Read Makassar Version – KITTA' MATANGKASA PAMMILANGNGANG 3 Bible Online

PAMMILANGNGANG 3 - Makassar Version – KITTA' MATANGKASA bible

PAMMILANGNGANG 3

¹Iaminne sikamma kaluargana Harun siagang Musa ri wattunna a'bicara Batara mae ri Musa irate ri Moncong Sinai.

² Harun nia' appa' ana'na bura'ne, iamintu: Nadab kaminang toaya, nampa Abihu, Eleazar siagang Itamar.

³Nilantiki ke'nanga a'jari imang siagang upacara iamintu nitiriki minynya' tompo' ulunna ke'nanga.

⁴ Mingka Nadab siagang Abihu matei ri parang lompo Sinai, ri wattunna andallekang Batara siagang pepe' tenaya nahallala'. Anjo ke'nanga ruaya massing tena ana'na. Jari lalang attallasa'na ija Harun, Eleazar siagang Itamar tugasa' salaku imang.

⁵Nakana Batara mae ri Musa,

⁶“Suroi suku Lewi battu andallekang, nampa nujo'jo' ke'nanga a'jari palayang-palayanna Harun.

⁷Sarei tugasa' ke'nanga ri KemaKu siagang musti nalayani sikamma imanga kammayatompa sikontu ummaka siagang jama-jamanna ke'nanga ri anjo KemaKu.

⁸Tugasa'na ke'nanga iamintu angngurusuki sikontu pakkakasa' KemaKu siagang anggaukangi jama-jamanga ri anjo KemaKu untu' ansambeangi tu Israelka.

⁹Battua ri bansa Israel, poro suku Lewi ji bawang kusare tugasa' a'jari palayang situlina mae ri Harun siagang jari-jarina.

¹⁰Mingka Harun siagang sikamma ana'na musti nuangkaki untu' anggaukangi tugasa'na salaku imang; pantaranganna ke'nanga, manna pole nai ampaccoba-cobai anggaukangi anjo tugasaka musti nihukkung matei.”

¹¹Nakana Batara mae ri Musa,

¹² “Kamma-kamma anne Kupilei sikamma tu Lewi a'jari taungKu. Ri wattunna Kubuno sikontu ana' bungasa'na bansa Mesir, Kusa'laki untu' KalengKu sikontu ana'-ana' bungasa'na tu Israel siagang sikontu olo'-olo' piara bungasa' lassu'na ke'nanga. Yangasenna anjo iNakke pata. Salaku sambenna ana'-ana' bura'ne bungasa'na Israel Kuallei tu Lewi untu' KalengKu; anjo ke'nanga la'jari taungKu ngasengi. INakkemi Batara.”

¹³

¹⁴Ri parang lompo Sinai Nasuroi Batara anjo Musa

¹⁵ampareki dattara'na tu Lewi situru' golongang bijanna siagang massing kaluargana ke'nanga. Sikamma ana'-ana' bura'ne umuru' sibulanga sa'genna irateanganna musti nicataki arenna.

¹⁶Nampa nagaukammo Musa anjo apa Naparentakanga Batara.

¹⁷Anjo Lewi nia' tallu ana'na bura'ne, iamintu: Gerson, Kehat siagang Merari. Iami ke'nanga boe-boena golongang bija nisa'buka situru' arenna ke'nanga. Gerson nia' rua ana'na bura'ne iamintu: Libni siagang Simei. Kehat nia' appa' ana'na bura'ne iamintu: Amram, Yizhar, Hebron siagang Uziel. Merari nia' rua ana'na bura'ne, iamintu: Mahli siagang Musi. Iaminjo ke'nanga boe-boena sikamma kaluarga nisa'buka situru' arenna ke'nanga.

¹⁸

¹⁹

²⁰

²¹Golongang bijanna Gerson iamintu Kaluarga Libni siagang Kaluarga Simei.

²²Ia jaina tu bura'ne golongang bijanna Gerson umuru' sibulanga sa'genna irateanna iamintu 7.500 tau.

²³Elyasaf ana'na Lael ampimpingi anjo golongang bijaya. Na anne ke'nanga angngallei tampa' ri bageang laukanna bageang ri bokona KemaNa Batara lalang ri pakkemaanna bansa Israel.

²⁴

²⁵Lalang urusanna KemaNa Batara, iaminjo ke'nanga tanggong jawa' mae ri Kemaya siagang pattongko'na, kaeng ri pakke'bu' pantamanga,

²⁶layara' paranglakkeng angkulilingiai Kemaya siagang tampa' pakkoro'bangnganga, siagang gordeng pakke'bu'na anjo paranglakkenga. Iami ke'nanga tanggong jawa' ri sikontu jama-jamang mae ri anjo barang-barang sikammaya.

