Read Makassar Version – KITTA' MATANGKASA PAMMILANGNGANG 9 Bible Online

PAMMILANGNGANG 9 - Makassar Version – KITTA' MATANGKASA bible

PAMMILANGNGANG 9

¹ Ri bulang se're lalang taung makaruaya ri le'ba'namo nabokoi bansa Israel butta Mesir, a'bicarami Batara mae ri Musa ri parang lompona Sinai. Nakana Batara,

²“Ri tanggala' sampulona angngappa' anne bulanga, appakkaramula ri wattu labuna alloa, musti napakalompoi tu Israel allo Paskaya situru' paratorang le'baka nipattantu.”

⁴Jari nisuromi bansa Israel ri Musa ampakalompoi anjo allo Paskaya.

⁵Napakalompomi ke'nanga anjo allo Paskaya ri parang lompona Sinai ri wattu karueng tanggala' sampulo angngappa' bulang se're. Yangasenna anjo nagaukammi ke'nanga situru' apa Naparentakanga Batara mae ri Musa.

⁶Mingka nia' siapa are tau ra'masa' ri alla'na ke'nanga lanri le'baki nasero tau matea, sa'genna takkullea napakalompo allo Paskaya anjo alloa. A'lampai ke'nanga mange andallekang ri Musa siagang Harun,

⁷nampa angkana, “Ikambe anne ra'masakki' lanri le'bakki' assero maya'. Mingka angngapa nanipassangngaliangi ikambe sa'genna takkullea ikambe assare koro'bang mae ri Batara siagang ngaseng sikamma sari'battanna ikambe?”

⁸Appialimi Musa angkana, “Tayangi rolong sa'gengku anggappa pangngunju' battu ri Batara.”

⁹Nasuromi Batara anjo Musa

¹⁰ampabattui mae ri bansa Israel angkana, “Punna nia' ri alla'nu yareka jari-jarinu ra'masa' lanri le'ba'na nasero mayaka yareka sitabangi lalang pa'jappang bella, ia musti napakalompo tongi allo Paskaya untu' Batara.

¹¹Mingka anjo allo Paskaya musti napakalompoi sibulang ribokoanganna, iamintu ri tanggala' sampulo angngappa' bangngi bulang rua. Pakalompoi anjo alloa siagang angnganre gimbala' Paska nupasiagang roti tenaya nammake pa'gambang kammayatompa gangang pai'.

¹² Teako nia' nusesa anjo kanrea sa'genna ammuko bari'basa', siagang teako tepoki bukunna manna pole sipappa' anjo olo'-olo' nipassareanga mae ri Nakke. Pakalompoi anjo allo Paskaya situru' siagang sikontu paratoranga.

¹³Kabalekanna tau tenaya nara'masa' siagang tenaya todong nalalang pa'jappang, mingka tanajampangiai ampakalompoi allo Paskaya, tenamo naKubilangi ummakKu, lanri tenana nassare koro'bang mae ri Nakke ri allo le'baka nipattantu. Anjo taua musti natanggongi kale'bakkang kodina anjo dosana.

¹⁴Punna nia' ri alla'nu bansa maraeng ero' ampakalompoi allo Paskaya, musti napakalompoi situru' sikontu paratoranga siagang katantuanga. Anne hukkunga musti napakei tunggala' taua, baji' tu Israel kammayatompa bansa maraenga.”

¹⁵Ri allo nipaentenna KemaNa Batara, battumi rammanga nampa narangka' anjo Kemaya. Ri wattunna bangngi sa'genna bari'basa' anjo rammanga kammai pepe' nicini'.

¹⁷Sampang naiki anjo rammanga, nabongkara'mi tu Israel pakkemaanna, nampa a'lampa. Nampa kemae-kemae naung anjo rammanga, anjoremmi ri tampaka akkema poleang ke'nanga.

¹⁸Lanri parentaNa Batara nanabongkara' Kemaya siagang lanri parentaNa todong Batara nanapaenteng ke'nanga ammotere' anjo Kemaya. Lalang nia'na anjo rammanga irateanna KemaNa Batara, tuli ammantanna ke'nanga anjoreng ri tampaka.

¹⁹Punna sallo anjo rammanga nia' irateanganna anjo Kemaya, mannuruki ke'nanga mae ri paratoranNa Batara siagang ta'lampayai ke'nanga battu ri anjo tampaka.

²⁰Mingka nia' todong wattu napirangallo areja anjo rammanga nia' irateanganna anjo Kemaya. Manna pole naantekamma, parentaNaji bawang Batara ampattantui ammantang ke'nanga ri se'reang tampa' yareka ambokoi anjo tampaka.

²¹Nia' wattu nammantang anjo rammanga poro battu ri karuenna sa'genna bari'basa', na punna nai' anjo rammanga ri bari'basa'na, a'lampami ke'nanga. Kere wattu nanai' anjo rammanga, baji' naallo yareka bangngi, a'lampami ke'nanga.

²²Lalang nia'na anjo rammanga irateanganna KemaNa Batara, apaka ruangallo, sibulang, sitaung yareka la'bi, sikamma tomminjo sallona ke'nanga ammantang ri anjo tampaka. Punna nai' anjo rammanga, nampami a'lampa ke'nanga.

²³Ammantangi ke'nanga ri se'reang tampa' siagang a'lampai ke'nanga ri se'reang tampa' maraeng situru' ngasengi parentaNa Batara iamintu Napassareanga Batara tete ri Musa.