¹Nujallakkangi tu kasi-asia siagang nurampasaki gandunna. Lanri kammana anjo talammantangnga mako lalang ri balla'-balla' ga'ganu, anjo le'baka nubangung. Tenamo nulangnginung anggoro' battu ri koko-koko anggoro' le'baka nulamungi.

¹²Kuassengi antekamma lompona kaja'dallannu siagang antekamma jaina dosanu. Nujallakkangi tau bajika; annarimako doe' nipacoco' siagang nubalang parekangi tu kasi-asia nigau' taadele' ri pangadelanga.

¹³Lanri anjo panggaukannu, nabajikangngammo nasa'ring tucara'deka a'mereki mamo ri anjo jammang kaja'dallanga.

¹⁴Appattujuang mako a'gau' baji' siagang tea' mako a'gau' ja'dalaki, sollannu akkulle attallasa'. Na Batara Kaminang Koasaya ma'nassa lammantang tojengi ri tangnga-tangnganu sangkamma nukananga.

¹⁵Kabirisi kaja'dallanga, siagang mangngaiko ri kabajikanga, paentengi kaadelanga. Gassingka laNakamaseangi Batara sikamma tau tassesaya battu ri bansa Israel.

¹⁶Nakana Batara Kaminang Koasaya, “Ri agang-agang kotaya, lappiraungi siagang lakkunrarengi taua lanri si'nana pa'mai'na. Ba'lalo sikamma pamarria lanikioki untu' amminawang angngarru' siagang sikamma tau nibayaraka untu' angkarruki tau matea.

¹⁷Ri sikontu koko anggoroka, lappiraungi taua lanri battuA' anghukkungko. INakke Batara, anne akkana.”

¹⁸Tojeng, cilaka ngaseng mako tau nakkuka ri AllonNa Batara! Apa matu-matunna anjo alloa mae ri kau? Anjo alloa poro allo sassanji bawang, teai allo singara' mae ri kau.

¹⁹Kaadaanna rapangi tau laria battu ampilari singaya, nampa assibuntulu' siagang beruang. Yareka kontui tau ammotereka mae ri balla' nappatungkulu' siagang limanna mae ri temboka nampa nipitto' ri ulara'!

²⁰AllonNa Batara memang angngerangi sassang, teai singara' — allo sassanga napakamma rammang.

²¹ Nakana Batara, “Kukabirisi siagang lanreA' anciniki passua'-suarranna agamanu!

²²Punna angngerangko koro'bang nitunu siagang koro'bang gandung, tena nalaKutarima. TaeroKa' antarimai anjo olo'-olo'nu co'moka nupassareanga mae ri Nakke salaku koro'bang passiamakkang.

²³Sambei kelong-kelonnu anjo appakatongoloka; taeroKa' ampilangngeri karena kacapinnu.

²⁴Bajikangngangi appatujuangko sollanna a'lo'loro' kaadelanga rapang je'ne', siagang kalambusanga rapang binanga tenaya nale'ba' kalotoro'.

²⁵ He umma' Israel, ri wattunnu Kururungang allalo ri parang lompo patampulo taung sallona, tena Kuppala' passare siagang koro'bang battu ri kau ngaseng.

²⁶Mingka kamma-kamma anne anynyombako mae ri Sakut anjo nukanaya karaennu, siagang Kewan, anjo bintoeng nukanaya rewatanu. Lanri kammana anjo, anjo sikamma patung nupareka musti kalennu angngengkaki.

²⁷Punna Kupelakko mange ri se'reang pa'rasangang la'bi bellaya battu ri Damsyik. INakke Batara niarenga Allata'ala Kaminang Koasaya, anne akkana.”