Read Makassar Version – KITTA' MATANGKASA PAMMILANGNGANG 22 Bible Online

PAMMILANGNGANG 22 - Makassar Version – KITTA' MATANGKASA bible

PAMMILANGNGANG 22

¹A'lampami pole bansa Israel nampa akkema ri lappara'na Moab, ri daera ba'leanna Binanga Yordan, ri ampi'na kota Yerikho.

²Ri wattunna nalangngere' karaeng Moab, niarenga Balak, ana'na Zipor, antekamma batena bansa Israel anggauki tu Amori, siagang antekamma jaina anjo tu Israelka, a'jari lussa'mi siagang sikontu ra'ya'na.

⁴Nampa nakanamo tu Moab mae ri sikamma pamimpinna tu Midian, “Tasalloami nabattu anjo garombolanga ampicappuki sikontu apa niaka ri tammulilita, sanrapang sapi ampicappuki rukuka ri paranga.” Jari akkirimmi Balak

⁵ tunisuro mange angkioki Bileam, ana'na Beor niaka ammantang ri kota Petor ri ampi'na Binanga Efrat ri daera Amau. Nisuroi ke'nanga ampabattui mae ri Bileam anne pasanna Balak angkana, “Parallui nuasseng angkanaya nia' se'reang bansa battu ri Mesir; tassiaraki taunna mae ri kere-kere mae siagang apparurumi ke'nanga ero' ambunduki ikambe.

⁶La'bi kassakangngangi ke'nanga na ikambe. Jari battu sako mae! Tunraimi anjo ke'nanga untu' inakke. Gassingka akkulleji ikambe ambetai ke'nanga siagang ambongkai ke'nanga battu anrinni ri pa'rasanganga. Nasaba' tappaka' angkanaya inai-nai tau nubarakkaki, langgappai barakka', siagang inai-nai nutunrai langgappai bala.”

⁷Jari a'lampami sikamma pamimpinna tu Moab siagang tu Midian angngerang passare untu' lanapassareang mae ri Bileam, sollanna ero' antunrai tu Israel. Battuna ke'nanga mange ri Bileam, napabattumi ke'nanga mae ri ia anjo pasanna Karaeng Balak.

⁸Nakanamo Bileam ri ke'nanga, “A'bangngi ngaseng mako anrinni. Ammuko lakusareko kabara' angkana apa Nakana Batara mae ri nakke.” Jari a'bangngimi anjo sikamma pamimpinga ri tampa'na Bileam.

⁹Battumi Allata'ala akkuta'nang ri Bileam Angkana, “Inai anjo tau niaka ammantang ri balla'nu Bileam?”

¹⁰Appialimi Bileam angkana, “Anjo ke'nanga tau nisuro ri Karaeng Balak battu ri Moab untu' battu angngerang kabara'

¹¹angkanaya nia' se're bansa battu ri Mesir, tassiaraka ri kere-kere mae. Nasuroa' Karaeng Balak antunrai anjo bansaya untu' kalenna, sollanna akkulle nabunduki siagang nabongka ke'nanga.”

¹²Nakanamo Allata'ala ri Bileam, “Teako a'lampai siagang anjo taua, siagang teako tunrai anjo bansaya, nasaba' anjo ke'nanga le'baki Kubarakkaki.”

¹³Ammukona bari'basa' nakanamo Bileam mae ri anjo sikamma tau nisuroa ri Balak, “Ammotere' mako, tena Napa'bianga' Batara a'lampa siagang ikau ngaseng.”

¹⁴Jari ammotere'mi ke'nanga mae ri Balak nampa napabattu mae ri ia angkanaya taerokai battu Bileam siagang ke'nanga.

¹⁵Jari akkirimmi pole Balak la'bi jaiangngang tau nasuro siagang tinggiangnganga pangka'na naanjo rioloa.

¹⁶Napabattumi ke'nanga mae ri Bileam anne pasang battua ri Balak angkana, “Kupala' dudui: battu laloko mae, siagang tea' laloko teai.

¹⁷Lakusareko passare jai sikali, siagang manna apa nukana tena takuturukinna. Battu mako mae, siagang tunraimi anjo bansaya untu' inakke.”

¹⁸Mingka appiali Bileam angkana, “Manna pole nasikontu peraka siagang bulaenga ia niaka lalang ri balla' kakaraenganna Karaeng Balak napabayara' mae ri nakke, talaerokka' andakkai parentaNa Batara, Allata'ala kusombaya. Manna sike'de' dudu taerokka' angngewai Allata'ala.

¹⁹Mingka baji'mi punna a'bangngi ngasengko anrinni sangkamma nagaukanga sikamma tunisuro rioloa. Eroki kuasseng angkanaya apaka nia' ija ero' Napau Batara mae ri nakke.”

