Read Makassar Version – KITTA' MATANGKASA PAMMILANGNGANG 29 Bible Online

PAMMILANGNGANG 29 - Makassar Version – KITTA' MATANGKASA bible

PAMMILANGNGANG 29

¹Ri tanggala' se're bulang tuju musti asse're ngasengko untu' anggaukangi ibadaya, siagang takkulleako anggaukangi jama-jamang battalaka. Anjo alloa musti nipasa'rai sikamma tarompeka.

²Passareang tongi mae ri Batara koro'bang nitunua iamintu sikayu sapi laki rungkaya, sikayu gimbala' laki, siagang tuju kayu ana' gimbala' laki umuru' tassitaunga, massing tenaya ngaseng callanna. Rasanna anjo koro'banga napakasannangi nyawaNa Batara.

³Passareang tongi koro'bang nipatalaya tenaya nakkulle tanipassareang, iamintu labu' nipasileo' minynya' zaitun: tallu kilo untu' sapi lakia, rua kilo untu' gimbala' lakia,

⁴siagang sikilo untu' tassikayua ana' gimbala'.

⁵Passareang tongi sikayu bembe laki untu' koro'bang pammopporang dosa. Kammaminjo caranu anggaukangi upacara pannangkasi dosana ummaka.

⁶Sikamma anjo koro'banga a'jari pannambai mae ri koro'bang nitunu nipassareanga siagang koro'bang nipatalaya, ri tanggala' se're tunggala' bulang. Kammayatompa a'jari pannambai mae ri koro'bang nitunu tunggala' alloa, nipassareanga siagang koro'bang nipatala na koro'bang je'ne' anggoro'na. Rasanna anjo koro'banga napakasannangi nyawaNa Batara.

⁷ Ri tanggala' sampulo bulang tuju musti asse're ngasengko untu' anggaukangi ibadaya. Anjo alloa musti appuasako siagang takkulleako anjama.

⁸Passareangi mae ri Batara koro'bang nitunua iamintu sikayu sapi laki rungkaya, sikayu gimbala' laki siagang tuju kayu ana' gimbala' laki umuru' tassitaunga, massing tenaya ngaseng callanna. Rasanna anjo koro'banga napakasannangi nyawaNa Batara.

⁹Passareangi koro'bang nipatala tenaya nakkulle tanipassareang, iamintu labu' nipasileoka siagang minynya' zaitun: tallu kilo untu' sapi lakia, rua kilo untu' gimbala' lakia,

¹⁰siagang sikilo untu' tassikayua ana' gimbala'.

¹¹Passareang tongi sikayu bembe laki untu' upacara pammopporang dosana ummaka, pantaranganna koro'bang pammopporang dosaya siagang koro'bang nitunu tunggala' alloa kammayatompa koro'bang nipatala siagang koro'bang je'ne' anggoro'na nipassareanga anjo alloa.

¹² Ri tanggala' sampulo allima bulang tuju, musti asse're ngasengko untu' anggaukangi ibadaya, siagang takkulleako anjama battala'. Lalang tuju allo musti apparekko passua'-suarrang untu' ampakalompoi Batara.

¹³Ri allo makase'rea passareangi mae ri Batara koro'bang nitunua iamintu sampulo antallu kayunna sapi laki, ruang kayu gimbala' laki rungka, siagang sampulo angngappa' kayunna ana' gimbala' laki umuru' tassitaunga, massing tenaya ngaseng callanna. Rasanna anjo koro'banga napakasannangi nyawaNa Batara.

¹⁴Passareang tongi koro'bang nipatala tenaya nakkulle tanipassareang iamintu labu' nipasileoka siagang minynya' zaitun: tallu kilo untu' tassikayu sapi laki, rua kilo untu' tassikayua gimbala' laki,

¹⁵siagang sikilo untu' tassikayua ana' gimbala'. Siagang anjo koro'bang nipatalaya musti nipassareang tongi koro'bang je'ne' anggoro' niparalluanga.

¹⁶Pantaranganna anjo passareang tongi sikayu bembe laki untu' koro'bang pammopporang dosa. Anjo koro'banga a'jari pannambai mae ri koro'bang nitunu tunggala' alloa siagang koro'bang nipatalaya kammayatompa koro'bang je'ne' anggoro'na.

¹⁷Ri allo makaruaya passareangi sampulo anrua kayunna sapi laki rungka, ruang kayu gimbala' laki, siagang sampulo angngappa' ana' gimbala' laki umuru' tassitaunga, massing tenaya ngaseng callanna.

¹⁸Passareangi siagang yangasenna anjo sikammaya iamintu sikontu koro'bang maraengang sangkamma niparalluanga ri allo makase'rea.

²⁰Ri allo makatallua passareangi sampulo kayunna sapi laki rungkaya, ruang kayu gimbala' laki, siagang sampulo angngappa' kayunna ana' gimbala' umuru' tassitaunga, massing tenaya ngaseng callanna.

²¹Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

²³Ri allo makaappaka passareangi sampulo kayunna sapi laki rungkaya, ruang kayu gimbala' laki, siagang sampulo angngappa' kayunna ana' gimbala' laki umuru' tassitaunga, massing tenaya ngaseng callanna.

²⁴Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

²⁶Ri allo makalimaya passareangi salapang kayu sapi laki rungkaya, ruang kayu gimbala' laki, siagang sampulo angngappa' ana' gimbala' umuru' tassitaunga, massing tenaya ngaseng callanna.

²⁷Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

²⁹Ri allo makaannanga passareangi sagantuju kayunna sapi laki rungkaya, ruang kayu gimbala' laki, sampulo angngappa' kayunna ana' gimbala' umuru' tassitaunga, massing tenaya ngaseng callanna.

³⁰Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

³²Ri allo makatujua passareangi tuju kayu sapi laki rungkaya, ruang kayu gimbala' laki, sampulo angngappa' ana' gimbala' laki umuru' tassitaunga, massing tenaya ngaseng callanna.

³³Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

³⁵Ri allo makasagantujua musti asse're ngasengko untu' anggaukangi ibadaya siagang takkulleako anggaukangi jama-jamang battalaka.

³⁶Passareang tongi mae ri Batara koro'bang nitunu iamintu sikayu sapi laki rungka, sikayu gimbala' laki, tuju kayu ana' gimbala' laki umuru' tassitaunga, massing tenaya ngaseng callanna. Rasanna anjo koro'bang napakasannangi nyawaNa Batara.

³⁷Passareang tongi siagang yangasenna anjo sikammaya iamintu sikamma koro'bang maraengang sangkamma niparalluanga ri allo makase'rea.

³⁹Iaminjo sikamma paratorang ri passala'na koro'bang nitunua, koro'bang nipatalaya, koro'bang je'ne' anggoroka, kammayatompa koro'bang passiamakkang tenaya nakkulle tanupassareang mae ri Batara ri sikamma passua'-suarrang le'baka nipattantu. Sikamma anjo koro'banga a'jari pannambai mae ri sikamma koro'bang nupassareanga untu' ambayaraki tinja'nu yareka koro'bang ero' kalennu.

⁴⁰Napabattumi Musa mae ri bansa Israel sikontu anjo apa Naparentakanga Batara mae ri ia.