Read Makassar Version – KITTA' MATANGKASA PAMMILANGNGANG 15 Bible Online

PAMMILANGNGANG 15 - Makassar Version – KITTA' MATANGKASA bible

PAMMILANGNGANG 15

¹Napassareangi Batara mae ri Musa

²anne paratorang-paratorang mustia nagaukang bansa Israel ri pa'rasangang laNapassareanga Batara mae ri ke'nanga.

³Untu' koro'bang nitunu yareka koro'bang pa'bayara' tinja', yareka koro'bang ero' kalennu; yareka koro'bang ri sikamma allo lompo biasaya, akkulleko assare mae ri Batara iamintu: sapi laki, gimbala' laki, yareka bembe, yareka gimbala'. Rasanna anjo sikamma koro'banga napakasannangi nyawaNa Batara.

⁴Inai-nai assare gimbala' yareka bembe untu' koro'bang nitunu mae ri Batara, musti napasierang tongi siagang anjo tunggala' olo'-oloka iamintu sikilo labu' nipasileoka siagang silitere' minynya' zaitun untu' koro'bang nipatala, kammayatompa pole silitere' je'ne' anggoro'.

⁶Punna anjo nikoro'bangkanga iamintu sikayu gimbala' laki, musti nipassareang tongi rua kilo labu' nipasileoka siagang se're sitangnga litere' minynya' zaitun untu' koro'bang nipatala,

⁷siagang se're sitangnga litere' je'ne' anggoro'. Rasanna anjo koro'banga napakasannangi nyawaNa Batara.

⁸Punna anjo nikoro'bangkanga iamintu sikayu sapi laki untu' koro'bang nitunu yareka koro'bang pa'bayara' tinja' yareka koro'bang passiamakkang,

⁹musti nipassareang tongi tallu kilo labu' nipasileoka siagang rua litere' minynya' zaitun untu' koro'bang nipatala,

¹⁰siagang rua litere' anggoro'. Rasanna anjo koro'banga napakasannangi nyawaNa Batara.

¹¹Iaminjo musti nipassareang siagang tunggala' tassikayua sapi laki, gimbala' laki, gimbala' yareka bembe.

¹²Punna anjo nikoro'bangkanga la'bi ri sikayua olo'-olo', musti nitambai tongi passare labu', minynya' siagang anjo anggoroka, siagang nipasimbandingi jaina.

¹³Anjo kammaya musti nagaukangi tu Israel ri wattunna assare koro'bang. Rasanna anjo koro'banga napakasannangi nyawaNa Batara.

¹⁴Bansa maraeng niaka ammantang ri tangnga-tangnganu, baji' tau sinampekaji kammayatompa lammantang tulia, musti naturuki anjo paratoranga punna assare koro'bang kanre-kanreang ampakasannangai nyawaNa Batara lanri rasanna.

¹⁵ Anjo sikontu hukkunga siagang paratoranga nipasangkamma ngasengi mae ri kau siagang mae ri bansa maraeng ammantanga ri tangnga-tangnganu, lanri ikau siagang anjo ke'nanga nipasangkammako ri dallekanNa Batara. Na anjo kammaya tappakei sa'genna satunggu-tungguna.

¹⁷Napassareangi Batara mae ri Musa

¹⁸anne paratorang-paratorang musti nagaukanga bansa Israel ri pa'rasangang laNapassareanga Batara mae ri ke'nanga.

¹⁹Punna appakkaramulamo nukanre wassele'na anjo pa'rasanganga, musti nusa'laki sipa'gang untu' nupassareang mae ri Batara.

²⁰Punna attunuko roti battu ri gandung uru-uru nukattoa, anjo rotia musti nupassareangi a'jari koro'bang nisa'la' mae ri Batara. Carana ampassareangi sangkamma tonji carana ampassareangi gandung uru nugilinga.

²¹Sa'genna satunggu-tungguna sikamma roti battu ri gandung uru nikattoa musti nupassareangi salaku passare nisa'la' untu' Batara.

