Read Makassar Version – KITTA' MATANGKASA YUNUS 4 Bible Online

YUNUS 4 - Makassar Version – KITTA' MATANGKASA bible

YUNUS 4

¹Tena sikali nasannang nyawana Yunus ri anjo passalaka; ba'lalo a'jari larromi.

² Nampa appala' doang nakana, “O Batara, sai le'ba'mi kupau ri tenanapa ku'lampa ri ballakku pirangalloang, angkanaya tantu laKigaukanna anne kammaya? Iaminjo saba'na nakutulusu' lari mange ri Spanyol! Kuassengi angkanaya iKatte Allata'ala assayang siagang angngamaseang, la'bu ri sa'bara', lamma siagang alusu' pa'mai', siagang tuli sadiaKi' untu' ampinrai rancanaTa anghukkung.

³ Kamma-kamma anne, o Batara, boli'ma' kamma mate, nasaba' bajikangnganga' matea naia attallasaka.”

⁴Appialimi Batara angkana, “Tena alasannu untu' a'jari larro kamma antu.”

⁵Nampa a'lampa Yunus mange ri ri rayanganna kotaya, nampa ammempo anjoreng. Appareki se're pa'balla'-ballakang nampa a'la'lang lalang, nampa attayang apa lakajarianga mae ri kota Niniwe.

⁶Appatimbomi Karaeng Allata'ala se're poko' a'lamba' akkullea alla'langngi Yunus sa'genna sannang nasa'ring. Memang, sannang sikali nyawana Yunus mae ri anjo lamung-lamunga.

⁷Mingka ammukona ri wattu subu, nia'mo sikayu gallang-gallang Napagio' Allata'ala angkekkeseki aka'na anjo lamung-lamunga, sa'genna a'jari kalumeng.

⁸Ri wattunna ammumbamo alloa, appabattumi Allata'ala anging bambang ammirika battu iraya. Sike'de' mami natenamo nangngu'rangi Yunus lanri nitujuna ri singara'na alloa, sangkammai angkanaya natunui ulunna. Tappu' panrannuammi siagang ero'mi mate. Nakana, “Bajikangngangi matea nattallasaka!”

⁹Mingka Nakana Allata'ala ri ia, “Tena nusiratang si'na kamma anjo passabakkang anjo lamung-lamunga!” Appialimi Yunus angkana, “Angngapa natena? Siratanga' larro sikali sa'gengku mate.”

¹⁰Nampa Nakanamo Batara ri ia, “Anne lamung-lamunga attimboi lalang sipattang bawang, nampa kalumeng ri allo ammukona; tena sikali nupatimboi siagang tena sikali nuparakai. Mingka manna nakamma a'jari si'na tonji nyawanu lanri kalumengi.

¹¹Maka tena nalasi'na nyawaKu ampikkiriki Niniwe, anjo kota lompoa. Nasaba' pantaranganna olo'-olo' tenaya nakkulle nibilang jaina anjo, anjoreng nia' todong tau la'bi ri 120.000 ana'-ana' tenayapa naissengi ampasimmaraengi apa bajika siagang apa ja'dalaka.”