Read Makassar Version – KITTA' MATANGKASA PAMMILANGNGANG 24 Bible Online

PAMMILANGNGANG 24 - Makassar Version – KITTA' MATANGKASA bible

PAMMILANGNGANG 24

¹Kamma-kamma anne naassemmi Bileam angkanaya eroki Allata'ala sollanna nabarakkaki bansa Israel. Lanri kammana anjo tenamo na'lampa a'boya pammatei-pammatei sangkamma rioloanganna. Accini'mi Bileam mae ri parang lompoa,

²na nacini' bansa Israel sitabang akkema a'gompo-gompo situru' massing suku-suku bansana. Nampa nikoasaimo Bileam ri RohNa Allata'ala,

³siagang napaumi anne boto kammaya, “Iaminne pasanna Bileam, ana'na Beor, kana-kananna sitaua pacini'

⁴le'baka allangngereki kana-kananNa Allata'ala siagang ancinikai apa Napappicinikanga Kaminang Koasaya, anra'bai, mingka tassungkei matanna.

⁵Tamaka ga'gana kema-kemanu he Yakub, siagang tampa'-tampa' pammantangannu, he Israel!

⁶Rapangi lappara' luaraka, yareka koko niaka ri biring binangaya; rapang poko' gaharu Nalamunga Batara, poko' arasa' niaka ri biring kaloroka.

⁷Anggappai je'ne' bosi alla'bi-la'bi, anggappai jai je'ne' bine lamunganna. Lamala'biriki karaenna, la'biangang na Karaeng Agag, na lanipakala'biri' kakaraenganna.

⁸Allata'ala angngerangi ke'nanga assulu' battu ri butta Mesir, rapang tedong romang a'bunduka ansambeangi ke'nanga. Bansa-bansana musua lacappuki Naa'lu', buku-bukunna ke'nanga Nalissaraki, siagang pana-panana ke'nanga Natepoki.

⁹ Anjo bansaya rapangi singa laki siagang singa gana, ammopanga siagang anra'baya. Inaika barani ampabangungi? Dasi-dasi nanibarakkaki tau ambarakkakiako, siagang nitunrai tau antunraiyako.”

¹⁰Larromi Balak siagang natannammi panja'guru'na nampa nakana mae ri Bileam, “Ikau kukiokko untu' antunrai musu-musungku, mingka ikau ba'lalo a'giling nubarakkakiji ke'nanga sa'genna pintallung.

¹¹Kamma-kamma anne akkulle mako a'lampa, ammotere' mange ri balla'nu! Kujanjiko lakusare sawala', mingka tanipa'biangngako ri Batara antarimai anjo sawalaka.”

¹²Appialimi Bileam angkana, “Sai le'ba'mi kupau mae ri tau kisuroa karaeng angkanaya

¹³manna pole kisareang ngasenga' sikontu peraka siagang bulaeng niaka lalang ri balla' kakaraenganta, talakkullei kudakkai parentaNa Batara siagang anggaukangi apa nangaia pa'maikku? Iaji bawang lakupau apa Nasuro paua Batara ri nakke.”

¹⁴Nakana Bileam mae ri Balak, “Kamma-kamma anne erokka' ammotere' mange ri bansaku. Mingka lalang tenanapa ku'lampa, bajiki punna kupabattuangki' karaeng, apa lanagaukanga bansa Israel mae ri bansata ri allo ri boko.”

¹⁵Nampa napabattumo Bileam anne botoang kammaya, “Iaminne pasanna Bileam, ana'na Beor; kana-kananna sitaua paboto

¹⁶le'baka allangngereki kana-kananNa Allata'ala, siagang akkullea angngassengi Kaminang Tinggia; ancinikai Napa'nyata KalenNa Kaminang Koasaya lalang anra'bana mingka tassungkei matanna.

¹⁷Kuciniki, mingka teai ri kamma-kammana anne; kuparhatikangi, mingka battu bellai. Sitau karaeng battu ri Israel assala'na, labattu sanrapang bintoeng accaya. Lanalissaraki sikamma pamimpinna Moab lanaancuruki bansa Set.

¹⁸Laniempoi butta Edom ri musunna, mingka tu Israel lanagaukang gau' malompoa.

¹⁹Nia' battu ri Yakub lammumba sitau tumakoasa angngancurukai sikamma musu-musunna.”

²⁰Nampa nacini' tommi Bileam tu Amalek lalang paccini'na. Jari napabattumi anne boto kammaya, “Battu ri sikontu bansaya ri lino, tu Amalek kaminang makoasa. Mingka kale'bakkanna anjo bansaya, lalanynya' tongi sa'genna satunggu-tungguna.”

²¹Lalang ri anjo paccini'na Bileam nacini' tommi jari-jarina Keni; jari napabattu tommi anne boto kammaya, “Memang kassaki tampa' pammantangannu, rapang ru'mung irate ri bulu' batua.

²²Mingka ikau, tu Keni, laniancurukko, tasalloami naniangkakko ri tu Asyur salaku tunitahang.”

²³Nampa napabattu todong Bileam anne boto kammaya, “Cilakami! Inai lattallasa', punna Nagaukang Allata'ala anjo passalaka?

²⁴Mingka lania' pasukang battu ri Siprus, lanabetai tu Asyur siagang Heber, nampa laancuru' todong anjo pasukanga.”

²⁵Nampa apparurumo Bileam untu' ammotere' mange ri pammantanganna. Kammayatompa Balak a'lampa tommi.