Read Makassar Version – KITTA' MATANGKASA PAMMILANGNGANG 27 Bible Online

PAMMILANGNGANG 27 - Makassar Version – KITTA' MATANGKASA bible

PAMMILANGNGANG 27

¹Zelafehad nia' ana'na baine lima, iamintu: Mahla, Noa, Hogla, Milka siagang Tirza. Manggena Zelafehad iamintu Hefer, manggena Hefer iamintu Gilead, Manggena Gilead iamintu Makhir, manggena Makhir iamintu Manasye, na manggena Manasye iamintu Yusuf.

²Anjo limaya ana'na Zelafehad a'lampai mange andallekang ri Musa, siagang Imang Eleazar, kammayatompa sikamma pamimpinga siagang sikontu umma' niaka sitabang asse're ri ampi'na pakke'bu' KemaNa Batara. Nakana ke'nanga,

³“Matei manggena ikambe ri parang lompoa na tena ana'na bura'ne. Ia tena namminawang ri Korah ri wattunna angngewa Korah ri Batara. Anjo manggena ikambe matei lanri dosana tonji.

⁴Mingka angngapa namusti tappela' arenna battu ri bansa Israel lanri tenanaja bawang ana'na bura'ne? Sare tongi ikambe butta pisaka sangkamma siagang bija pammanakanna manggena ikambe maraenga.”

⁵Nampa napabattumo Musa anjo parkarana ke'nanga mae ri Batara.

⁶Na Nakanamo Batara ri Musa,

⁷ “Anjo kananna ana'na Zelafehad siratang memang tongi. Jari sare tongi ke'nanga butta pisaka sangkamma siagang bija pammanakanna manggena ke'nanga. Anjo warisi'na Zelafehad musti nipassareangi mae ri ana'-ana'na bainea.

⁸Pauangi bansa Israel angkanaya punna nia' sitau tu bura'ne mate nampa tena ana'na bura'ne, anjo tana pisakaya musti niwarisiki mae ri ana'na bainea.

⁹Punna tena ana'na baine, anjo butta pisakana musti niwarisiki mae ri sari'battanna bura'nea.

¹⁰Punna tena sari'battang bura'nena, anjo buttaya nipassareangi mae ri sari'battang bura'nena manggena.

¹¹Punna tena sari'battang bura'nena, nampa tena todong sari'battang bura'nena manggena, anjo buttana nipassareangi mae ri bija kaminang ma'reppese'na lalang ri golonganna.” Anne katantuang kammaya musti naturuki tu Israel salaku paratorang hukkung Naparentakanga Batara tete ri Musa.

¹² Nakana Batara mae ri Musa, “Naikko ri Moncong Abarim, siagang battu anjoreng mako anciniki pa'rasangang laKupassareanga mae ri tu Israel.

¹³Punna le'ba'mi nucini', lamate mako sangkamma daennu Harun,

¹⁴nasaba' ri parang lompo Zin le'bakko sipa'rua angngewai parentaKu. Ri wattunna a'moro-moro sikontu ra'yaka mae ri Nakke ri Meriba, tena nanupa'nyatai kakoasangKu ri dallekanna ke'nanga ri passala'na anjo je'neka.” (Anjo passalaka anjorengi kajariang ri timbuseng je'ne' Meriba, ri Kades, ri parang lompo Zin.)

¹⁵Nampa appala' doammo Musa,

¹⁶nakana, “O, Karaeng Allata'ala, assarea' katallassang mae ri sikontu apa attallasaka, kupalaki, Ki'jo'joki sitau akkullea ampimpingi anne bansaya;

¹⁷ Sitau akkullea a'jari panglima punna a'bundu' ke'nanga. Teaki' lappassangngi anne ummatTa sanrapang gimbala' tenaya pakalawakinna.”

¹⁸ Nakanamo Batara mae ri Musa, “Kioki Yosua, ana'na Nun. Anjo taua cara'deki. Padongkoki limannu irate ri tompo' ulunna.

¹⁹Suroi ammenteng ri dallekanna Imang Eleazar siagang sikontu ummaka. Ri dallekanna ngaseng ke'nanga musti nupa'la'bangi nupabattu angkanaya Yosua assambeangko.

²⁰Passareangi sipa'gang mae ri ia kakoasannu, sollanna mannuruki umma' Israel mae ri ia.

²¹ Yosua musti appalaki pangngunju' battu ri Imang Eleazar, nampa Eleazar musti napakkuta'nangngangi apa erokKu ammake Urim siagang Tumim. Kammaminjo carana Eleazar ampimpingi Yosua siagang sikontu bansa Israel lalang sikontu passala' nadallekanga ke'nanga.”

²²Nagaukammi Musa situru' anjo apa Naparentakanga Batara mae ri ia. Nasuromi Yosua ammenteng ri dallekanna Imang Eleazar siagang sikontu ummaka.

²³ Nampa napadongko' limanna irate ri tompo' ulunna Yosua siagang napa'la'bammi napabattu angkanaya Yosua ansambeangi, situru' kananNa Batara mae ri ia.