Read Makassar Version – KITTA' MATANGKASA OBAJA 1 Bible Online

OBAJA 1 - Makassar Version – KITTA' MATANGKASA bible

OBAJA 1

¹ Iaminne boto napabattua Na'bi Obaja; napabattui pasanNa Batara Kaminang Tinggia ri passala'na bansa Edom: Nakirimmi battu tunisuroNa Batara mae ri bansa-bansaya, siagang le'ba'mi nilangngere' pasang naeranga kamma anne, “Sadia mako untu' a'bundu'! Umba ki'lampa mange ambunduki bansa Edom.”

²Na mae ri Edom Nakana Batara, “Kupa'jari lammako sa'gennu nihina ri sikontu bansaya.

³Nitipuko ri atinnu tampoa. Ibukotanu iamintu moncong batu makassa'; tampa' pammantangannu iratei ri coppo'na moncong tinggia. Lanri kammana anjo nakanamo pikkirannu, ‘Inai todong lakkulle antu'gurangki'?’

⁴Manna pole nupare' balla'nu santinggi ru'munna jangang-jangang rajawali, siagang santinggi bintoenga ri langi', mingka ma'nassa laKutu'gurangko.

⁵Palukkaka yareka paella' battua ri wattu bangngi, poro nakaerokia bawang naalle. Tau angngattilika anggoro' ri kokoa, tuli nia' nasesa piram batu are. Mingka ikau lanibarrasakko ri musu-musunnu sa'gennu cappu'.

⁶He jari-jarina Esau, nigaledai siagang nialleang kabusukko barang-barannu manna taccokkoa.

⁷Nitipuko ri sikamma tau nuaganga sita'gala', siagang nibongkako battu ri pa'rasangannu. Nibetako ri agang-agannu, nitannangngiko sikko' ri tau nuaganga sipangnganreang. Napakkuta'nangngangko, angkanaya, ‘Kemae ngasemmi anjo kacara'dekanna?’

⁸Ri allo Kuhukkunna bansa Edom, Kupanraki sikamma tucara'de'na. Lalanynya' kabusu'mi kacara'dekanna ke'nanga, tena bate-batena.

⁹Sikamma tubarani battua ri Téman lanabattui malla', siagang sikontu tantarana Edom lamate kabusuki.”

¹⁰“Le'bakko a'gau' palla' mae ri sikamma sari'battannu iamintu jari-jarina Yakub. Lanri kammana anjo laKupanrakiko siagang nicallako ri taua lalang sikontuna jammanga.

¹¹Ammenteng bellako, ri allo battuna musua allappoi pakke'bu'na Yerusalem siagang nabeta anjo kotaya. Tena apa-apa nukana ri wattunna naengka' ngaseng ke'nanga kakalumanynyangnganna Yerusalem na nabage-bage ri ke'nanga. Sangkamma jako ja'dala'nu siagang anjo musua.

¹²Tena nusiratang lasannang nyawanu mae ri sare kodina tu Yehuda siagang rannu pa'mai'nu ri allo kapanrakanna anjo sari'battannu. Tena nusiratang a'bicara lompo ri wattu natujuna susa.

¹³Tena nusiratang antama' ri kotana ummakKu, siagang nuorre' sikamma tau pa'risika, la'biangampa nikanaya angngellaki ri allo natujuna nakasa' ke'nanga!

¹⁴Tena numusti ammenteng ri panyingkulu'na aganga, untu' angngadangi tau laria ampilari musua, yareka ampassareangi ke'nanga mae ri balia ri allo natujuna ke'nanga kasusaang.”

¹⁵“Tojeng, a'reppese'mi allongKu, iNakke, Batara untu' angngadeli bansa-bansaya. Apa nagaukanga tu Edom lanibalasaki mae ri kalenna. Lanakasia' tongi apa le'baka nagaukang.

¹⁶Irate ri bulu' matangkasakKu le'ba'mi nainung ummakKu inungang pangngebarranna hukkunganna. Mingka inungang mae ri bansa-bansaya ri buttaya anne la'bi paikangngangi pole. Takkulleai naliliang ke'nanga anjo hukkunganga. Musti nainungi ke'nanga sa'genna la'busu', nampa lalanynya' ke'nanga tena bate-batena.”

¹⁷“Mingka ri Bulu' Sion, lania' lasalama', siagang anjo buluka a'jari tampa' nisa'la' untu' iNakke. Jari jari-jarina Yakub lanapatangi ammotere' butta pisakana ke'nanga.

¹⁸UmmakKu Israel larapangi pepe' angkanrei jari-jarina Esau, rapang pepe' angkanreai sa'genna cappu' raramea ri kokoa. Tena manna sitau battu ri jari-jarina Esau akkulle lata'lappasa'. INakke, Batara anne akkana!

¹⁹Lanaempoi tu Yehuda timboranga pa'rasangang Edom. Sikamma tau battua ri pa'moncongang bageang ilauka lanabetai daera Filistin. Suku Benyamin lanaempoi Gilead, siagang Israel ummakKu lakoasai sikontu Efraim siagang Samaria.

²⁰Tu Israel waraka lammotereki battu ri pammelakkanga siagang naempoi Fenisia sa'genna Zarfat. Tu Yerusalem nipelaka mange ri Sardis, lammotereki siagang napatangi kota-kota bageang timboro'na Yehuda.

²¹Pandudu'na Yerusalem porea lanabunduki Edom nampa nabeta. Nampa iNakke Batara lammarenta salaku karaeng.”