Read Makassar Version – KITTA' MATANGKASA PAMMILANGNGANG 14 Bible Online

PAMMILANGNGANG 14 - Makassar Version – KITTA' MATANGKASA bible

PAMMILANGNGANG 14

¹Kabusu'na bangngia ammarrang-marrang siagang angngarru'-arru' umma' Israel.

²A'moro-moromi ke'nanga mae ri Musa siagang Harun angkana, “Bajikangngangi punna mateki' ri Mesir yareka anrinni ri parang lompoa! Lappassang maki' mate!

³Untu' apa naNaerangki' Batara mange anjoreng ri pa'rasanganga? Mateki' sallang lalang pa'bundukanga nampa nijakkala' sikamma bainenta siagang ana'-anatta. Sai bajikangngangi ammotereka mange ri Mesir!”

⁴Nampa massing angkanamo para ia ke'nanga, “Umba kimmile sitau pamimping nampa ammoterekki' mange ri Mesir!”

⁵Nampa su'ju'mo Musa siagang Harun ri dallekanna sikontu ra'yaka.

⁶Yosua ana'na Nun siagang Kaleb ana'na Yefune, rua tau battu ri anjo mata-mataya, nakekkeki pakeanna ke'nanga pammateinna angkana susai ke'nanga.

⁷Nanakana ke'nanga mae ri sikontu anjo ra'yaka, “Anjo pa'rasangang le'baka nasalidiki ikambe teai sipato' baji'na.

⁸Punna Naerokangi Batara, laNaerangki' mange anjoreng nampa Napassareang anjo pa'rasangang kalumanynyanga siagang copponga mae ri katte.

⁹ Teako angngewai mae ri Batara, siagang teako mallakki mae ri tau niaka ammantang anjoreng ri pa'rasanganga, nasaba' gampang sikali lanibeta. Anjo alla'langiai ke'nanga a'lampami ambokoi ke'nanga, siagang Batara anrurungangki'. Jari teako mallakki.”

¹⁰Sikontu ra'yaka a'garatta'mi ero' ansambilai ke'nanga batu sa'genna mate. Mingka ti'ring nia'mo nacini' ke'nanga caya tassioro'Na Batara ammumba irateanna Kemaya.

¹¹Nakanamo Batara mae ri Musa, “Siapapi sallona anne taua langngewA'? Sa'ge kemae ke'nanga taeroka tappa' ri Nakke, manna pole jaimi gau' malompo Kugaukang ri tangnga-tangngana ke'nanga?

¹²LaKuancuruki ke'nanga; lappabattuA' garring a'lette'-letteka ri tangnga-tangngana ke'nanga. Mingka ikau laKupa'jariko mangge ri se'rea bansa lompoanganga siagang kassakanganga na anjo ke'nanga!”

¹³ Nampa nakanamo Musa mae ri Batara, “Iye' Batara, nalangngereki sallang tu Mesir anjo passalaka! Nampa lanri kakoasanTa naKierang le'ba' assulu' battu ri anjo pa'rasanganga,

¹⁴siagang lanacaritai ke'nanga mae ri sikamma tau niaka anrinni angkanaya iKatte, Batara, anrurungangi ikambe. Le'ba' tommi nalangngere' ke'nanga angkanaya Kipappicinikangi KalenTa mae ri kambe ri wattunTa a'jappa ri dallekanna ikambe lalang ri benteng rammanga punna allo, siagang lalang ri benteng pepeka punna bangngi.

¹⁵Punna Kibuno ngaseng sikontu ummatTa anne, anjo bansa-bansa le'baka allangngereki anjo areng masahorotTa lanapaumi angkanaya

¹⁶iKatte ambunoi ummatTa ri parang lompoa lanri tenana naKikkulle angngerangi ke'nanga mange ri pa'rasangang le'baka Kipa'janjiang.

¹⁷Lanri kammana anjo, o Batara, kupalaki, Kipappicinikang laloi kakoasanTa mae ri kambe siagang Kigaukammi apa le'baka Kipa'janjiang. Le'ba'maKi' angkana,

¹⁸ ‘INakke, Batara, tena Kulinta' larro. Kupappicinikangi pangngamaseangKu siagang tamamminraKu malla'bi-la'bia. Kupammopporangi tau dorakaya siagang tau angngewayA'. Mingka manna nakamma, kasalanna tau toaya laKubalasaki mae ri ana'-ana'na siagang cucu-cucunna, sa'genna jari-jari lapisi' makatalluna siagang makaappa'na.’

¹⁹Kamma-kamma anne, o Batara, lanri lompona pangngamaseanTa siagang lanri majarretTa mae ri janjinTa, kupalaki, Kipammopporang laloi dosana anne taua ngaseng, sangkamma le'ba'na Kipammopporang ke'nanga baku' nabokoina ke'nanga butta Mesir.”

²⁰Nampa appialimi Batara angkana, “Baji'mi, laKupammopporangi ke'nanga situru' pappala'nu.

