Read Makassar Version – KITTA' MATANGKASA YUNUS 2 Bible Online

YUNUS 2 - Makassar Version – KITTA' MATANGKASA bible

YUNUS 2

¹Battu lalang ri parru'na anjo jukuka, appala' doammi Yunus ri Karaeng Allata'alana. Nakana,

²“O Batara, lalang kasusaangku kukkio' mae ri Katte naKipialia'. Battu ri linona tau matea nakuppala' pannulung, Kipilangngeri siagang Kiparhatikang pappala' doangku.

³Kipasambila' antama' ri tampa' lantanga, sa'genna irawanganna tamparanga. Anjorenga' nitammulili ri lo'loro'na je'neka, napatappasakka' bombang lompoa.

⁴Kukana lalang ri atingku: Nabongkama' anne Batara battu ri dallekanNa. Talakucinikami pole Balla' pammantangang matangkasa'Na.

⁵Je'ne' tamparanga naiki ri muncengku, nikalimbuki kalengku ri tamparang lompoa, lu'mu' tamparanga angkaluki ulungku.

⁶Je'ne' tu'guruka narapiki bangkenna pa'monconganga, ri lino takkoncia pakke'bu'na sa'genna kala'busang jammang. Poso dudumi nyawaku lalang ri kalengku nampa angngu'rangia' siagang akkio' mae ri Katte. Nata'rapi'mo pappala' doangku mae ri Katte, antama' ri Balla' matangkasatTa. Nampa Kipanaika' battu lalang ri tamparanga, o Karaeng Allata'alaku!

⁸Tau anynyombaya ri barhala tenaya bua'-bua'na nabokoiKi' siagang tamajarrekami pa'mai'na.

⁹Mingka lakkelonga' pammuji mae ri Katte siagang assarea' koro'bang untu' iKatte. Sikontu janjingku lakurupai. IKatte Batara mappasalamaka.”

¹⁰Nampa lanri parentaNa Batara, anjo jukaka nalangngeammi Yunus nai' ri bontoa.