²²Punna tena nukunjungi nanukaluppai kalase'renna anjo paratorang Napassareanga Batara mae ri Musa, appakkaramula ri allo Napassareanna Batara anjo paratoranga sa'genna mae ri jari-jarinu, nampa nanigaukang anjo kasalanga lanri tena naassengi ummaka anjo paratoranga, sikontu ummaka musti assarei sikayu sapi laki untu' koro'bang nitunu. Anjo kammaya musti nipasierang tongi koro'bang nipatala siagang je'ne' anggoro' sangkamma le'baka nipattantu. Rasanna anjo koro'banga napakasannangi nyawaNa Batara. Pantaranganna anjo musti nikoro'bangkang tongi sikayu gimbala' laki untu' koro'bang pammopporang dosa.

²⁵Nampa musti nagaukang imanga upacara pammopporang dosaya untu' ummaka. Lanipammopporangi ke'nanga lanri tenana nakunjungi anggaukangi anjo dosaya, siagang lanri angngerannamo ke'nanga koro'bang pammopporang dosa kammayatompa koro'bang nitunu mae ri Batara.

²⁶Sikontu umma' Israel siagang bansa maraeng ammantanga ri tangnga-tangngana ke'nanga lanipammopporang ngasengi, lanri ta'beso'na ngaseng ke'nanga ri anjo dosa tenaya nakunjungi.

²⁷ Punna sitauji bawang anggaukangi anjo dosa tenaya nikunjungi, anjo taua musti assarei koro'bang sikayu bembe gana umuru' sitaunga untu' koro'bang pammopporang dosa.

²⁸Imanga musti nagaukangi upacara pammopporang dosaya ri dallekanNa Batara, sollanna nanipammopporang dosana anjo taua.

²⁹Anne paratoranga tappake tongi mae ri nai-nai tau anggaukangai dosaya siagang tena nakunjungi, baji' tu Israel kammayatompa bansa maraeng ammantang tulia ri alla'na ke'nanga.

³⁰Mingka punna nia' tu Israel yareka bansa maraeng nakunjungi anggaukangi anjo dosaya, nabawang-bawangngangi Batara. Anjo tau kammaya musti nihukkung matei,

³¹lanri naewai Batara siagang nakunjungi andakkai parentaNa Batara. Anjo tau kammaya matei lanri kasalanna tonji.

³²Ri wattunna nia' tu Israel ri parang lompoa, nia' sitau bura'ne nirapikang appasse're kayu tunuang ri wattuna allo Pammari-marianga.

³³Nierammi anjo taua mange ri dallekanna Musa, Harun, siagang sikontu ummaka,

³⁴nampa nitahang lanri taniassengapi angkana apa musti nigaukang mae ri anjo taua.

³⁵Nakanamo Batara mae ri Musa, “Anjo taua musti nihukkung matei. Musti nierangi assulu' ri pantaranganna pakkemaanga nampa anjoreng musti nisambilai ri sikontu ummaka siagang batu sa'genna mate.”

³⁶Jari nierammi anjo taua ri sikontu ummaka assulukang ri pantaranganna pakkemaanga nampa nisambilai batu sa'genna mate, sangkamma Naparentakanga Batara.

³⁷Nasuromi Batara anjo Musa

³⁸ ampaui mae ri bansa Israel angkana, “Apparekko rombeng-rombeng ri cappa'-cappa'na pakeannu siagang sikkoki otere' gau' anjo sikamma rombenga. Anjo kammaya musti nugaukangi sa'genna mae ri jari-jarinu.

³⁹Anjo rombeng-rombenga iami a'jari pappiu'rangi: Tunggala' allo punna nuciniki, lanuu'rangi sikontu parentaKu siagang nuturuki. Na lanri kammana anjo, tena nalanukaluppaiA' untu' anturuki erokKu siagang ero' kalennu.

⁴⁰Anjo rombeng-rombeng lampiu'rangiangko untu' anturuki sikontu parentaKu, sa'genna a'jari tojeng-tojeng mako ummakKu.

⁴¹INakkemi Karaeng Allata'alanu; iNakke angngerangko assulu' battu ri butta Mesir sollanna iNakke a'jari Allata'alanu. INakkemi Batara.”