Read Makassar Version – KITTA' MATANGKASA AMOS 8 Bible Online

AMOS 8 - Makassar Version – KITTA' MATANGKASA bible

AMOS 8

¹Anggappa' pole se're paccini' battu ri Batara Kaminang Tinggia. Nia' kucini' se're karanjeng nibonei rappo-rappoang ti'no'.

²Akkuta'nangi Batara ri nakke angkana, “Apa nucini' Amos?” Appialima' angkana, “Se're karanjeng nibonei rappo-rappoang ti'no'.” Nakanamo Batara, “Narapi'mi wattunna mae ri ummakKu Israel, rapang rappo-rappoang ti'nokamo. Tenamo nalaKupinra pole rancanaKu siagang ma'nassa laKuhukkungi ke'nanga.

³Ri anjo alloa sikamma kelong-kelonga ri balla' karaenga la'jari karruki. Kemae-kemae attambung mayaka, le'baka nipela' cokko-cokko.”

⁴Pilangngeri, he ikau ngaseng anjallakkangai tu kasi-asia ri anne pa'rasanganga sa'genna panra' ke'nanga!

⁵Nukana ngaseng mae ri kalennu, “Teai sipato' sallona allo-allo passua'-suarranga. Erokki' akkaro-karo mange ambalukangi gandunta, mingka anne passua'-suarranga tena le'ba'-le'ba'na. Angngapapi nale'ba' anne allo Pammari-marianga, sollanta akkullemo a'balu pole? Erokki accatu', annipu ri pa'baku' siagang jekkong ri timbanganga.

⁶Gandung panraka akkullei nibalukang tinggi ballinna. A'boyaki' tu kasi-asi tenaya nakkulle ambayaraki inranna, manna pole nainrang sipammalli sandala' bawang, na niballi a'jari atanta.”

⁷Batara, Allata'alana Israel, le'baki assumpa angkana, “Tena sikali nalaKukaluppai panggaukang ja'dala'na ke'nanga.

⁸Lamme'bereki buttaya, siagang sikontu taua lasusa kabusuki nyawana. Sikontu pa'rasanganga lata'goccangi siagang kammai nitoeng Binanga Nil.

⁹Lanarapiki wattunna naKupalabu alloa ri tangnga alloa siagang a'jari sassangi linoa ri wattu alloa. INakke, Batara Kaminang Tinggia, anne akkana.

¹⁰Sikamma passua'-suarrannu laKupinrai a'jari kasusaang, siagang kelong-kelonnu a'jari karru'. LaKupa'jariko ikau ancukkuruki kalennu siagang ammakeko kaeng karung tanra si'na. Rapangko anrong mangge angkarruki kamateanna ana' sitau-tauna. Anjo alloa lakala'busangi a'jari allo sanna' appakasi'nana pa'mai'.”

¹¹Nakana Batara Kaminang Tinggia, “Lanarapiki wattunna naKupabattu bala kacipuranga ri anne pa'rasanganga. Lacipuruki taua, mingka teai lanri kanre. Laturerei taua, mingka teai lanri je'ne'. Cipuruki siagang turerei ke'nanga mae ri pasangKu.

¹²La'lampai taua timboro' wara' anrai' kalau' untu' amboyai pasangKu, mingka tanagappayai ke'nanga.

¹³Anjo alloa, ba'lalo manna tau rungka tamangngapa-apaya latena ngaseng nangngu'rangi napakamma turere.

¹⁴Sikamma tau assumpaya lanri barhala Samaria angkana, ‘Lanri rewatana bansa Dan’ yareka ‘Lanri rewatana Bersyeba’ — latu'guru' kabusuki siagang tambangungami pole.”