Read Makassar Version – KITTA' MATANGKASA PAMMILANGNGANG 30 Bible Online

PAMMILANGNGANG 30 - Makassar Version – KITTA' MATANGKASA bible

PAMMILANGNGANG 30

¹Napassareangi Musa sikammaya anne paratoranga mae ri sikamma pamimping suku-suku bansa Israel.

² Punna nia' tu bura'ne attinja' yareka appau janji siagang sumpa mae ri Batara, sa'genna nasikko' kalenna siagang se'reang janji, musti narupai anjo apa napa'janjianga, siagang takkulleai tanarupai anjo kananna.

³Punna nia' se're tulolo ammantang ri balla'na manggena attinja' mae ri Batara, siagang nasikko' kalenna ri se'reang janji, nampa tenaja nakabattallangi manggena ri wattunna nalangngere' anjo passalaka, anjo tuloloa narupai anjo sikontu tinja'na yareka janjinna.

⁵Mingka punna ri wattu nalangngere'na manggena nakabattallangi anjo passalaka, anjo tuloloa tena nanisikkoki ri tinja'na siagang janjinna. Lanipammopporangi ri Batara, lanri nipisangkaina ri manggena.

⁶Punna nia' sitau baine tenayapa na'bunting attinja' yareka nasikkoki kalenna ri se'reang janji, baji' nanapikkiri' memang la'bi riolo yareka tena, tassikkoki ri anjo tinja'na yareka janjinna. Punna ri bokoangallo na'bunting, tuli tassikko'na anjo bainea ri anjo tinja'na yareka janjinna, assala' tenaja nakabattallangi bura'nenna ri wattunna nalangngere' anjo passalaka.

⁸Mingka punna nipisangkai ri bura'nenna ri wattunna nalangngere' anjo passalaka, tena natassikko' ri anjo tinja'na yareka janjinna. Lanipammopporangi ri Batara.

⁹Punna nia' sitau janda yareka baine le'bakamo nisa'la' ri bura'nenna attinja' yareka a'janji, tassikkoki kalenna ri anjo janjia, yareka tinjaka, siagang musti narupai.

¹⁰Punna nia' sitau baine le'ba'mi a'bunting attinja' yareka assikkoki kalenna siagang janji,

¹¹musti narupai ngasengi anjo sikamma apa napa'janjianga, assala' tenaja nakabattallangi bura'nenna ri wattunna nalangngere' anjo passalaka.

¹²Mingka punna nipisangkai ri bura'nenna ri wattunna nalangngere' anjo passalaka, anjo bainea tenamo natassikko' ri tinja'na yareka janjinna. Lanipammopporangi ri Batara, lanri nipisangkaina ri bura'nenna.

¹³Anjo bura'nenna nia' ha'na untu' ansitujui yareka ampata'jariai se'rea tinja' yareka janji napareka bainenna.

¹⁴Punna tenaja nakabattallangi bura'nenna ri wattunna nalangngere' anjo passalaka, anjo bainea musti narupai tinja'na yareka janjinna. Situjui bura'nenna mae ri anjo tinjaka yareka janjia lanri tena nakabattallangi ri wattunna nalangngere' anjo passalaka.

¹⁵Punna ri bokoangallo natanapa'jaria bura'nenna tinja'na yareka janjinna anjo bainenna, iaminjo bura'nenna musti antanggongi kale'bakkang kodina lanri tanapa'jarina anjo passalaka.

¹⁶Iaminjo paratorang-paratorang Napassareanga Batara mae ri Musa ri passala'na tinjaka siagang janji napareka se'rea tulolo niaka ammantang ri balla'na manggena, yareka se'rea tubaine le'bakamo a'bunting.