Read Makassar Version – KITTA' MATANGKASA PAMMILANGNGANG 10 Bible Online

PAMMILANGNGANG 10 - Makassar Version – KITTA' MATANGKASA bible

PAMMILANGNGANG 10

¹Nakana Batara mae ri Musa,

²“Apparekko rua tarompe' battu ri pera' nide'de' untu' angkioki ra'yaka asse're yareka untu' assuroi ke'nanga a'lampa.

³Punna nitui' la'bu anjo ruaya tarompe', battuanna musti asse're ngasengi sikontu ummaka ri tammulilinu ri dallekanna pakke'bu' KemaKu.

⁴Mingka punna se'reja bawang nitui', battuanna sikamma pamimpinga bawang musti asse're ri tammulilinu.

⁵Punna nitui' bodo-bodoi tarompeka, anjo battuanna suku-suku akkemaya ri bageang iraya musti a'lampai.

⁶Punna makapinruanna nitui' bodo-bodo, suku-suku niaka ri bageang timboro' musti a'lampa. Jari anjo sa'ra bodo-bodoa battuanna musti a'lampai ummaka,

⁷nampa anjo sa'ra la'bua battuanna musti asse'rei ummaka.

⁸Anjo tarompeka musti nituiki ri sikamma imanga, ana'-ana'na Harun. Iaminjo paratorang mustia nuturuki sa'genna satunggu-tungguna.

⁹Na punna a'bundukko ri pa'rasangannu untu' ampartahangkangi kalennu mae ri musu battua ambundukiko, tuiki anjo tarompe'-tarompeka. Na iNakke, Karaeng Allata'alanu, labattu antulungko siagang ampasalamakko battu ri musu-musunnu.

¹⁰Kammayatompa ri allo-allo karannuannu, iamintu ri allo passua'-suarrang Bulang Beru siagang passua'-suarrannu maraengannaya, anjo tarompeka musti nituiki ri wattunnu assare koro'bang nitunu siagang koro'bang passiamakkang mae ri Nakke. Jari iNakke lantulung ngasengko. INakkemi Karaeng Allata'alanu.”

¹¹Lalang ri taung makarua ri le'ba'namo nabokoi bansa Israel butta Mesir, ri tanggala' ruampulo bulang rua, nai'mi rammanga battu ri KemaNa Batara.

¹²Nampa a'le'basa'mo tu Israel a'lampa ambokoi parang lompona Sinai, nampa ammantang anjo rammanga ri wattunna battu ke'nanga ri parang lompona Paran.

¹³Iaminjo uru a'lampana ke'nanga lanri parentaNa Batara tete ri Musa.

¹⁴Ia riolo dudua a'lampa iamintu pasukang a'la'langa rawa bandera pasukanna Yehuda, pasukang se'rea mae ri pasukang maraenga: Nahason, ana'na Aminadab ampimpingi barisanna suku Yehuda,

¹⁵Netaneel ana'na Zuar ampimpingi barisang sukuna Isakhar,

¹⁶siagang Eliab ana'na Helon ampimpingi barisang sukuna Zebulon.

¹⁷Nampa nibongkara' KemaNa Batara, siagang a'lampami golonganna Gerson siagang Merari ampisangi anjo Kemaya.

¹⁸Nampa a'lampamo pasukang a'la'langa rawa bandera kasatuanna Ruben, pasukang se'rea mae ri pasukang maraenga: Elizur ana'na Syedeur ampimpingi barisanna suku Ruben,

¹⁹Selumiel ana'na Zurisyadai ampimpingi barisanna suku Simeon,

²⁰siagang Elyasaf ana'na Rehuel ampimpingi barisanna suku Gad.

²¹Le'baki anjo a'lampami suku Kehat ampisangi barang-barang matangkasaka. Punna battu ke'nanga mange ri tampa' pakkemaang berua, le'ba'mi nipaenteng poleang KemaNa Batara.

²²Nampa amminawang pasukang a'la'langa rawa bandera kasatuanna suku Efraim, tasse're pasukang mae ri pasukang maraengannaya: Elisama ana'na Amihud ampimpingi barisanna suku Efraim,

²³Gamaliel ana'na Pedazur ampimpingi barisanna suku Manasye,

²⁴siagang Abidan ana'na Gideoni ampimpingi barisanna suku Benyamin.

²⁵Kala'busanna a'lampa tommi pasukang a'la'langa rawa bandera kasatuanna suku Dan. Iami ke'nanga pangawala' bageang ribokona sikontu kasatuanga. A'jappami ke'nanga tasse're-se're pasukang: Ahiezer ana'na Amisyadai ampimpingi barisanna suku Dan.

²⁶Pagiel ana'na Okhran ampimpingi barisanna suku Asyer,

²⁷siagang Ahira ana'na Enan ampimpingi barisanna suku Naftali.

²⁸Iaminjo susunanna barisanna tu Israel, tasse're pasukang mae ri pasukang maraengannaya, punna a'lampa ke'nanga untu' a'lette'.

²⁹Nakanamo Musa mae ri ipara'na, iamintu Hobab ana'na Rehuel tu Midian, “La'lampai ikambe mange ri tampa' nakanaya laNapassareangi Batara mae ri kambe. Le'ba'mi Napa'janjiang Batara apa bajika mae ri tu Israel. Jari amminawang mako, tena tanigau' baji'nu ri kambe.”

³⁰Appialimi Hobab angkana, “Tarima kasi, mingka kaerokka' ammotere' mange ri kampongku.”

³¹Nakanamo Musa, “Teako bokoi ikambe, nasaba' ikau akkulle angngului ikambe ri oloang lanijappaia; nasaba' ikau angngassengi angkana kemaeki' akkulle akkema ri parang lompoa.

³²Punna amminawangko, sikontu apa bajika, iamintu Nagaukanga Batara mae ri kambe, lanagaukang tongi ikambe mae ri kau.”

³³Le'ba'namo nabokoi bansa Israel Moncong Sinai, iamintu moncong pammantangnganNa Batara, a'jappami ke'nanga tallungallo. Patti ParjanjianNa Batara tuli nierangi ri dallekanna ke'nanga untu' a'boya tampa' pakkemaanna ke'nanga.

³⁴Punna a'lampa ke'nanga battu ri pakkemaanga, tuli nia'na rammanNa Batara irateanna ke'nanga punna allo.

³⁵ Sampang niangka' anjo Patti Parjanjianga, angkanami Musa, “Ammenteng maKi' o Batara, Kipasimbung-simbungi musunTa sa'genna lari tau angkabirisiaKi'.”

³⁶Siagang punna battu anjo Patti Parjanjianga mange ri tampa' pammantangnganga, angkanami Musa, “Ammotere' maKi' o Batara, mange ri assa'bua Kaluarga Israel.”