Read Makassar Version – KITTA' MATANGKASA PAMMILANGNGANG 11 Bible Online

PAMMILANGNGANG 11 - Makassar Version – KITTA' MATANGKASA bible

PAMMILANGNGANG 11

¹Ri se'reang allo appakkaramulami bansa Israel akkunrareng mae ri Batara passabakkang sikamma kasukkarranna ke'nanga. Nalangngere'na kunrarenna ke'nanga, larromi Batara siagang appabattumi pepe' mae ri ke'nanga. Anjo pepeka a'lemere'mi ri tangnga-tangngana ke'nanga na nakanre sa'genna ammutung sipa'gang pakkemaanna ke'nanga.

²Ammarrang-marrammi anjo taua appala' tulung ri Musa. Nampa appala' doammo Musa mae ri Batara, sa'genna matemo anjo pepeka.

³Lanri anjo kajarianga, naniaremmo, “Tabera” anjo tampaka, lanri anjoremmi pepe'Na Batara a'rinra ri tangnga-tangngana ke'nanga.

⁴Lalang pa'jappanna anjo tu Israel nia' todong bansa maraeng amminawang. Ero' dudui anjo ke'nanga angnganre dageng, nampa appakkaramula tommo tu Israel akkunrareng. Nakanamo ke'nanga, “Ah, coba nania' mamo dageng untu' nikanre-kanre!

⁵Niu'rangi juku' nikanre bawang-bawanga ri Mesir, kammayatompa bonteka, boyo', perei, lasuna eja siagang lasuna kebo'.

⁶Kamma-kamma anne kala'busang kagassingang maki' lanri tenana kanre pantaranganna mannaya mami tuli nicini'.”

⁷ Anjo tanja'na mannaya sangkammai lisere' ca'di-ca'di, kebo' kunyi'-kunyiki nicini'.

⁸ Punna bangngi tu'guruki anjo mannaya siagang saliuka ri tampa' pakkemaanga. Ri bari'basa'na a'jappami taua kemae-kemae ampasse'rei, nampa nagilingi yareka nadengkai na'jari labu', nampa napare' a'jari kanrejawa a'bo'dong siagang a'leppa'. Naia kasia'na sangkammai kanrejawa nitunua siagang minynya' zaitun.

¹⁰Nalangngereki Musa anjo tu Israel a'moro-moro, a'gompo-gompo ri dallekang pakke'bu' kemana ke'nanga. Nampa a'rinramo larroNa Batara napakamma, sa'genna si'na nasa'ring pa'mai'na Musa.

¹¹Jari angkanami ri Batara, “Angngapa Kisusai kamma' anne? Maka tena naKisannang mae ri nakke? Angngapa naKipassareang anne sikontu taua anjari tanggong jawakku?

¹²Inakkeka antianangngangi yareka allassukangi anjo ke'nanga? Angngapa Kisuroa' a'jari sangkamma patarinti akkalawinga ana' ca'di, sa'genna musti tulusu' kuparakainna ke'nanga lalang pa'jappang mange ri butta Kipa'janjianga mae ri boe-boena ke'nanga?

¹³Kicini'mi, antekamma tulusu' akkunrarenna ke'nanga appala' dageng. Nampa kemae musti kupa'boyang dageng tau sikammaya anjo jaina?

¹⁴Tena kulleku ampisangi tanggong jawa' kammaya anjo lompona; ta'liwa' battalaki anjo tugasaka mae ri nakke!

¹⁵Punna tuli nipakamma' anne Batara, Kikamaseanga'; bajikangngang bunoma' linta' sollanna tenamo nakukasiaki anne kasessang kammaya.”

¹⁶Nampa Nakanamo Batara mae ri Musa, “Passe'rei battu ri bansa Israel tujupulo tau toa, ia niania salaku pamimpinna bansaya. Erangi ke'nanga battu mae ri dallekangKu ilalang ri KemaKu, nampa suroi ke'nanga ammenteng anjoreng ri sa'rinnu.

¹⁷LanaungA' siagang la'bicara siagang ikau anjoreng ri tampaka, nampa anjo koasa Kupassareanga ri kau, laKupassareangi sipa'gang mae ri ke'nanga. Jari akkullei ke'nanga ambantuko ampisangi tanggong jawaka mae ri anne bansaya, sa'genna tenamo nakale-kalennu ampisangi.

