Read Makassar Version – KITTA' MATANGKASA YUNUS 1 Bible Online

YUNUS 1 - Makassar Version – KITTA' MATANGKASA bible

YUNUS 1

¹ Ri se'reang allo a'bicarai Batara mae ri Yunus, ana'na Amitai.

²Nakana, “A'lampako mange ri Niniwe, anjo kota lompoa, untu' angngancangi, lanri Kuassengi angkanaya pandudu'na sanna' ja'dala'na.”

³Mingka ba'lalo a'lampa maraengi Yunus untu' ampakabellai kalenna battu ri Batara. A'lampa mangei ri Yopa, na sitabangi nia' kappala' ero' a'lampa mange ri Spanyol. Le'baki a'bayara' ongkoso' kappala', nai'mi ri kappalaka, nampa assombala' siagang ana' kappalaka mange ri Spanyol, untu' ampakabellai kalenna battu ri Batara.

⁴Naungi Yunus ri tampa' kaminang irawaya nampa anra'ba anjoreng, sa'genna jannang tinrona. Nampa appabattu Batara anging lompo naung ri tamparanga, sa'genna lompo bombanga antunrungi anjo kappalaka a'biring niancuru'. Teaimi sipato' malla'na ana' kappalaka siagang akkiok-kio'mi ke'nanga appala' tulung, massing-massing mae ri rewatana ke'nanga. Sollanna tena natallang kappalaka, napela'mi sipa'gang luranna kappalaka antama' ri tamparanga.

⁶Ri wattunna naung anjo juraganna kappalaka nabuntulu'mi Yunus anjoreng sitabang attinro. Nakanamo ri ia, “Angngapa nukkulle tinro kau lalang ri wattu kammaya anne! Ambangungko nai'! Appala' doangko mae ri rewatanu untu' appala' tulung. Inai angngassengi gassingka lanakamaseangki' sa'genna tena nipanra'.”

⁷Wattunna nai'mo Yunus siagang anjo juraganga, massing nakanamo para ia anjo ana'-ana' kappalaka, “Umba nanigoccangi arenga sollanna naniassengi angkana inai sala sa'genta nituju ri anne balaya!” Nagoccammi arenna ke'nanga, na arennamo Yunus nai'.

⁸Nakanamo ke'nanga mae ri Yunus, “Kammatojengi angkanaya ikau passabakkanna anne balaya? Battu kemaeko? Bansa apako? Angngapa nunia' anrinni?”

⁹Appialimi Yunus angkana, “Inakke tu Ibrani. Anynyomba' ri Batara, Allata'ala ri suruga, ampa'jariai tamparanga siagang bontoa.”

¹⁰Nampa nacarita antekamma batena appattujuang lari battu ri Batara. Nalangngere'na anjo kammaya, pila' malla'mi pole anjo sikamma ana'-ana' kappalaka, siagang nakana ke'nanga ri ia, “Ta'liwaki anjo panggaukannu!”

¹¹Lalang kammana anjo pila' lompomi bombanga, nampa akkuta'nammo sikamma ana' kappalaka ri ia angkana, “Apa musti nagaukang ikambe mae ri kau sollanna ammari anne anging lompoa?”

¹²Appialimi Yunus angkana, “Buanga' antama ri tamparanga, ma'nassa lammari anging lompoa. Nasaba' kamma-kamma anne kuassemmi angkanaya passabakkang inakke nanatuju ngasengko anne bombang lompoa.”

¹³Mingka napikulle-kullei iji sikamma ana' kappalaka ambisei anjo kappalaka mange ri bontoa. Mingka pila' a'jallo'ji bombanga, sa'genna tena matu-matunna usahana ke'nanga.

¹⁴Lanri kammana anjo akkio'mi ke'nanga ri Batara angkana, “O Batara, napalaki ikambe, tea' laloKi' panraki ikambe lanri niallena nyawana tau tenaya gau' salana mae ri kambe. O Batara, Kigaukangi apa Kikaerokia.”

¹⁵Nampa napasambila ke'nanga Yunus antama ri tamparanga. Apaji nammarimo bombanga a'jallo'.

¹⁶A'jari sanna'mi malla'na anjo sikamma ana' kappalaka mae ri Batara, siagang ri wattunna battu ke'nanga ri bontoa, assaremi ke'nanga koro'bang siagang a'rupa-rupami passala' napa'janjiang mae ri Batara.

¹⁷ Lalanna anjo wattua appabattumi Batara sikayu juku' sannaka lompona angnga'luki Yunus. Jari ammantammi Yunus lalang ri battanna anjo jukuka tallu allo tallu bangngi.