Read Makassar Version – KITTA' MATANGKASA PAMMILANGNGANG 7 Bible Online

PAMMILANGNGANG 7 - Makassar Version – KITTA' MATANGKASA bible

PAMMILANGNGANG 7

¹Ri wattunna le'ba' nabangung Musa KemaNa Batara, nitangkasimi anjo Kemaya siagang sikontu pakkakasa'na, iamintu nisapui ngasengi siagang minynya' upacara. Kamma tomminjo nagaukanga mae ri tampa' pakkoro'bangnganga siagang sikontu pakkakasa'na.

²Nampa sikamma pamimpinna tu Israel, iamintu sikamma kapala sukua, ia tanggong jawaka mae ri nigaukanna pammilangnganga,

³assaremi ri dallekanNa Batara annang batunna karoba siagang sampulo anrua sapi: tunggala' ta'ruaya pamimping assarei se're karoba, siagang massing tassikayuna sapi. Le'baki napassareang ke'nanga,

⁴Nakanamo Batara mae ri Musa,

⁵“Tarimami anjo sikamma passarea untu' angngerangi KemaKu; passareang ngasengi anjo sikammaya mae ri tu Lewi situru' tugasa'na ke'nanga.”

⁶Nampa nipassareang anjo sikamma karobaya siagang sapia battu ri Musa mae ri tu Lewi.

⁷Rua karoba siagang patang kayu sapi nipassareang mae ri tu Gerson,

⁸appa' karoba siagang sagantuju kayunna sapi nipassareang mae ri tu Merari, situru' jama-jamang nagaukanga ke'nanga nipimping ri Itamar, ana'na Harun.

⁹Mingka tu Kehat tena nannarima karoba yareka sapi battu ri Musa, nasaba' anjo barang-barang matangkasa' lanaeranga ke'nanga musti nasompoi irate ri salangganna ke'nanga.

¹⁰Sikamma pamimpinga angngerang passare untu' ampakalompoi upacara pannangkasi tampa' pakkoro'bangnganga. Ri wattunna sadiamo ke'nanga untu' angngerangi passarena ke'nanga mange ri dallekanna tampa' pakkoro'bangnganga,

¹¹Nakanamo Batara mae ri Musa, “Pauangi ke'nanga angkanaya tunggala' allo lalang sampulo anrua allonna kalase'renna battu ri anjo sampuloa anrua pamimping musti a'le'basaki ampassareangi koro'banna untu' upacara pannangkasi tampa' pakkoro'bangnganga.”

¹²Kammaminne batena a'le'basa' massing angngerangi passarena: [Allo] — [Suku] — [Pamimping] Maka-1 — Yehuda — [Nahason ana'na Aminadab] Maka-2 — Isakhar — [Netaneel ana'na Zuar] Maka-3 — Zebulon — [Eliab ana'na Helon] Maka-4 — Ruben — [Elizur ana'na Syedeur] Maka-5 — Simeon — [Selumiel ana'na Zurisyadai] Maka-6 — Gad — [Elyasaf ana'na Rehuel] Maka-7 — Efraim — [Elisama ana'na Amihud] Maka-8 — Manasye — [Gamaliel ana'na Pedazur] Maka-9 — Benyamin — [Abidan ana'na Gideoni] Maka-10 — Dan — [Ahiezer ana'na Amisyadai] Maka-11 — Asyer — [Pagiel ana'na Okhran] Maka-12 — Naftali — [Ahira ana'na Enan] Passarena ke'nanga massing sangkamma ngasengi iamintu: se're panne battala'na 1,5 kilo siagang se're katoang pera' battala'na 800 garang, situru' timbangang nipakea ri KemaNa Batara. Anjo ruaya pammoneang nibonei rassi labu' nileoka siagan(...)

⁸⁴Passare naeranga anjo sampuloa anrua pamimping untu' pannangkassinna anjo tampa' pakkoro'bangnganga yangasenna jaina iamintu: — sampulo anrua panne pera' siagang sampulo anrua katoang pera', battala'na yangaseng iamintu 27,6 kilo — sampulo anrua panne bulaeng, battala'na yangaseng iamintu 1,32 kilo, rassi ngaseng dupa — sampulo anrua sapi laki, sampulo anrua gimbala' laki, siagang sampulo anrua ana' gimbala' umuru' sitaunga, siagang koro'bang nipatala salaku panggannakkinna untu' koro'bang nitunu — sampulo anrua bembe untu' koro'bang pammopporang dosa — ruampulo angngappa' sapi laki, annampulo gimbala' laki, annampulo bembe, siagang annampulo ana' gimbala' umuru' sitaunga untu' koro'bang passiamakkang.

⁸⁹Sampang antamaki Musa ri KemaNa Batara untu' a'bicara siagang Batara, nalangngere'mi sa'ranNa Batara a'bicara mae ri ia battu rate ri pa'rangka'na Patti Parjanjianga ri alla'na anjo ruaya patung malaeka' akka'nyi'.