Read Makassar Version – KITTA' MATANGKASA PAMMILANGNGANG 12 Bible Online

PAMMILANGNGANG 12 - Makassar Version – KITTA' MATANGKASA bible

PAMMILANGNGANG 12

¹Angngallemi Musa se're tubaine Kus nampa nabaineang; iaminjo napa'jari alasang Miryam siagang Harun untu' ancallai Musa.

²Nakana ke'nanga, “Apaka tete ri Musa ji bawang akkulle a'bicara Batara? Sai akkulle tonji a'bicara tete ri katte?” Nalangngereki Batara anjo apa nakananga ke'nanga.

³Anjo Musa tau sanna' tuna pa'mai'na, tena sangkammanna ri sikontu tau attallasaka ri anne linoa.

⁴Ti'ring Nakanamo Batara mae ri Musa, Harun siagang Miryam, “Ikau sipattallu a'lampako mange ri KemaKu.” Nampa a'lampamo ke'nanga mange anjoreng

⁵siagang naummi Batara lalang ri benteng rammanga. Ammentengi Batara ri pakke'bu' KemaNa siagang Nakio'mi Harun siagang Miryam. Majumi mange ri dallekang anjo tau ruaya,

⁶na Nakanamo Batara, “Pilangngeri anne kana-kanangKu! Punna nia' battu ri kalase'rennu a'jari na'bi, Kupa'nyatai KalengKu mae ri ia lalang ri paccini'na siagang a'bicarA' siagang ia lalang so'na.

⁷ Mingka tena nakamma anjo mae ri atangKu Musa. Iami tau majarre' pa'maika ri alla'na ummakKu.

⁸Siagang iNakke a'bicarA' sidallekang siagang ia, a'nyatai siagang tena nasangkamma boto-botoang. Ba'lalo manna rupangKu le'ba'mi nacini'! Angngapa nubarani angngewai Musa, anjo atangKu?”

⁹Teaimi sipato' larroNa Batara mae ri ke'nanga sipa'rua, nampa a'lampa.

¹⁰Ri wattunna a'lampa anjo rammanga ambokoi KemaNa Batara, a'jari garring salami Miryam nicini'; kebo'mi bukkulenna sangkamma kapasa'. Ri wattunna assaile Harun mae ri Miryam, na nacini' angkanaya nitabami ri garring kammaya anjo,

¹¹angkanami mae ri Musa, “Tulungi ikambe Tuang, teaki' lappassangi ikambe nisessa lanri dosa nagaukanga ikambe lalang kadongokanna ikambe.

¹²Teaki' lappassangi anjo Miryam a'jari sanrapang ana' beru lassuka nampa mate memang, nampa a'jari botto' batangkalenna.”

¹³Jari ammarrammi Musa mae ri Batara, angkana, “O, Allata'ala, kupalaki, sollanna Kipammollei ammotere' battu ri garrinna!”

¹⁴ Appialimi Batara angkana, “Ebara' angkana nipi'rui rupanna ri manggena, sai a'jari siriki sa'genna tuju alloa? Pakabellai battu ri pakkemaanga lalang tuju allo sallona; nampa punna le'ba'mo anjo akkullemi ammotere' antama.”

¹⁵Jari nipasulu'mi Miryam battu pakkemaanga lalang tuju allo, siagang ta'lettekai anjo bansaya battu anjoreng sa'genna nipa'biang ammotere' Miryam ri pakkemaanga.

¹⁶Nampa nabokoi ke'nanga Hazerot siagang mange akkema ri parang lompo Paran.