¹⁸Kamma-kamma anne paumi anne mae ri anjo bansaya angkana; Pakatangkasaki kalennu untu' ammuko; langnganre ngasengko dageng. Nalangngere'mi Batara karru'nu siagang kunrarennu lanri ero'nu angnganre dageng, siagang bajikangngangi sarennu ri wattunnu ri Mesir. Kamma-kamma anne laNasareko Batara dageng, siagang akkulle mako angkanrei.

¹⁹Tena nasialloja yareka ruangallo bawang lanukanre, yareka limang allo yareka sampulo allo, ba'lalo tena naruampulo allo bawang,

²⁰mingka sibulangi lanukanre turus, sa'gennu a'jari garring siagang ta'langnge-langnge napakamma. Kammaminjo kajarianna lanri nutolla'na Batara niaka ri tangnga-tangnganu. Kammayatompa lanri angngarru'nu siagang akkunrarennu ri dallekanNa angkanaya nubokoimi Mesir.”

²¹Nampa nakanamo Musa mae ri Batara, “Anne bansa kupimpinga nia' 600.000 tau jaina. Antekamma batena naKikana laKisarei ke'nanga dageng siganna'na lalang sibulang sallona?

²²Kemae nia' sapi yareka gimbala' kammaya anjo jaina musti nipolong untu' ampakabassoroki ke'nanga? Maka lagannaki sikontu jukuka ri tamparanga untu' nisareangi anne ke'nanga angkanrei?”

²³Appialimi Batara angkana, “Apaka nukana nia' sanggana kakoasangKu? Lanuciniki angkanaya anjo apa Kupaua ma'nassa lakajariang tojengi yareka tena!”

²⁴Jari assulu'mi Musa nampa napabattu mae ri anjo bansaya anjo apa le'baka Napau Batara. Appasse'remi Musa tujupulo pamimping nampa nasuro ke'nanga ammenteng ri tammulilina KemaNa Batara.

²⁵Nampa naummo Batara lalang ri rammanga siagang A'bicarami mae ri Musa. Naallemi Batara sipa'gang anjo koasa Napassareanga mae ri Musa nampa Napassareang mae ri anjo tujupuloa pamimping. Anjo wattua naummi RohNa Batara mae ri ke'nanga. Nappakkaramulamo ke'nanga a'gora sangkamma na'bi, mingka tena nasallo.

²⁶Nia' rua tau battu ri anjo tujupuloa pamimping, iamintu Eldad siagang Medad, ammantang ri pakkemaanga siagang tena na'lampa siagang aganna maraenga mange ri KemaNa Batara. Anjoreng ri pakkemaanga naummi RohNa Batara mae ri ke'nanga, sa'genna appakkaramulamo anjo tau ruaya a'gora-gora sangkamma na'bi.

²⁷Nampa nia'mo se're tau rungka lari assulu' untu' mange ampauangi Musa anjo apa kajarianga mae ri Eldad siagang Medad.

²⁸Nakanamo Yosua ana'na Nun, ia ambantuai Musa appakaramula ri wattu rungkana, ri Musa, “Suroi anjo ke'nanga ammari, bapa'!”

²⁹Appialimi Musa angkana, “Angngapa na inakke nunawa-nawa? Ba'lalo kuminasai inakke sollanna Napassareang RohNa mae ri sikontu bansaNa, siagang Napa'jari na'bi ngaseng ke'nanga!”

³⁰Nampa ammotere'mi Musa mae ri pakkemaanga siagang anjo tujupuloa pamimping Israel.

³¹Ti'ring appabattumi Batara anging battu ri tamparang; anjo anginga angngerangi jangang-jangang puro, anri'ba' ambani dudua naung, sa'genna se're metere' battu ri tompo'na buttaya. Anri'baki irate ri pakkemaanga anjo sa'genna siapa are kilo bellana ri tammulilina pakkemaanga.

³²Sikabusu'na alloa, sikabusu'na bangngia kammayatompa allo ribokoanganna, ase' ngasengi taua anjakkala' jangang-jangang puro. Tunggala' taua anjakkalaki kaminang sike'de'na nia' sisa'bu kilo battala'na. Anjo jangang-janganga napasiaraki ke'nanga ri tammulilina pakkemaanga sollanna a'jari kalotoro'.

³³Lalang jaina ija dageng untu' nakanre ke'nanga, larromi Batara mae ri anjo bansaya siagang appabattumi garring mae ri ke'nanga.

³⁴Jari niaremmi anjo tampaka “Jera' Kabalalang”, lanri anjoremmi nitarawang sikamma tau matea napakamma balala.

³⁵Battu anjoreng allete'mi anjo bansaya mange ri daera Hazerot, nampa akkema ke'nanga ri anjo tampaka.