²⁰Anjo bangngia battumi Allata'ala mae ri Bileam na Nakana, “Battui anjo sikamma taua ampalaki sollannu ero' a'lampa siagang ke'nanga. Jari apparuru mako untu' a'lampa. Mingka iaji bawang akkulle nugaukang apa Kuparentakanga mae ri kau.”

²¹Ammukona bari'basa' napatabami pa'lapa' keledaina ri dongko'na keledaina, nampa amminawang a'lampa siagang anjo sikamma pamimping battua ri Moab.

²²Mingka ri wattunna a'lampa Bileam, a'jari larromi Allata'ala. Lalang nadongkokinna Bileam keledaina, nirurungang ri rua palayanna, nia'mi malaeka'Na Batara ammenteng ri tangngana aganga untu' anrompai ke'nanga.

²³Nacini'na nia' malaeka' ammenteng anjoreng anna'gala' pa'dang ta'bi'bu', ammengkami anjo keledaia, a'bilu' antama ri kokoa. Natunrummi Bileam anjo keledaia nampa naerang ammotere' mange ri aganga.

²⁴Nampa ammenteng anjo malaeka'Na Batara ri agang seppaka, ri alla'na ruaya koko anggoro' nania' tembo' batu ri pimbali-balinna.

²⁵Ri wattunna nacini' keledaia anjo malaekaka, a'birimmi sa'genna tassepe' bangkenna Bileam mae ri temboka. Natunrummi pole Bileam anjo keledaia.

²⁶Nampa a'lette'mo anjo malaeka'Na Batara, ammenteng ri tampa' la'bi seppaka sa'genna tenamo agang akkulle niolo ri kairinna yareka ri kananna.

²⁷Nacini'na anjo malaeka'Na Batara, anra'bami naung anjo keledaia. A'jari larromi Bileam siagang natunrummi anjo keledaia siagang takkang.

²⁸Nampa Napa'jarimo Batara akkulle a'bicara anjo keledaia. Nakanamo anjo keledaia mae ri Bileam, “Apa gaukku mae ri katte karaeng sa'genna kitunrunga' sa'genna pintallung?”

²⁹Appialimi Bileam angkana, “Nupakkarek-karenanga'! Ebara' angkana nia' pa'dang ri nakke, tena takubunonu!”

³⁰Appialimi anjo keledaia angkana, “Sai anne inakke keledaita' salloamo tuli kibae? Apaka le'bakka' tamappilangngeria ri katte?” Appialimi Bileam angkana, “Tena”.

³¹Nampa Napa'jarimo Batara akkulle Bileam anciniki anjo malaeka'Na Batara niaka ammenteng anjoreng anna'gala' pa'dang ta'bi'bu'. Su'ju'mi linta' Bileam naung ri buttaya nampa anynyomba.

³²Akkuta'nammi malaeka'Na Batara angkana, “Angngapa nanutunrungi keledainu sa'genna pintallung? Battua' mae anrompaiko, nasaba' turu' ri panggappaku, tabajikai punna a'lampako.

³³Ri wattungku nacini' keledainu, a'lili sa'genna pintallung. Punna tena, ma'nassa le'ba' mako kubuno, mingka kupasalamaki anjo keledaia.”

³⁴Appialimi Bileam angkana, “Dorakama'. Tena kuassengi angkana ikatte ammenteng ri tangngana aganga untu' anrompai ikambe. Mingka kamma-kamma anne, punna turu' ri panggappata tabajikai punna kupatulusuki anne pa'lampangku, lammoterekka'.”

³⁵Mingka nakanamo malaeka'Na Batara, “Amminawangko ri nakke siagang sikamma anjo taua. Mingka iaji bawang akkulle nupau apa kusuro paua.” Jari napannarrusu'mi jappana Bileam siagang anjo sikamma tunasuroa Balak.

³⁶Ri wattunna nalangngere' Balak angkanaya laniaki battu Bileam, a'lampami mange anruppai Bileam ri kota Moab, niaka ri birinna Binanga Arnon, ri pa'baeng-baenna daera Moab.

³⁷Nakanamo Balak ri ia, “Angngapa natena nubattu ri uru-uru kukio'nu? Apaka nukana tena nakukkulle ambayarakko?”

³⁸Appialimi Bileam angkana, “Kamma-kamma anne nia'ma' battu. Mingka tena hakku la'bicara apa-apa pantaranganna punna Nasuroa' Allata'ala ampaui.”

³⁹A'lampami Bileam siagang Balak mange ri kota Huzot.

⁴⁰Anjoreng ri tampaka assaremi Balak koro'bang pirang kayu are sapi siagang gimbala'. Sipa'gang battu ri anjo dagenga napassareangi mae ri Bileam siagang sikamma pamimping naaganga.

⁴¹Ammukona bari'basa' nierammi Bileam ri Balak angngambi' ri Bulu' Bamot Baal. Battu anjoreng akkullei nacini' Bileam sipa'gang bansa Israelka.