²⁷Golongang bijanna Kehat iamintu kaluarga-kaluargana Amram, Yizhar, Hebron siagang Uziel.

²⁸Ia jaina tu bura'ne umuru' sibulanga sa'genna irateanganna anjo golongan bijaya, yangasenna iamintu 8.600 tau. Iami ke'nanga tugasa' angngurusuki barang-barang niaka ri KemaNa Batara.

²⁹Elisafan ana'na Uziel ampimpingi anjo golongang bijaya. Anjo ke'nanga angngallei tampa' ri bageang timboranna KemaNa Batara.

³⁰

³¹Iami ke'nanga tanggong jawa' mae ri Patti Parjanjiang, mejang, sikamma tampa' pakkoro'bangnganga, sikamma pakkakasa' napakea sikamma imanga lalang ri Kamara' Matangkasaka, siagang gordeng passimbanna Kamara' Matangkasaka. Iami ke'nanga tanggong jawa' mae ri sikontu anjo barang-barang sikammaya.

³²Kapalana suku Lewi iamintu Eleazar, ana'na Harun. Ia angngawasi sikamma tau tugasaka ri Kamara' Matangkasaka.

³³Golongang bija battua ri Merari iamintu Kaluarga Mahli siagang Kaluarga Musi.

³⁴Ia jaina tu bura'ne umuru' sibulanga sa'genna irateanganna battu ri anjo golongang bijaya iamintu 6.200 tau.

³⁵Zuriel ana'na Abihail angkapalai anjo golongang bijaya. Anjo golonganga angngallei tampa' ri bageang wara'na KemaNa Batara lalang ri pakkemaanga.

³⁶Iami ke'nanga tanggong jawa' mae ri rangka-rangkana anjo Kemaya, balo'-balo'na, benteng-bentenna, dapara'na, siagang sikontu pakkakasa'na kammayatompa sikontu jama-jamanga mae ri sikamma anjo barang-barang kammaya.

³⁷Kammayatompa mae ri sikamma benteng-bentenga, sikamma pa'lapaka, sikamma pa'lasaka siagang otereka untu' pantaranga ri paranglakkenga.

³⁸Lalang ri pakkemaanga, Musa siagang Harun kammayatompa sikamma ana'na ke'nanga musti angngallei tampa' ri dallekang KemaNa Batara, ri bageang rayana. Iami ke'nanga tanggong jawa' mae ri upacara ibadaya untu' bansa Israel ri Kamara' Matangkasaka. Pantaranganna ke'nanga, manna pole inai punna napaccoba-cobai nagaukang anjo jama-jamanga musti nihukkung matei.

³⁹Sikontu tu bura'ne niaka lalang ri suku Lewi umuru' sibulanga sa'genna irateanganna, ia nidattaraka ri Musa situru' massing golongang bijanna ke'nanga lanri parentaNa Batara, yangasenna nia' 22.000 jaina tau.

⁴⁰Nakana Batara mae ri Musa, “Sikontu ana'-ana' bura'ne bungasaka ri Israel iNakke pata. Cataki areng-arenna ke'nanga, ia umuru' sibulanga sa'genna irateanganna. Mingka untu' sambenna ke'nanga, Kupattantumi angkanaya sikontu tu Lewi iNakke ngaseng pata! INakkemi Batara! Kammayatompa sikamma olo'-olo' piarana tu Lewi Kupattantumi untu' a'jari sambe mae ri sikontu olo'-olo' bungasaka lassu' battu ri sikamma olo'-olo' piarana bansa Israel.”

⁴¹

⁴²Nagaukammi Musa anjo apa Naparentakanga Batara; nacata'mi arenna sikontu ana' bura'ne bungasaka

⁴³ia umuru' sibulanga sa'genna irateanganna. Yangasenna ke'nanga nia' 22.273 jaina tau.

⁴⁴Nampa Nakana Batara mae ri Musa,

⁴⁵“Sa'laki tu Lewi untu' iNakke salaku sambenna sikamma ana' bungasa'na tu Israel; kammayatompa olo'-olo' piarana tu Lewi salaku sambenna olo'-olo' piarana tu Israel.

⁴⁶Lanri la'biangngangi ana' bura'ne bungasa'na tu Israel 273 jaina tau najaina tu Lewi, jari anjo la'binna musti nupasuluki.

⁴⁷Untu' tunggala' tasse'rea ana', musti a'bayarakko lima doe' pera' situru' anggarang niaka tappake ri KemaKu;

⁴⁸passareangi anjo doeka mae ri Harun siagang ana'-ana'na.”

⁴⁹Nagaukammi Musa anjo kammaya.

⁵⁰Angngallemi 1.365 doe' pera',

⁵¹nampa napassareang mae ri Harun siagang ana'-ana'na.