Read Makassar Version – KITTA' MATANGKASA PAMMILANGNGANG 13 Bible Online

PAMMILANGNGANG 13 - Makassar Version – KITTA' MATANGKASA bible

PAMMILANGNGANG 13

¹Nakana Batara mae ri Musa,

²“Battu ri tunggala' suku Israel suroi tasse'rei battu ri pamimpinna untu' mange ammata-matai pa'rasangang Kanaan laKupassareanga mae ri tu Israel.”

³Situru' anjo parentaNa Allata'ala, nasuromi Musa anjo ke'nanga battu ri parang lompo Paran. Yangasenna anjo taua massing pamimpinna suku-suku Israel, iamintu: [Suku] — [Pamimping] Ruben — Syamua ana'na Zakur Simeon — Safat ana'na Hori Yehuda — Kaleb ana'na Yefune Isakhar — Yigal ana'na Yusuf Efraim — Hosea ana'na Nun Benyamin — Palti ana'na Rafu Zebulon — Gadiel ana'na Sodi Manasye — Gadi ana'na Susi Dan — Amiel ana'na Gemali Asyer — Setur ana'na Mikhael Naftali — Nahbi ana'na Wofsi Gad — Guel ana'na Makhi

¹⁶Iaminjo mata-mata nisuroa ri Musa mange ammata-matai anjo pa'rasanganga. Hosea ana'na Nun nisambei arenna ri Musa a'jari Yosua.

¹⁷Ri wattunna nasuro Musa a'lampa ke'nanga, appasangi mae ri ke'nanga angkana, “A'jappa a'lampa warakko, mange ri bageang timboranna butta Kanaan, nampa turusko mange ri daera a'bontoa.

¹⁸Salidiki antekamma kaadaanna anjo pa'rasanganga, apaka jai pandudu'na yareka sike'de', apaka kassaki ke'nanga yareka lammai.

¹⁹Paressai anjo pa'rasanganga apaka bajiki yareka tena, siagang apaka anjorengi desa-desa tassungkea ammantang pandudu'na yareka lalangi ri kota-kota niaka tembo' pattahanganna.

²⁰Pakajarreki pa'mai'nu. Ciniki apaka coppongi buttana siagang jai poko'-poko' kayuna. Teako takkaluppai angngerang ammotere' sike'de' rappo-rappoang attimboa anjoreng.” Anjo wattua pakkaramulami wattu anggoroka.

²¹Jari a'lampami anjo ke'nanga mange ri bageang wara' nampa nasalidiki anjo pa'rasanganga appakkaramula battu ri parang lompo Zin ri bageang timboro' sa'genna wara' ri kota Rehob, ri ampi'na agang mangea ri Hamat.

²²Uru-uruna a'lampai ke'nanga ri bageang timboranna anjo pa'rasanganga nampa battu mange ri kota Hebron, tampa' napammantangia tu Ahiman, Sesai siagang Talmai, jari-jarina Enak. Anjo kota Hebron tuju taungi le'ba'na nibangung nampa nibangung kota Zoan ri Mesir.

²³Nampa battumo ke'nanga mange ri Ka'bung Lappara'na Eskol. Anjoreng ri tampaka ammolommi ke'nanga sitangke rappo anggoro' sannaka battala'na, sa'genna musti nibule' rua. Angngerang tommi ke'nanga piram batu are rappo delima siagang rappo ara.

²⁴Anjo tampaka niarengi Lappara' Ka'bung Eskol lanri nia'na tangke anggoro' siagang rapponna napolong tu Israel anjoreng.

²⁵Le'ba'na nasalidiki ke'nanga anjo pa'rasanganga lalang patampulo allo, ammotere'mi ke'nanga anjo mata-mataya

²⁶siagang assaremi laporang mae ri Musa, Harun siagang sikontu umma' Israel ia sitabanga nia' asse're ri Kades, ri parang lompo Paran. Nacaritami ke'nanga apa le'baka nacini' siagang napaccinikammi anjo rappo-rappoang naeranga ke'nanga.

²⁷Nakana ke'nanga mae ri Musa, “Le'ba'mi nasalidiki ikambe anjo pa'rasanganga; anjo pa'rasanganga kalumanynyangi siagang coppongi buttana nacini' ikambe. Iaminne sike'de' rappo-rappoang niaka anjoreng.

²⁸Mingka pandudu'na anjo pa'rasanganga kassa'-kassa' ngasengi. Kota-kotana ke'nanga lompo-lompo ngasengi siagang ammakei tembo' kalli' pattahangngang. Nampa pole, anjo tau nacinika ikambe anjoreng sangkammai jari-jarina tau lompo tinggia tinggi.

²⁹Tu Amalek ammantang ri bageang timboro'na anjo pa'rasanganga; tu Het, tu Yebus siagang tu Amori ammantang ri daera a'bontoa; nampa tu Kanaan ammantang ri daera sikontu biring tamparanga siagang sikontu birinna Binanga Yordan.”

³⁰Mingka Kaleb napakajarreki pa'mai'na tau akkunrarenga ri Musa. Nakana Kaleb, “Anjo pa'rasanganga musti nibunduki nampa nialle memang kamma-kamma anne, lanri nia' kagassinganta untu' ambetai.”

³¹Mingka nakana ngasemmo anjo sikamma tau naaganga Kaleb ammotere', “Tena, tena pakkulleta ambunduki ke'nanga. Anjo pandudu'na pa'rasanganga bella kassa'na na ikatte.”

³²Nampa appa'la'bammo ke'nanga carita balle-balle ri tangnga-tangngana tu Israel ri passala'na anjo pa'rasangang le'baka nasalidiki ke'nanga. Nakana ke'nanga, “Sanna' bahayana anjo pa'rasanganga, ba'lalo bahaya mae ri pandudu' kalenna. Anjo tau nacinika ikambe anjoreng sanna' lompona ngaseng pakkaleanna.

³³ Ba'lalo nia' nacini' ikambe tau sangkamma rassasa, iamintu jari-jarina tu Enak. Punna nipasinrapangi siagang ke'nanga, ikambe rapang jaki' katimbang; siagang mattantu kammaminjo panggappana ke'nanga mae ri kambe.”