Read Makassar Version – KITTA' MATANGKASA PAMMILANGNGANG 33 Bible Online

PAMMILANGNGANG 33 - Makassar Version – KITTA' MATANGKASA bible

PAMMILANGNGANG 33

¹Nabokoinamo bansa Israel butta Mesir, a'barrisi' situru' massing suku bansana, nipimping ri Musa siagang Harun, assengkai ke'nanga ri siapa are tampa'.

²Naparentakangi Batara mae ri Musa sollanna nacataki arenna anjo massing tampa' napassengkaia.

³Tanggala' sampulo allima bulang se're, siallo ri le'ba'na Paska makase'rea, nanabokoi bansa Israel butta Mesir. Batara alla'langi ke'nanga ambokoi kota Rameses, nicini' ri bansa Mesir,

⁴sitabanga antarawangi ana'-ana' bungasa'na ke'nanga, ia le'baka nibuno ri Batara. Lanri iaminjo gau'na, na Napa'buttimo Batara angkanaya Ia la'bi kassa' kala rewata-rewatana tu Mesir.

⁵Nabokoinamo bansa Israel kota Rameses, akkemami ke'nanga ri Sukot.

⁶Nampa a'lampa pole siagang akkema ri Etam, ri biring parang lompoa.

⁷Battu anjoreng ammotereki ke'nanga mange ri Pi-Hahirot, irayanganna Baal-Zefon, nampa akkema ri ampi'na Migdol.

⁸Nampa nabokoi ke'nanga Pi-Hahirot, a'limbang tamparang siagang antama' ri parang lompo Etam; ri tallungallonamo pa'jappang, akkemami ke'nanga ri Mara.

⁹Battu anjoreng a'lampa tulusu'mi ke'nanga siagang akkemami ri Elim; anjoreng nia' sampulo anrua timbuseng je'ne' siagang tujupulo poko' korma.

¹⁰Nampa nabokoi ke'nanga Elim siagang akkema ri ampi'na biring Tamparang Suez.

¹¹Nampa pole akkema ke'nanga ri parang lompo Zin, nampa ri ampi'na Dofka, le'baki anjo ri Alus, nampa ri Rafidim, mingka anjoreng tena je'ne' inung.

¹⁵Battu ri Rafidim tulusu'mi ke'nanga mange ri Moncong Hor siagang akkema ri tampa'-tampaka anne: ri parang lompo Sinai, Kibrot-Taawa, “Jera' Kabalalang”, Hazerot, Ritma, Rimon-Peres, Libna, Risa, Kehelata, Moncong Syafer, Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona, Ezion-Geber, parang lompo Zin, siagang Moncong Hor, ri pa'baeng-baenna butta Edom.

³⁸ Situru' parentaNa Batara, naiki Imang Harun ri Moncong Hor. Anjoremmi mate ri tanggala' se're bulang lima ri taung makapatampulona bansa Israel le'ba' nabokoi butta Mesir. Umuru' 123 taung namate Harun.

⁴⁰ Lalanna anjo wattua anggappami kabara' karaeng Arad, ri butta Negeb, Kanaan bageang Timboro', angkanaya niaki umma' Israel labattu mange ri pa'rasanganna.

⁴¹Lalang pa'jappang battu ri Moncong Hor mange ri lappara' Moab, akkemai tu Israel ri tampa'-tampaka anne: Zalmona, Funon, Obot, rumbangang Abarim ri daera Moab, Dibon-Gad, Almon-Diblataim, Moncong Abarim ri ampi'na Moncong Nebo, siagang ri lappara'na Moab ri biring Binanga Yordan, ri ampi'na kota Yerikho, ri alla'na Bet-Yesimot siagang Ka'bung Lappara'na Sitim.

⁵⁰Ri lappara' Moab, ri biring Binanga Yordan, ri ampi'na kota Yerikho, Napassareangi Batara mae ri Musa

⁵¹anne parenta-parentaya untu' bansa Israel: “Punna a'limbangko ri Binanga Yordan untu' antama' ri pa'rasangang Kanaan,

⁵²musti nubongkai sikontu pandudu'na anjo pa'rasanganga. Ancuru' ngasengi sikontu barhalana ke'nanga battua ri batu siagang bassi-bassiang kammayatompa tampa'-tampa' ibadana ke'nanga.

⁵³Anjo buttaya musti nuallei siagang nuempoi, nasaba' le'ba'mi Kupassareang mae ri kau.

⁵⁴ Nampa musti nubage a'jari pisakanu; carana nubage iamintu nugoccangi sangkamma loterei. Untu' golongang bija lompoa musti lompo tongi bageanna, nampa mae ri golongang bija ca'dia musti ca'di tongi bageanna.

⁵⁵Mingka punna tena nubongkai pandudu'na anjo pa'rasanganga, anjo tau ammantanga anjoreng lanasusaiko sanrapang kassi' antama' ri matannu yareka sanrapang katinting anto'doki bangkennu. Sallang ke'nangami lambundukiko.

⁵⁶Punna tena nanubongkai ke'nanga, laKupanrakiko sangkamma le'baka Kurancanakang mae ri ke'nanga.”