²¹ Mingka a'janjiA' lanri batangkalengKu siagang lanri iNakke mattallasaKa siagang makoasaYa ri anne linoa,

²²angkanaya manna sitau anne sikamma taua tena lattallasa' untu' antama' ri pa'rasangang le'baka Kupa'janjiang mae ri boe-boena ke'nanga. Nasaba' taerokai ke'nanga mannuruki mae ri Nakke, siagang tulusu' ero'na ke'nanga ampaccoba-cobaiA'. Nampa le'ba'mi nacini' ke'nanga sioro'na cayaKu, siagang gau'-gau' malompo Kugaukanga ri Mesir siagang ri parang lompoa.

²³Tena! Tena nalantama' ke'nanga ri anjo pa'rasanganga. Sikamma anjo tau angngewaya mae ri Nakke, tena manna sitau langngonjoki anjo pa'rasanganga.

²⁴ Mingka tena nakamma anjo mae ri atangKu Kaleb. Ia tena mamminrana mae ri Nakke. Lanri kammana anjo laKuerangi mange anjoreng ri pa'rasangang le'baka napantamakki. Kamma-kamma anne tu Amalek siagang tu Kanaan ammantang ri anjo lapparaka. Mingka anjo daeraya la'jari napatangi jari-jarina Kaleb, anjo atangKu. Ammuko musti ammoterekko siagang a'lampako mange ri parang lompoa mangea ri biring Tamparang Akaba.”

²⁶Nakanamo Batara mae ri Musa siagang Harun,

²⁷“Kemae sa'genna anjo sikamma tau ja'dalaka tuli la'moro-moro mae ri Nakke? Sikontu kunrarenna ke'nanga Kulangngere' ngasemmi.

²⁸Musti appialiko mae ri ke'nanga kammanne: Nakana Batara, ‘AssumpA' lanri batangkalengKu mattallasaka angkanaya laKugaukangi apa situruka siagang apa nukananga ri dallekangKu. INakke, Batara, le'ba' angkanangi anne.

²⁹ A'moro-moro ngaseng mako mae ri Nakke. Lanri kammana anjo lamateko siagang latassiaraki maya'nu ri anne parang lompoa. Pantaranganna Kaleb siagang Yosua, tena manna sitau battu ri kau ngaseng umuru' ruampulo taunga sa'genna irateanganna lakkulle antama' ri pa'rasangang Kupa'janjianga mae ri kau.

³¹Le'baki nupau angkanaya lanijakkalaki ana'-ana'nu. Mingka iami anjo ke'nanga laKuerang antama' ri anjo pa'rasangang nutollaka, nampa anjo pa'rasanganga la'jari butta passolongang cera'nami ke'nanga.

³²Sa'dangkang ikau lamate ngasengko anrinni ri parang lompoa.

³³ Patampulo taungi ana'-ana'nu la'jappa ri parang lompoa. Lanri tena namajarre' pa'mai'nu, lasessai ana'-ana'nu, sa'genna matemo tau kala'busanga ri kau.

³⁴Lanukasiaki kale'bakkang kodina dosanu lalang patampulo taung sallona; sitaunga nirekengi untu' siallo battu ri patampulo alloa nupake untu' ansalidiki anjo pa'rasanganga. Lanuassengi angkanaya antekamma kasia'na punna angngewako ri Nakke!

³⁵AssumpA' angkanaya laKugaukangi anjo passalaka mae ri kau tau ja'dalaka, assikongkoloka untu' angngewA'. Lamate ngasengko anrinni ri parang lompoa. INakke, Batara, le'ba' angkanangi anne.’ ”

³⁶Anjo tau le'baka nasuro Musa mange ansalidiki anjo pa'rasanganga ammotereki angngerang laporang takontutojeng ri passala'na anjo pa'rasanganga; iaminjo passabakkang na'moro-moro tu Israel mae ri Batara. Lanri kammana anjo naNahukkummo Batara ke'nanga sa'genna mate nitaba ri garring.

³⁸Battu ri anjo sampuloa anrua mata-mata, poro Yosua siagang Kaleb bawang ammantang attallasa' ija.

³⁹Le'ba'na napabattu Musa pasanNa Batara mae ri bansa Israel, susa ngasemmi anjo bansaya napakamma si'na.

⁴⁰Ammukona bari'basa' dudu, apparurumi ke'nanga ero' nai' ri coppo' buluka. Nakana ke'nanga, “Memang dorakami ikambe. Mingka kamma-kamma anne sadiami ikambe untu' a'lampa mange ri tampa' Najo'joka Batara.”

⁴¹Mingka nakanamo Musa, “Angngapa nuero' kamma-kamma anne andakkai parentaNa Batara? Tena nalanjari pattujunnu!

⁴²Teako mangei a'bundu'! Lanibetako ri musu-musunnu lanri tena Narurungangko Batara.

⁴³Ri wattunnu assidallekang sallang siagang anjo tu Amalek siagang tu Kanaan, lamateko lalang pa'bundukang. Tena nalaNarurungangko Batara, lanri taero'nu mannuruki ri Ia.”

⁴⁴Mingka tuli ero'na anjo tu Israel mange ri coppo'na anjo buluka, manna pole nanabokoi Musa siagang Patti Parjanjianga anjoreng ri pakkemaanga.

⁴⁵Jari nibundukimi ke'nanga ri tu Amalek siagang tu Kanaan niaka ammantang anjoreng; na nibetamo tu Israel sa'genna niondang ke'nanga sa'genna mange ri Horma.