Read Makassar Version – KITTA' MATANGKASA PAMMILANGNGANG 8 Bible Online

PAMMILANGNGANG 8 - Makassar Version – KITTA' MATANGKASA bible

PAMMILANGNGANG 8

¹ Nakana Batara mae ri Musa,

²“Pauangi Harun angkanaya punna napataba anjo tujua lampu mae ri anjo bangkeng lampua, musti napataba bajiki sollanna akkulle nasingari bageang dallekanna anjo lampua.”

³Nagaukammi Harun anjo apa Naparentakanga Batara. Napatabami anjo lampu-lampua a'dalle' mae ri bageang dallekanna bangkeng lampua.

⁴Anjo pammoneang lampua, sa'genna irateanna siagang bunga-bunga pa'belo-belona bulaeng nide'de' nipare', situru' conto Napappicinikanga Batara mae ri Musa.

⁵Nakana Batara mae ri Musa,

⁶“Sa'laki tu Lewi battu ri tu Israel maraenganga siagang gaukangi upacara pannangkasia mae ri ke'nanga,

⁷iamintu kammaya anne carana: piracciki ke'nanga siagang je'ne' untu' upacara pannangkasi siagang suroi ke'nanga ancukkuruki sikontu batangkalenna ke'nanga siagang ansassai pakeanna ke'nanga. Kammaminjo na natangkasi kalenna ke'nanga.

⁸Nampa suroi ke'nanga angngalle sikayu sapi laki rungka siagang koro'bang nipatala battua ri labu' nipasileo' minynya'. Nampa musti nualle sikayu sapi maraenga untu' koro'bang pammopporang dosa.

⁹Nampa passe'rei sikontu umma' Israel siagang suroi tu Lewi ammenteng ri dallekang KemaKu.

¹⁰Ummaka musti napadongkoki limanna ke'nanga irate ri tompo' ulunna tu Lewia,

¹¹nampa napassareangi Harun anjo tu Lewia salaku passare nisa'la'na tu Israel mae ri Nakke, sollanna akkulle nagaukang ke'nanga ibadaKu.

¹²Nampa tu Lewia musti napadongkoki limanna ke'nanga irate ri tompo' ulunna anjo ruaya sapi laki; anjo sikayua musti nipassareangi untu' koro'bang pammopporang dosa, nampa anjo sikayua pole untu' koro'bang nitunu. Kammaminjo upacarana nanitangkasi tu Lewi.

¹³Sa'laki tu Lewi untu' iNakke siagang suroi ke'nanga allayani Harun siagang sikamma ana'na.

¹⁴Lanri iaminjo upacaraya nanusa'la'mo tu Lewi battu ri tu Israel maraengannaya, sollanna a'jari iNakke ampatangi.

¹⁵Punna le'ba' nugaukang anjo upacara nipassareanna tu Lewia, nia'mo ha'na ke'nanga anjama lalang ri KemaKu.

¹⁶Le'ba'mi Kupa'jari ke'nanga passambe mae ri sikontu ana' bura'ne bungasa'na tu Israel; jari anjo ke'nanga le'ba'mi nisa'la' untu' iNakke pata.

¹⁷ Ri wattunna Kubuno ngaseng sikontu ana' bungasa'na tu Mesir, ana' bura'ne bungasa' sikamma kaluarga tu Israel kammayatompa sikamma olo'-olo' bungasa' lassuka Kupa'jari iNakke pata.

¹⁸Kamma-kamma anne salaku sambenna ana' bungasa'na tu Israel, Kuallei tu Lewi,

¹⁹nampa anjo tu Lewia Kupassareangi mae ri Harun siagang sikamma ana'-ana'na, sollanna akkulle nagaukang tugasaka untu' tu Israel lalang ri KemaKu. Kammayatompa sollanna appala' ke'nanga pammopporokKu untu' bansa Israel, sollanna anjo bansaya tena natujui bala punna battui ke'nanga a'reppese' dudu ri anjo tampa' matangkasaka.”

²⁰Lanri kammana anjo, Musa, Harun siagang sikontu umma' Israel napassareammi anjo tu Lewi mae ri Batara, sangkamma Naparentakanga Batara mae ri Musa.

²¹Anjo tu Lewi nagaukammi upacara pannangkasia ri kalenna siagang nasassami pakeanna ke'nanga nampa nipassareang ke'nanga ri Harun salaku passare nisa'la' mae ri Batara. Nagaukang tommi Harun upacara pannangkasia mae ri ke'nanga.

²²Nagaukammi tu Israel sikontu apa Naparentakanga Batara mae ri Musa ri passala'na tu Lewi. Lanri kammana minjo nanggappamo ha' tu Lewi untu' anggaukangi jama-jamanga lalang ri KemaNa Batara nipimping ri Harun siagang sikamma ana'na.

²³Nakana Batara mae ri Musa,

²⁴“Sikamma tu Lewi umuru' ruampulo allima taung sa'genna rateanganna, musti nagaukangi tugasa'na lalang ri KemaKu,

²⁵nampa punna narapi'mi limampulo taung nipakabebasa'mi battu ri tugasa'na.

²⁶Le'baki anjo akkullei nabantu tu Lewi maraenga, ia tugasaka lalang ri KemaKu, mingka tenamo nattantu tugasa'na. Kammaminjo carana niatoro' jama-jamanna tu Lewi.”